Read Masana EZEKIYEL 27 Bible Online

EZEKIYEL 27 - Masana bible

EZEKIYEL 27

¹Ma-Vatɗina ka di yoboyn tan ala:

²Naŋu goora vi sana, gaŋ nul ma tiyna kay Tirus.

³Daŋ tam Tirus ala: Yayya! Naku ta musi vun niy-lum ma ŋolla, naku ta li filiwna jargi hiɗi jaf-sumun ŋolo. Ki kayn nala Bum-Sumuna Ma-Vatɗina ka di ala: Tirus; nak di'e: Jifiyta vanu na' asay ŋaa'a ŋolo.

⁴Jar nagata vagu ka goy way niy-lumna; nisi sa inag kulona kotag jifiy ŋolo.

⁵Nisi inag gaŋag kulo kaf hiɗi gu-sipre ma hay Senir,

⁶nisi ka gu-gamna ma hay Libaŋ aya, kay pi gu-fiyokŋa[8] kulo hayagu, nisi kot purana vagu hiɗi gu-ma'asna ma hay Basan, nisi kot baŋŋa vagu hiɗi siy-slokŋa, ma may hay Asiriya, hiɗi ma maram ay hay jokona vi Kittim pa.

⁷Sligar ma dol lumayna koti hiɗi baraw direŋŋa, ma may Egipte pana, ma tuwam ɗoyna, nam muɗi mi drapona vagu; sligar-purpella hiɗi sligar ma slaw keŋŋa ma maramay kay jokota Elisa pana, nak kot tantana vag kayn hiɗi namu.

⁸Sum sa hay Sidon hiɗi sum sa hay Arvad kayn si sa gi lumayna vagu, nisi sa wi yal lumayna ŋolo. Sa yalla ŋolo hayag nak Tirus kayni si sa ɗek sa gi lumna.

⁹Sa maariyana vi Gebal hiɗi sa wi yal lumayna ka hayagu, kay kot ir lumayna; lumay ma goloŋ hay niy-lumna, hiɗi sa gi-lumayna kaf ka hay nagata vagu, kay ci way sle ma gusna vagu.

¹⁰Nisi sa hay Persiya, hay Lud hiɗi Put ka li lop jar sojena vagu, nisi kayni si sum sa wi duura; marayta hiɗi bogorayna visiya nisi gaɓam kulo hayagu, nisi ka vulag suburta.

¹¹Gurona vi Arvad hiɗi sa wi duura vagu ka ŋuyi kat gulmunna vagu, sa ŋomda ka zlaray kay yam simdira vagu, nisi ka gaɓ marayna visi kulo kat gulmunna vagu. Nisi ka muɗag jifiy suw asa.

¹²Nisi sa hay Tarsis li filiw hiɗi naku, kuɗ slena vag kaf ma ka hay ɓag ŋolla; nisi ka hob lumuna vag hiɗi doorona, kawayna, eteŋŋa hiɗi plomna.

¹³Yavan*, Tubal hiɗi Mesek li filiw hiɗi naku; sa gorvona hiɗi wayna, nisi muɗsi hiɗi sle ma filiwna vagu.

¹⁴Nisi sa hay Togarma ka hob lumuna vagu hiɗi kulumayna, sa ɓe kulumayna hiɗi kulumay-kurona.

¹⁵Gurona vi Dedan li filiw hiɗi naku, sle ma gusna vi jokon ŋolo jikis hay ɓag nak pa; nisi wurakag galla vagu hiɗi siy-slokŋa, hiɗi gu-ɦooyna kaw.

¹⁶Siriya li filiw hiɗi naku, kuɗ slen ma gusna vag ma ka dak-dakŋa, nisi hob lumuta vagu hiɗi hiɗiy-slawna, hiɗi purpella, hiɗi sligar ma ciliyna, hiɗi baraw direŋŋa, hiɗi dana-gumna, hiɗi hiɗiy-rubisna.

¹⁷Yuda hiɗi nagata vi Israyel li filiw hiɗi naku, nisi ka muɗ hiɗi naku alkamare ma hay Minitna, cayna, yumna, mula hiɗi urdi ma kor tuwna.

¹⁸Damas li filiw hiɗi naku, na' ka muɗ slena va' ma koti dak-dakŋa hiɗi naku, na' ka marag vinna ma hay Helbon, hiɗi ɗuŋus haɓayna vi mirisna.

¹⁹Vedan hiɗi Yavan*, fokay hay Uzal pa, ka hob lumuta vagu hiɗi kaway ma zliyna, hiɗi cerew ma his fayna, nisi ka muɗum hiɗi naku.

²⁰Dedan li filiw hiɗi naku, hiɗi sle ma gan kulumayna.

²¹Arabiya hiɗi muliyana vi Kedar kaf li filiw kayni, jik kag naku. Sumuna vagu sa li filiw guro fok-dimina, fok-gamalana hiɗi fok-ŋekŋa ka goy hay nagata visiya.

²²Sum sa li filiwna vi Saba hiɗi Rayema li filiw hiɗi naku, nisi ka hob lumuna vagu hiɗi aromatna ma ŋaan kafe, hiɗi hiɗiy ma ŋaan kuɗ jafam kaf, hiɗi ora kaw.

²³Haran, Kanne hiɗi Eden, sum sa li filiwna vi Saba, vi Asiriya, vi Kilmad kaf, li filiwn hiɗi naku;

²⁴nisi lum filiw hiɗi naku mi sle ma ŋaana, sligar ma goɗayna, sligar ma ciliyna, sligar kuɗ jafamu jafamu, zigew ma junina ma slewayna, kaf kay gut filiwna vagu.

²⁵Lumayna vi Tarsis ka yaw jakŋa vagu, nak hobay hiɗi farayna hiɗi gajijita, goy way niy-lumna.

²⁶Sa gi lumna vagu kalagawa goy way niy-lum ma ŋolla, simeɗ ma gal kuɗuwna kusagawa goy way niy-lumna.

²⁷Farayna vagu, lumuna vagu hiɗi slena vag ma nak gusum goyna, sum sa hay lumayna hiɗi sa ɗek lop lumayna, nisi sa kot tuw lumayna, sa ci way slena vag ma gus goyna, sumuna vag sa wi duura kaf sa ka hay nagata vagu, jar sa tokŋa sa ka hay nagata vagu, nisi kaf ma cuk gaa way niy-lumna, hay buur ma nak ma nig gaa'a.

²⁸Hay li ma sa ɗek lop lumna pat ciriyn ɗawni, sum sa kel niy-lumna tuwsi ma visi bat-bat';

²⁹nisi kaf sa gi lumayna ma jik gaa hay lumayna pa, sa goloŋ hay lumayna, sa ɗek yal lumayna goloŋ hay niy-lum ma ŋolla kaw. Nisi ma lak kulo kay nagata;

³⁰nisi ma di delsi goy kagu, ma pat tiy ma galakŋa; nisi ma ko butuwn kulo kisiya, ma gi tuwsi gaa hay butuw-kuna;

³¹nisi ma wel yisi goyo kuɗag naku, nisi ma cuk sligar bolla tisiya, ma tiy kagu hiɗi diksi noŋ pete, nisi ma tiy tiyna vi do'olla.

³²Hay tuw-tita visiya, nisi ma gi nul ma tiyna kagu, nisi ma yor tuwsi kuɗagu ala: Nagata ta ŋray hiɗi nak Tirus ti tarige? Nagata ta ki hoyok-ziyn namna, ma ɓulakay goy way niy-lumna ki kayn nala tayɗi.

³³Hay li ma sle ma gusna vagu kali goy hay niy-lumna pa, nak ka hob jaf-sumun ŋolo, kuɗ slena vag ma ka dak-dakŋa hiɗi farayna vagu, nak ka muɗ muliyan sa hay nagatna faray ŋolo.

³⁴Wulini hay li ma nak kusi goyo kay niy-lumna, jakŋa vag ma gus goyna hiɗi sle ma hay lumayna koy goloŋo hay niy ma zulla, hiɗi nak lay.

³⁵Sum sa ziy kay jokon kaf hini hay hawta kuɗag naku, muliyana visiya muɗi nari, irsi zoɓi gaa'a.

³⁶Sum sa li filiwna ka feɗ kuɗag kuy-kuy', naku mi va ma wir tuw sa'a, sa as kay wag loɗi.