Read Masana EZEKIYEL 26 Bible Online

EZEKIYEL 26 - Masana bible

EZEKIYEL 26

¹Hay buur ta jewta vi tilla kuɗ busata doogo yam kepta, Ma-Vatɗina ka di yoboyn tan ala:

²Goora vi sana, kay sum sa hay Tirus cen haha! Kuɗ Yerusalem, nisi di ala na' ɦoowa gaa'a, na'a ta vun-galana vi sumun kafta, nisi muɗ irsi ayawa kiranu. Nan hobawa, nisi hini goy ful ɦawa'a may.

³Kuɗ kayni Bum-Sumuna Ma-Vatɗina ka di ala: Nan coowa kigi nigi sum sa hay Tirusna, sumun ŋolo nan ma yawsi ay kulo katgiya, ki niy-lumna gi billa valam kulo nala.

⁴Nisi ma to gulmunna vi Tirus gaa'a, nisi ma ɦo simdira va' gaa'a, nan ma tok butuw ma ka'na goyo; nan ma muɗa' ki hiɗiyta ta ya' goy ɦawa kaɗaŋ kaɗaŋ' nala.

⁵Na' ma hin goy way niy-lumna mi liyn ma ɓal den haya; kay di slen namna kayni mi nanu, jaf-sumun ma vuruma'a. Din mi Bum-Sumuna Ma-Vatɗina.

⁶Gurona va' sa goy fulla kew-gaferaŋa ma cisi goyo, nala sumun ma wi ala nanu mi Ma-Vatɗina.

⁷Kay mige Bum-Sumuna Ma-Vatɗina ka di ala: Hay gal ma gaana pa, nan min mar kat Tirus mulla Nebukadnesar, mulla vi Babilon, mulla vi muliyana, hiɗi kulumayna, hiɗi keke-ma-duura, sa be kulumayna, vokŋa vi sumuna hiɗi sum sa ŋol ɦini ɦini'.

⁸Guro-boyna vigi sa goy hay sinena nam ma cisi goy hiɗi kew-gaferaŋa; nam ma gi zlaɓn katgiya, ma gi damna katgiya, nam ma ɦo nagat gaa'a.

⁹Fok-gamalana visiya ma dab gulmunna vigiya, nisi ma to simdira vigi gaa'a.

¹⁰Kulumayna visi ma kuɗ tuwam ŋolla ma ɗubgi gaa hay butuwna, gulmunna vigi ma muɗ geɗa kuɗ suwana vi sem-kekena hiɗi keke-ma-duura, hay li ma nisi ma cuk hay vun-galana vigiya ki nisi kal hay vun-galana vi hoyok-ziyna ma nisi koloy kalamna nala.

¹¹Nisi ma tay sem hagana vigi gaa kaf hiɗi sem kulumayna visiya, nisi ma ci sumuna vigi goyo hiɗi kew-gaferaŋa. Dolla ma ɗek donota vigina ma kusis gaa'a kay nagata.

¹²Nisi ma yaw farayna vigiya, slen ma gus-goyna vigiya nisi ma tum ɓuraŋi, nisi ma ɦo gulmunna vigi gaa'a, nisi ma to ziyna vigi ma kuɗusna gaa'a, hiɗiyna vigiya hiɗi guna vigiya hiɗi butuwna vigi kaf, nisi ma kom goy goloŋ way niyna.

¹³Nan ma zan suwana vi nulla vigiya, sa as hum del dilla vigi loɗi.

¹⁴Nan ma muɗ nagata vi Tirus ki hiɗiy ma yalam goy ɦawa gaɗaraŋ' nala, Tirus ma muɗ mi liyn ma sumun ganam hayam mi dena, sa as hot in Tirus kulo loɗi. Kay di nala kayni mi nanu Bum-Sumuna, Ma-Vatɗina.

¹⁵Ki kayn nala Bum-Sumuna Ma-Vatɗina ka law Tirus: Hay suwana vi ni-gaata vagu, hay li ma sumun ka tiy vun mitta, hay li ma cita-goyta ma li jargi ŋolo, jokona tuwam ma vum bat-bat' ɗisu?

¹⁶Muliyana sa vun niy-lumna kaf ma jik gaa kay zlamda-mulda visiya, nisi ma fok sligara visi ma tisin goyo, sligara visi ma ciliyna nisi ma hinim goyo; nisi ma cuk narta tisiya, ma lak gaa vi nagata; nisi ma lak hay narta dok-doko, ma muɗ ɦuyum' kuɗ Tirus.

¹⁷Nisi ma gi nul ma tiyna kay Tirus, ma di ala: Mi meloge, nak vatawa goy de su? Nak ta sum sa poy goloŋŋa li ziy hayakga, hoyok-ziy ma selem tiyna, hoyok-ziy ma dono ŋol goloŋ jar niy-lumna, hoyok-ziy namna hiɗi sum sa hayamna, sa as vul narta mi sum sa ŋuyi galam kafna,

¹⁸wulin kayni jokona muɗi nari kuɗ ni-gaata vigiya, joko ma goloŋ hay niy-lumna tuwam muɗi vum bat-bat' kuɗ vat-goyta vi Tirus.

¹⁹Kuɗ na'ta Bum-Sumuna Ma-Vatɗina ka di ala: Hay li ma nan ma muɗ Tirus mi hoyok-ziy ma ɓulakay goyna, ki hoyok-ziyna ma sum say hayamɗina nala, hay li ma nan ma hin zul ma wiŋŋa jik kulo kat Tirus, hay li ma niy ma zulla ma ɗuba'a,

²⁰nan ma jikay gaa'a jar nisi sa jik gaa hay zulla, jar sum sa jew ɓa-ɓana, nan ma mus Tirus gaa hay liyn ma zulla vi nagata, ŋray ca ki ɓulak-goyta ta vatɗit nala, hiɗi nisi sa jik gaa hay zulla, kay sa ma mus hayag loɗi; suburta nan ma hina' mi nagata vi sum sa irina.

²¹Nan ma muɗag ɗawni mi va ma san li ɦuyum kuɗumu, sa muɗ fag loɗi; nisi ma garagu, may as fag noŋɗi. Dita vi Bum-Sumuna Ma-Vatɗina.