Read Masana EZEKIYEL 31 Bible Online

EZEKIYEL 31 - Masana bible

EZEKIYEL 31

¹Hay buurta jewta vi til ma ɦidina vi busata doogo yam kepta, Ma-Vatɗina ka di yoboyn tan ala:

²Goora vi sana, daŋ tam Farawn mulla vi Egipte, hiɗi sumuna valam sa kuɗum gu' gu'na, hay ŋolda vaŋu naŋ ŋra hiɗi gige?

³Humaŋu, Asiriya mi gu gami hay Libaŋ; ɓam-guna valam ay ŋaa'a ŋolo, humam goɗay ŋaa'a ŋolo, zok-guna valam wuli kulo fiyoko, sin-guna valam ka wuli kulo fiyoko.

⁴Niyn wulum kulo mi namu, zul ma wiŋŋa wulum kulo fiyoko, niy-lumna ka riŋ goyo hay liyn ma nam ka piy hayna, niyn ka jaŋ goy kuɗ guwayna valam ma hay sinen kafe.

⁵Kuɗ na'ta kayni, fiyokka valam suwi kulo kay gu ma hay sinen kaf, ɓam-guna valam biya goy ŋolo, humam ɓet goy ŋolo, kuɗ niy ma ka riŋ kuɗum ŋolla.

⁶Layayn ma dukalawn kaf ka tun ziyna valam hay humamu, muuriya ma fulla kaf ka vuɗ gurona valam gaa kuɗumu, jaf-sumun ŋolo li ziy gaa kuɗ ŋusamu.

⁷Nam jifiy ŋaa'a ŋolo hiɗi ŋolda valamu, hiɗi gilaŋatam ma ɓeti goy ŋolla, kay so'olom kali gaa hay niy ma ŋolla.

⁸Gu-gamna ma hay jardeŋŋa vi Lawna may li ŋus kalamɗi, ɓam gu-siprena may ŋra hiɗi ɓalamɗi, hum gu-riginna may ŋra hiɗi humamɗi. Gu mara'a ma hay jardeŋŋa vi Lawna ma ŋra hiɗi nam kuɗ jifiyta valamu mayɗi.

⁹Nan lum jifiya kuɗ ɓalam ma ɓetay goy dak-dakŋa, nala guway ma hay Edena, hay jardeŋŋa vi Lawna muɗ hunay talamu.

¹⁰Kuɗ na'ta kayni Bum-Sumuna Ma-Vatɗina ka di'e: Kay mige dikaŋ li firiya kay fiyokka vaŋu, kay sineŋ kali ta-ta kulo jar ɗugulla, kay suburta kali hay dikaŋu kuɗ fiyokka vaŋu,

¹¹kuɗ kayni nan vulaŋ goyo, hay ɓam sum sa ŋom jaf-sumuna, nisi ma dab ɦiyda visi goy talamu, nan digiɗimawa goyo.

¹²Sum sa pulla, sa ɦawla suwa jar jaf-sumuna kaamawa goyo, noyomawa goyo, humam yakawa gaa kay hiɗiyna, hay liyn ma lokŋa kaf kaw, hum-guna valam kusawa goyo, cukawa goy gaa hay liy ma korkocona vi nagat kafe; sum sa hay nagat kaf yawawa goy kuɗ ŋusamu, nisi noyomawa goyo.

¹³Layayn ma dukalawn kaf cooya, lakay hay humam ma kaays goy gaana, muuriyan ma ful kaf in ziyna valamawa hay ɓalam ma daɓayna.

¹⁴Ki kayn nala, gu mara ma goboy tam niyna, ma as wul fiyok ki kayn nala may loɗi, as wul ta-ta kulo jar ɗugulla loɗi kaw; nala, gu-ma'asna ma ka fi niyna ma as wul kulo fiyok ki kayn nala mayɗi, kay nam kaf vuli goy tam mitta, gaa hay liyn ma zulla vi nagata jar sum-wurana, jar nisi sa jik gaa hay zul ma wiŋŋa.

¹⁵Ki kayn nala, Bum-Sumuna Ma-Vatɗina di'e: Hay buur ma nam jik gaa hay liyna vi sa mitina, nan ti do'olla, nan duk vun zul ma wiŋŋa kalam namu, nan cak vun niy-lumna; niy ma ŋulona nan cakam vunamu; kuɗum namu nan muɗ Libaŋ jufunu, gun ma hay fulda kaf so goyo kuɗum namu,

¹⁶hiɗi suwana vi ni-gaata valamu, nan wir tuw jaf-sumuna, hay li ma nan kalam gaa hay zulla vi sa mitina, hiɗi nisi sa jik gaa hay zulla; gun ma hay Edena kaf fi teŋ-irta hay liyn ma zulla vi nagata. Gun ma ŋaa'a suwum hiɗi ma jifiya kaw hay Libaŋ, gun kaf ma ka fi niyna.

¹⁷Nisi kayni kaw jiki gaa hiɗi namu hay liyna vi sa mitina, kat nisi sa mit goyo hiɗi kew-gaferaŋa; nisi sa ay si gilaŋatamu, nisi ay lakay gaa kuɗ ŋusamu kaw jar jaf-sumuna.

¹⁸Jar gu ma hay Edena, gajijita vaŋu hiɗi ŋolda vaŋu ŋra hiɗi gige? Nisi ma jikaŋ gaa hay liyn ma zulla vi nagata hiɗi gu hena ma hay Edena kaf. Naŋ ma bur gaa'a jar sa bay ka-gosayna, hiɗi nisi sa kew-gaferaŋa vatsi goyna. Kayni mi va ma min li tam Farawn hiɗi sumuna valam sa gu' gu'na. Din mi Bum-Sumuna Ma-Vatɗina.