Read Masana EZEKIYEL 29 Bible Online

EZEKIYEL 29 - Masana bible

EZEKIYEL 29

¹Hay buur ma doogo yam ma'na vi til ma doogona vi busata doogota, Ma-Vatɗina ka di yoboyn tan ala:

²Goora vi sana, muɗaŋ iraŋ kat Farawn mulla vi Egipte, daŋ vun-jobta kalamu, kay sum sa Egipten kaf kaw.

³Naŋ ma di ala: Bum-Sumuna Ma-Vatɗina ka di ala: Fay tuwayawa, naŋ Farawn mulla vi Egipte, naŋ hurum geŋgeleŋŋa, naŋ ma buri way niy-lumna vaŋu, naŋ ma di ala niy-lumna Nil nam vanu, kot tuwan mi nanu.

⁴Nan min cuk jaɓn gaŋaŋu, nan min sliraɓ kuluf ma goloŋŋa kulo taŋu, nan ma niraŋay goy way niy-lumna pa, hiɗi kuluf ma goloŋ hay niyna vaŋ kaf, ma sliraɓay kulo tam ɓulokoŋu.

⁵Nan ma gaŋ goy hay fulda, naŋu hiɗi kuluf ma goloŋ hay niyna vaŋ kafe. Naŋ ma nig goy hay sinena, sa as slaŋ kuloɗi, as tokaŋ kuloɗi lay; nan ma vulaŋ goy a ti'e mi muur ma gaa kay nagata hiɗi layayn ma dukalawna.

⁶Sum sa hay Egipte kaf ma wi ala nanu mi Ma-Vatɗina, kay gutda ta nisi gut sa Israyella ŋray ca ki sa deŋ tam cerewna nala.

⁷Hay li ma nisi slaŋ hay ɓisiya, naŋ kus goyo, naŋ ɦawsi pelsiyawa goyo; hay li ma nisi deŋawa taŋu, naŋ kusawa goyo, naŋ buratsi fursiyawa.

⁸Kuɗ na'ta kayni, Bum-Sumuna Ma-Vatɗina ka di ala: Fay tuwayawa! Nan min mar kew-gaferaŋa katgiya, sumuna vigiya hiɗi farayn kaw nan min cisi goyo.

⁹Nagata Egipte ma hin goy ɦawa hiweŋ', na' ma ɓulak goyo, nala sumun ma wi ala nanu mi Ma-Vatɗina. Kay nam di ala niy-lumna Nil nam vanu, ala kot niy-lumna Nil mi nanu.

¹⁰Kuɗ na'ta kayni, fay tuwayawa hiɗi naŋu! Hiɗi niy-lumna vaŋu kaw, nan ma ɓulak nagat Egipte goyo, liyn ma ɓulakay goyna ma hini goy hiweŋŋa, fokay hay Migdol pa ta-ta hay Siyen hay jaara vi nagat Etiopiya.

¹¹Sem sa as jik haya' loɗi, sem muur as jik haya' loɗi, na' ma hin goy ir busat dok-fiɗi bay sa li ziy haya'a.

¹²Nan ma hin Egipte goy ɦawa hiweŋ' ki naga ma hini goy ɦawa hiweŋŋa nala, hoyok-ziyna va' ma ɦo gaa'a, ki naga hena ma ɦoy gaan nala ir busat dok-fiɗi. Nan ma mer sum sa Egipten goy jar jaf-sumuna, nan ma mersi goy hay nagat tara'a tara'a.

¹³Ki kayn nala Bum-Sumuna Ma-Vatɗin di'e: Hay li ma busat dok-fiɗi vatawana, nan ma hot tap yam sum sa Egiptena, goy jar sum sa nisi meray goy jarsin pa.

¹⁴Sa gorvona vi Egipte nan ma hotsiyaya, nan ma hotsiyay hay nagata vi Patros,[9] nagata ta nisi mays goy haya' pata, nisi ma tun mulda ta ya' hotay gaata;

¹⁵nisi ma li ɗawni si sa yisi gaa hotay suw mulda kafe, nisi ma muɗ ŋol kay jaf-sum sara loɗi, nan ma kiɗasi goyo, kay nisi ma kol kay jaf sara loɗi.

¹⁶Mulda na'ta muɗ ɗawni, ti mulda ta sa Israyella ma tun ŋalda visi ka' loɗi, sum sa Israyella ma kal hay sulukŋa loɗi, hay li ma nisi job gutda vi sa Egiptena loɗi, ki kayn nala nisi ma wi ala nanu mi Bum-Sumuna Ma-Vatɗina.

¹⁷Hay buurta jewta vi til ma jewna, hay busata dok-ma' yam siɗiyata, Ma-Vatɗin ka di yoboyn tan ala:

¹⁸Goora vi sana, Nebukadnesar mulla vi Babilon tun lop ma dono kay sojena valamu, kay dur Tirus, sojena valam kaf yisi kulot goyo, pelsi tun toŋoroŋo kaw, may nam fi fayta hay Tirus noŋɗi, namɗi lay, sojena valamɗi lay, hay lop ma nam lum kata'na.

¹⁹Kay kayni Bum-Sumuna Ma-Vatɗina ka di ala: Fay tuwayawa! Nan vul nagata Egipte mi Nebukadnesar, mulla vi Babilon; nam ma yaw farayna, nam ma vurumum kaf, nam ma ti slen ɓuraŋi, kayni ma li ɗawni mi wurakŋa vi sojena valamu,

²⁰kay wurakŋa vi lop ma nam lum kat Tirusna, nan min vulum Egipte, kay sumuna valam li lop kayni ir man nanu. Din mi Bum-Sumuna Ma-Vatɗina.

²¹Hay buur namna ɗawni, nan ma wul donota vi jafna vi Israyel, nan ma mal vunan goy jarsiya; nala nisi ma wi ala nanu mi Ma-Vatɗina.