Read Masana EZEKIYEL 28 Bible Online

EZEKIYEL 28 - Masana bible

EZEKIYEL 28

¹Ma-Vatɗina ka di yoboyn tan ala:

²Goora vi sana, daŋ tam mulla vi Tirus ala: Bum-Sumuna Ma-Vatɗina ka di taŋ ala: Kay suburta kalawa hayaŋu, naŋ di ala nanu mi Lawna. Nan musi kay zlamda-mulda vi muliyana, goy way niy-lumna. May naŋu, naŋ mi sa'a, may mi Lawnɗi, naŋ var ala varta vaŋu ti varta vi Lawna.

³Ɗuwaŋ tige naŋ yali suw Daniel, ŋayayta ta kiraŋ jufunu tayɗi.

⁴Hiɗi yalla vaŋu hiɗi yamda-wida vaŋu, naŋ tok faraynawa, naŋ fi doorota hiɗi orawa hay timgilla vaŋu.

⁵Hiɗi yalda vaŋ ta ŋolda ta li filiwna, naŋ muɗ farayna vaŋawa ŋolo, kuɗ farayna vaŋu dikaŋ muɗi subur tuwamu.

⁶Kuɗ kayni, Bum-Sumuna Ma-Vatɗina di ala: Kay naŋ ŋra varta vaŋu hiɗi varta vi Lawna,

⁷fay tuwayawa! Nan min hin sum sa pulla co duraŋu, sum sa ɦawla suw jaf-sumun kaf, nisi ma pat kew-gaferaŋa visi goy kat yalda vaŋ ta asayta, nisi ma muɗ wileta vaŋ goy va waa'a.

⁸Nisi ma gaŋ gaa hay zul ma wiŋŋa, naŋ ma mit mitta vi sum sa sumun koli kisina. Goy way niy-lumna.

⁹Vok ir sa ma caŋ mati, naŋ as di ala nanu mi Lawna lo su? Naŋ ma hin ɗawn mi sa dok-dok may mi Lawnɗi, hay ɓam nam ma caŋ goyo.

¹⁰Naŋ ma mit mitta vi sa bay ka-gosayna, hay ɓam sum sa pulla. Kay nanu, nan daawa. Din mi Bum-Sumuna Ma-Vatɗina.

¹¹Ma-Vatɗina ka di yoboyn tan ala:

¹²Goora vi sana, gaŋ nulla kay mulla vi Tirus! Naŋ ma di talam ala: Bum-Sumuna Ma-Vatɗina ka di nala: Naŋ ay tun soona vi jifiyta, naŋ ay hobay hiɗi yalda, jifiyta vaŋ asay ŋaa'a ŋolo.

¹³Naŋ ay hay Edena, jardeŋŋa vi Lawna, naŋ ay cuki hiɗi sligar ma ŋaana kuɗ jafam kafe, hiɗiyn sardowan, hiɗiyn topaz, diyamaŋŋa, hiɗiy krisolitna, hiɗiyn oniks, hiɗiyn yaspis, hiɗiyn safir, hiɗiy ma slawna, hiɗiyn emerode hiɗi ora, darayna vaŋu hiɗi zlekemna ay sunaŋu, kotiya kay buur ma naŋ ini hayna.

¹⁴Naŋ ay mi kerubena* ma ŋomda, ma gilaŋatan goy meɗiya. Nan musaŋu, naŋ ay kulo kay hiɗiyta peldetta vi Lawna, naŋ ay poy jar hiɗiy ma kut talam slaw keŋŋa.

¹⁵Naŋ ay ɗigere hay hagata vaŋu, tun caw tam buur ma inda vaŋ pa, ta-ta co tam buur ma bay-ɗigerta kal hay dikaŋu.

¹⁶Hiɗi ŋolda vi filiwna vaŋu, naŋ hobawa hiɗi ɦawlata, naŋ li sulukawa; nan digiɗaŋ goy kay hiɗiyta vi Lawna, nan vataŋ goyo, naŋ kerubena ma ŋomda, nan min digiɗaŋ goyo jar hiɗiy ma kut talam slaw keŋŋa.

¹⁷Dikaŋ muɗi subur tuwamu kuɗ jifiyta vaŋu, naŋ ɓulak yalda vaŋawa hiɗi wileta vaŋu. Nala nan gaŋ gaa kay nagata, nan vulaŋawa goy hay ɓam muliyana kay nisi ma peɗeŋu.

¹⁸Kuɗ joota vaŋ ta ŋol dak-dakka, kuɗ bay-ɗigerta vi filiwna vaŋu, naŋ muɗ liyn ma peldetna vaŋawa goy mi liyn ma waa'a; nan min kal kuta ta ŋalaŋga ay goy hayaŋ pa, nan min muɗaŋ goy butuw-kuna gaa kay nagata, kir nisi sa ɗuwaŋ kafe.

¹⁹Nisi kaf sa waŋu jar jaf-sumuna, ka muɗi ɦuyum' kuɗaŋu; naŋ ma muɗ mi va ma li sa ɦuyum', naŋ ma vatis goy noŋo.

²⁰Ma-Vatɗina ka di yoboyn tan ala:

²¹Goora vi sana, muɗaŋ iraŋ kir Sidon, daŋ vun-jobta kata'a.

²²Naŋ ma di'e: Bum-Sumuna Ma-Vatɗina ka di ala: Fay tuwayawa Sidon! Semda van ma tiy kalaf hayagu, nala sumun ma wi ala nanu mi Ma-Vatɗina, hay li ma nan ma hob vun kitata van kat Sidon. Semda van ma li goy peldete jarsiya.

²³Nan ma gi bakmaran jarsiya, nan ma jaŋsi busuwsi goy hay hagana visiya. Sa mitina ma yak gaa'a jarsiya hiɗi kew-gaferaŋa, ma ka co calsiya hay galsi kafe. Nala nisi ma wi ala nanu mi Ma-Vatɗina.

²⁴Nala nisi ma muɗ kay ziyna vi Israyel mi zigiy ma ka tuw sa goy loɗi, zigiy-olla loɗi kaw, jar nisi kaf sa ŋuyi galsiya sa pansiya, nala sumun ma wi ala nanu mi Bum-Sumuna Ma-Vatɗina.

²⁵Ki kayn nala Bum-Sumuna Ma-Vatɗina di ala: Hay li ma nan ma tok jafna vi Israyella ay goy jar sa nisi meray goy jarsin pa, nisi ma li semda van goy peldete jar jaf-sumuna, nisi ma lak hay nagata visiya, nagata ta nan vula' mi sa ma sunda vanu Yakub.

²⁶Nisi ma lak hayam hiɗi sle'ta, nisi ma in ziyna, nisi ma pi gulda-guldana; nisi ma lak ziy hayam hiɗi sle'ta, hay li ma nan ma hob vun kitata kat nisi sa ŋuyi galsiya sa ka pansiya. Nala nisi ma wi ala nanu mi Ma-Vatɗina Lawna visiya.