Read Masana EZEKIYEL 33 Bible Online

EZEKIYEL 33 - Masana bible

EZEKIYEL 33

¹Ma-Vatɗina ka di yoboyn tan ala:

²Goora vi sana, daŋ tam sum sa hay jafna vaŋu ala: Hay li ma nan hin kew-gaferaŋa co kay nagata, la sum sa hay nagata sli sa mara jarsiya, tunum ma ŋomda,

³la san kayni iram wi kew-gaferaŋa ka tuɗay dur nagata, la nam buw togolomna di sumun goy jewe,

⁴la san hum buwna vi togolomnawa, may nam min tun ŋalamɗi, la kew-gaferaŋa coyawa cumawa ni, busuwam ma nig kalam nam kay tuwamu.

⁵Kay nam humi buwna vi togolomna, nam min tun ŋalamɗi, nala busuwam ma tun kelem nam kay tuwamu. May sa ma tun ŋalamawana ma suɗ irita valamu.

⁶La sa ma ŋomda wi kew-gaferaŋ ka tuɗaya, may nam min buw togolomnɗi, la sumun may humi goy jewɗi, la kew-gaferaŋa coowa, nam ci sa'a, san kayni mit ɗawni kuɗ bay-ɗigerta valamu, may nan ma jobom busuwam tam sa ma ŋomda.

⁷Naŋ goora vi sana, nan min tunaŋ ki sa ma ŋomda nala kay jafna vi Israyel, naŋ ma hum yoboy ma may goy hay vunan pana, naŋ ma disit goyo hay semda vanu.

⁸Hay li ma nan daawa tam sa ma sulukŋa ala: Sa ma sulukŋa, awa naŋ ma mita, may la naŋ di sa ma sulukŋa kiramu kay poyta valamɗi; sa ma joona namna ma mita kuɗ bay-ɗigerta valamu, may nan ma jobom busuwam vunaŋ naŋu.

⁹May naŋu, la naŋ di sa ma joon kiramu kay nam cal goy hay poyta valam ta joota, may la nam cal goy hay poyta valam ta jootɗi, nam ma mit hay bay-ɗigerta, may naŋu naŋ ma suɗ ciwta vaŋu.

¹⁰May naŋu, goora vi sana, daŋ tam jafna vi Israyel ala: Nigi di ala jiw-zlata vuma'a hiɗi sulukŋa vuma'a ka kuma numa'a, sutayma toy wulin kayni kuɗum namu; numa lak iri ɗawn laktige?

¹¹Yo! Naŋ ma disi ala: Nan ka iriya! Din mi Bum-Sumuna, Ma-Vatɗina. Minda van kayn ala sa ma joon ma mitaɗi, nan min kayn ala nam muɗ varta valamu mus iriya kaw. Hotgiyaya, hotgiyay bugolgi tam hagata vigi ta joota. Jafna vi Israyel, nigi mitis goy nala ɗawn kay mige?

¹²May naŋu, goora vi sana, daŋ tam sum sa hay jafna vaŋu ala: Hay buur ma sa ma ɗigera li jiw-zlatawa, ɗigerta valamu as butum goyɗi; sa ma joon kaw, hay buur ma nam hin jootawa goyo, joot ta nam la' jewta as bam goyɗi kaw. Ki kayn nala kaw, sa ma ɗigera, hay buur ma nam li jootawa, nam as mus iri kuɗ ɗigerta valam ta jewta loɗi.

¹³La nan di kay sa ma ɗigera ala: Awa, nam mus iriya, -- la nam tun ŋalda valam kay ɗigerta valam ta jewta, li bay-ɗigerta may ni, sa humam as gum kay lopna valam ma ɗigera kep noŋɗi, nam ma mita kuɗ bay-ɗigerta ta nam la'ta.

¹⁴La nan di kay sa ma joon ala awa naŋ ma mita -- la nam ja jaram goy hiɗi sulukŋa valamu, li sle ma gasina hiɗi ma ɗigera,

¹⁵la sa ma joona hot sle ma nam deŋemna goyo, hot vul sle ma nam kulumna goyo, la nam tap kuɗ ɗota ta vul irita, li bay-ɗigertaɗi, san kayni ma mus iriya, nam ma mitɗi.

¹⁶Sa as jak humam kay suluk ma nam lum jewnɗi; kay nam li kuɗ gasita hiɗi ɗigerta, nala nam ma mus iriya.

¹⁷Sum sa hay jafna vaŋ ka di ala: Hagata vi Bum-Sumuna tay ŋaaɗi. May ŋaaɗi kayni ti hagata visi nisiya.

¹⁸La sa ma ɗigera cal goy hay ɗigerta valamu, li bay-ɗigerta, nam ma mit kuɗ na'ta.

¹⁹La sa ma joona cal goy hay hagata valam ta joota, la nam li gasita hiɗi ɗigerta, nam ma mus iriya kuɗ kayni.

²⁰Nigi di ala hagata vi Bum-Sumuna may ŋaaɗi! Nan ma ka kitat kigi ɗawni gigekaw kuɗ poyta valamu valamu, nigi jafna vi Israyel.

²¹Hay buurta vaslta vi til ma doogona vi busata doogo yam ma'ta hay li ma numa ay gorvo'o kayni, sa mara kep ma piray goy hay Yerusalem pa co tanu, ka di tan ala: hoyok-ziyn Yerusalem sliya.

²²Donota vi Ma-Vatɗin ay kali hayanu jew cota vi sa ma piray goyna, Ma-Vatɗin malan vunan goyo hay li ma nam co katanu hay graw culumta. Vunan ay mali goyo, nan may dugunu hay na'taɗi.

²³Ki kayn nala Ma-Vatɗina ka di yoboyn tan ala:

²⁴Goora vi sana, nisi sa li ziy jar hoyok-ziy ma ɦoy gaana hay nagata vi Israyel ka di ala: Abraham ay valam kep kaw nam sli nagat kayni, nay sa kuɗ tuway ŋolla naga na'ta vuli may naya.

²⁵Awa ŋaa'a! Daŋ tisiya: Bum-Sumuna Ma-Vatɗina ka di ala: Nigi ti tina vigi hiɗi busuwna, nigi poŋ irgi kulo vok lawayna vigi ma waana, nigi ɦok busuwn goyo. Nala nigi ma lak hay naga na'ta su?

²⁶Nigi tun vida vigi kay kew-gaferaŋa vigiya, nigi li va ma liwisna, gige gige jargiya bur hiɗi cata vi sugolomna. Nala nigi ma lak hay naga na'ta su?

²⁷Naŋ ma di tisi ala, Bum-Sumuna Ma-Vatɗina ka di'e: Nan ka iriya, nisi sa ka jar ziy ma ɦoy gaana kew-gaferaŋa ma calsi goyo; nisi sa ka goy hay fulla nan ma vulsi mi muur ma siyna kay mutsi goyo; nisi sa ka hay liy ma donona hiɗi zul hiɗiyna bakmaran ma cisi goyo.

²⁸Nan ma hin nagat goy va' kep, muɗa' goy hiweŋ', donota va' ta na' subur tuwa' hiɗi na'ta ma vat goyo, hiɗiyna vi Israyel ma hin goy hiweŋ', sa as jik kalam loɗi.

²⁹Nisi ma wi ala nanu mi Ma-Vatɗina, hay li ma nan ma hin nagat goy va'a, muɗa' goy hiweŋ', kuɗ liwista kaf ta nisi li'e.

³⁰Naŋu, goora vi sana, sum sa hay jafna vaŋu tok tuwsi gaa kat gulumunna, kat vun-galana vi ziyna visi kaw, nisi law tuwsi kaŋu jar-tuwsiya, gigekaw di tam ɓasulumna ala: Nigiyaya tuɗay humay yoboyna vi Ma-Vatɗina ma nam min di taya.

³¹Nisi tok tuwsi ɦini-ɦini' co kataŋu, nisi mol gaa vokaŋu, nisi hum yoboyna vaŋu, may nisi li kuɗumɗi, kay nisi li kayn kuɗ yoboy ma jibetna ma hay vunna, may diksi gara' kayn ti fita.

³²Naŋ muɗi kirsi ki sa ma gi nul jifiya, ma delem sawali ma wi yal nulla nala. Nisi hum yoboyna vaŋu, may nisi li kuɗumɗi.

³³Hay li ma slen namna kayni coowa, -- awa nam coowa kaw, -- hay na'ta nisi ma wi ala sa ma jobta li ays jarsiya.