Read Masana EZEKIYEL 3 Bible Online

EZEKIYEL 3 - Masana bible

EZEKIYEL 3

¹Nam di tanu: Goora vi sana, mutaŋ va ma naŋ fumna, mutaŋ ɗerwel ma ɗutin kayni, naŋ ma tuɗ law tam jafna vi Israyel.

²Nan mal vunan goyo, nam vulan ɗerwel namna hay vunanu, nan mutumu.

³Nam di tanu: Goora vi sana, taŋu, hobaŋ hayaŋu hiɗi ɗerwel ma nan vulaŋgin kayni. Nan mutumu, nam jibet ki yumda nala hay vunanu.

⁴Nam di tanu: Goora vi sana, tuɗaŋ kat jafna vi Israyel, naŋ ma disi goboyna vanu.

⁵Kay nan gaŋ kayni may kat sum sa vunna visi zulɗi, tam sum sa vunna visi hum lopoɗi kaw, may nan gaŋ kayni kat sa Israyella.

⁶Nan gaŋ kayni may kat sum sa ŋol dak-dak sa vunna visi ir zulɗi, sum sa naŋ as hum ɓakŋa visiɗinɗi. May nan gaŋ kayni kat sum nisina, nisi ma humaŋu.

⁷May jafna vi Israyel ma as humaŋɗi, kay nisi min humanɗi kaw; kay jafna vi Israyel kaf yisi ɗeŋe, diksi so'otaya kaw.

⁸Wulin kayni, nan min so'otaŋu, kay naŋ ma ŋra tuwaŋ hiɗi nisiya, nan min muɗaŋ yaŋ ɗeŋe kay yaŋ ma liys ɗeŋ kisi nisi nala.

⁹Nan ma muɗaŋ yaŋ ɗeŋ ki hiɗiy diyamaŋŋa nala, ɗeŋ ŋolo suw hiɗiyna. Naŋ ma li nar kisiɗi, tuwaŋ ma wiraŋ kisiɗi, kay kayni si jaf-sum sa ŋel-gatta.

¹⁰Nam danu: Goora vi sana, yoboy ma nan di taŋ kayni kaf naŋ ma vum hay dikaŋu, humum hiɗi humaŋ kaw.

¹¹Tuɗaŋ faŋ sum sa yaway goy gorvona, gurona vi sumuna vaŋu. Naŋ ma law tisiya, la nisi humaŋ misiya, hum misiɗi. Naŋ ma disiya, ki kayn nala din mi Bum-Sumuna, Ma-Vatɗina.

¹²Ŋusta slan goyo, hay bugolanu nan hum winek ma ŋolla ka di ala: Suburta tam gajijita vi Ma-Vatɗina, goy hay liyn ma musta valam pa.

¹³Nan hum suwana vi gilaŋat muuriyana, ka ci kat tuwam til-til', suwana vi sem-kekena kaw, hiɗi suwana vi winek ŋolo kaw.

¹⁴Ŋusta tara kepe slan goyo, kal hiɗi nanu. Nan kal kayni iran turkusiya, muɗi ɦiy pek-pek', donota vi Ma-Vatɗina ka li lop hay dikan dono ŋolo.

¹⁵Nan co hay Tel-Aviv, goy vi sum sa yaway gorvona sa ka lakay goboy hiɗi niy-lumna Kebar, hay liyn ma nisi ka lakay hayna; ɗawni nan musi ir buur siɗiya, musi jarsi kayni hiɗi sutiyan toy kaɗa-kaɗa'.

¹⁶Co hay buurta siɗiyat kayni, Ma-Vatɗina di yoboyn tan ala:

¹⁷Goora vi sana, nan min tunaŋ ki sa ma ŋomda nala kay ŋom ziyna vi Israyel. Naŋ ma hum yoboy ma may goy hay vunan pana, naŋ ma dum goyo hay semda vanu.

¹⁸Hay li ma nan di tam sa ma joonawa ala, awa naŋ ma mita, may la naŋ dumɗi, la sa ma joona naŋ dum kiramu kay nam hin hagata valam ta joota goyɗi, kay suɗ irita valamɗi, sa ma joon kayni ma mit hay bay-ɗigerta valamu, may nan ma jobaŋ busuwna valamu kelaŋu.

¹⁹May naŋu, la naŋ di sa ma joonawa kiramu, may la nam hin hagata valamu ta joota goyɗi, nam ma mit hay bay-ɗigerta, may naŋu, naŋ ma suɗ irita vaŋu.

²⁰La sa ma ɗigera hin ɗigerta goyo, li sle ma gunina, nan ma gan jawt vokomu, nam ma mita. La naŋ may dumɗi, nam ma mit hay sulukŋa valamu. Hum sa as gum kay lop ma ɗigera ma nam lum jewna loɗi, nan ma jobom busuwam kelanu.

²¹May naŋu, la naŋ di sa ma ɗigera kiramu kay nam ma li suluk loɗi, la nam li suluk loɗi lay ni, awa, nam ma mus iriya, kay naŋ dum kiramu, naŋ kaw, naŋ ma suɗ irita vaŋu.

²²Ɗawni lo, Ma-Vatɗina kal donota valam hayanu, nam di tanu: Fokaŋ kulo'o, kalaŋ goy hay lokŋa, nan min law taŋu.

²³Nan fokay kulo'o, kali goy hay lokŋa, nan wi gajijita vi Ma-Vatɗina ka colay zaw, ki nan wum goboy hiɗi niy-lumna Kebar nala. Ki kayn nala nan dab vokan gaa kay nagata.

²⁴Ŋusta kal hayanu, na' colan kulo'o kay senu. Ma-Vatɗina law tanu di'e: Tuɗaŋu dukaŋ vunaŋ kalaf hay ziyda vaŋu.

²⁵May naŋu goora vi sana, nisi ma cuk zigewn kataŋu, nisi ma junaŋ hiɗi zigewna. Nala naŋ ma kali goy jarsiɗi.

²⁶Nan ma zlubakaŋ sinaŋ gaa'a, kay vunaŋ ma muɗ dugunu, kay naŋ ma fi kay lawsi kirsiɗi, kay nisi kayni si jaf-sum sa ŋel-gatta.

²⁷May hay li ma nan di va taŋu, nan ma malaŋ vunaŋ goyo, kay naŋ ma di tisiya ala: Bum-Sumuna Ma-Vatɗina di ki kayn nala. Sa ma min huma, hum malamu, sa ma min humɗi, hin malamu, kay nisi kayni si jaf-sum sa ŋel-gatta.