Read Masana EZEKIYEL 34 Bible Online

EZEKIYEL 34 - Masana bible

EZEKIYEL 34

¹Ma-Vatɗina ka di yoboyn tan ala:

²Goora vi sana, daŋ vun-jobta kat sa ŋomda vi Israyel. Naŋ ma di vun-jobta kat sa ŋomda ala: Bum-Sumuna Ma-Vatɗina ka di ala: Joot kay sa ŋomda vi Israyel sa ŋomom mi tuwsi nisiya. Sa ŋomda may ŋomom mi fok-diminɗi su?

³Nigi tigi mul-sliwna, nigi cuki hiɗi mirisna, fok ma ɗorayna nigi ŋatamawa goy ɗifini, nigi min ŋom fok-diminɗi.

⁴Ma maŋayna nigi min vulum donotɗi, ma moyna nigi min vulum gurgunuɗi, ma tuwam kaay goy milla nigi min jun vun milla valamɗi; ma viyi goyna nigi min hotomayɗi, ma bay goyna nigi min garamɗi, may nigi ti mul kalamu hiɗi dono'o, hiɗi ɗeŋga kaw.

⁵Nam ay meray goyo kay sa ma ŋomda mayɗi; nam muɗi mi va ma tina vi muuriyan ma siyna hay fulda kaf, nam ay meray goyo.

⁶Fok-dimina vanu ay meray goy ɓe'-ɓe' kay yam-hiɗiyn kaf, kulo kay yam liy ma jiŋiliŋŋa kaf, fok-dimina vanu ka meray goy ɓe'-ɓe' kay yam nagat kafe, sa ma kotom tuwam mayɗi, sa ma garam mayɗi.

⁷Kuɗ na'ta kayni humgi yoboyna vi Ma-Vatɗina nigi sa ŋomda.

⁸Kayni ti dita van nanu Bum-Sumuna Ma-Vatɗina, ma irina; kay mige fok-dimina vanu nisi ka vurumumu, kay mige fok-dimina vanu muɗi mi sle ma tina vi muur ma siina ma fulla kaf, kay sa ma ŋomda mayɗi, kay mige sa ŋomda vanu min ŋom fok-diminɗi, kay mige sa ŋomda ŋomom mi tuwsi nisiya, min ŋom fok-dimina vanɗi,

⁹kuɗ na'ta kayni, nigi sa ŋomda, humgi yoboyna vi Ma-Vatɗina.

¹⁰Bum-Sumuna Ma-Vatɗina ka di ala: Fay tuwayawa, nigi sa ŋomda, nan ma job fok-dimina van hay ɓisiya, nan ma hinsi ŋom fok-dimina van loɗi, kay sa ŋomda ma ŋom tuwsi kay tuwsi hiɗi namɗi. Nan ma hulot fok-dimina van goy hay vunsiya, fok-dimina vanu ma muɗ mi va ma tina visi loɗi.

¹¹Ki kayn nala Bum-Sumuna Ma-Vatɗina di'e: Ma ŋom fok-dimina van ɗawni mi nan kay tuwanu, nan ma jikim vok iranu.

¹²Ki sa ma ŋomda jik farana vi fokŋa valamu vok iramu hay li ma nam meray goyo nala, nala kaw nan ma jik fok-dimina van vok iranu, nan ma yawamay goy kafe hay liyn ma nam goy meray hayamna pa, ma li ɗawni hay buur kep vi ɗugulla hiɗi tukŋa.

¹³Nan ma kalsiyay goyo jar jaf-sumuna pa, nan ma toksiyay goy hay nagat tara'a tara'a pa kay marsi hay nagata visiya; nan ma ŋomsi kulo kay hiɗiyta vi Israyel, kuɗ fiyokŋa vi niy-ma-riŋŋa hiɗi liyn ma as li ziy hayam kafna vi nagata.

¹⁴Nan ma ŋomsiya hay liyn ma hatna ka ŋaa'a ŋolo, nan ma vi guruna visiya kulo kay hiɗiyta fiyokka vi nagata vi Israyel. Ɗawni nisi ma tun suku hay guruna ma ŋaana, nisi ma ti hati hay us ma goɗayna kulo kay hiɗiyta vi Israyel.

¹⁵Ma ŋom fok-dimina van ɗawn mi nanu, ma vulum tun-sukka ɗawn mi nanu, din mi Bum-Sumuna Ma-Vatɗina.

¹⁶Nan ma gar na' ta ay goy bayta, ta ay goy viyita nan ma hota'aya, ta tuwa' goy kaay milta nan ma jun vun milla va'a. Ta tuwa' moyta nan ma vula' dono'o. May ma ɗorayna hiɗi ma gaŋeraŋa nan ma cum goyo. Nan ma ŋomomu hiɗi ɗigerta.

¹⁷May nigiya, fok-dimina vanu, fay tuwayawa yo, nan ma ka kitata jar fok-dimina hiɗi fok-dimina, jar fok-gamalana hiɗi fok-ŋekŋa, din mi nan Bum-Sumuna Ma-Vatɗina.

¹⁸Nigi ti hat ma ŋaana, nigi hot tayam gaa kuɗ segi lo, nigi ci niy ma kilira, nigi hot doɓom kulo hiɗi segi lo kaf kayni may asgiɗi su?

¹⁹Fok-dimina van tum kayni mi hat ma nigi tayam gaa kuɗ segina, cum kayni mi niy ma nigi doɓom hiɗi segina.

²⁰Kuɗ na'ta kayni, Bum-Sumuna Ma-Vatɗina di ala: Nan ma ka kitata jar guro fok-dimina ma ɗorayna hiɗi ma ŋokayna.

²¹Kay mige fok-dimi ma ŋokayna nigi dabam hiɗi koŋgiya, hiɗi pelgiya, nigi dabam hiɗi miyokgiya kaw, ta-ta nigi munum goy jiya,

²²nan ma suɗ fok-dimina van goyo, kay nisi ma vurumum loɗi, nan ma ka kitat jar fok-dimina hiɗi fok-dimina.

²³Nan ma tun sa ma ŋomda van kep kisiya, nam ma ŋomsiya, mi sa ma sunda vanu David, nam ma ŋomsiya, nam ma lin mi sa ma ŋomda visiya.

²⁴Nanu, Ma-Vatɗina, nan ma muɗ mi Lawna visiya, sa ma sunda vanu David ma lin mi yerimana jarsiya. Nanu Ma-Vatɗina, nan daawa.

²⁵Nan ma jun bonota ta sle'ta hiɗi nisiya, muuriyan ma siyna nan ma vatam goy hay nagata, nisi ma lak hay sle'ta hay fulda, nisi ma bur goy jar juruna.

²⁶Nisiya hiɗi liyn ma ŋuyi kat hiɗiyna vanu nan ma gi bol kalamu; nan ma gi niynay hay liyna valamu, ma li ɗawni mi niyna vi bolda.

²⁷Gu ma hay sinena ma vuɗ vuɗna valamu, nagat kaw ma vuɗ jafna. Nisi ma lak hay sle'ta hay nagata; nala nisi ma wi ala nanu mi Ma-Vatɗina, hay li ma nan ma kus juk ma pelsin goyo, hay li ma nan ma butsi goy hay ɓam sa lisi gorvona.

²⁸Jaf-sumuna ma vurumsi loɗi, muuriya ma hay nagatna ma mutsi loɗi, nisi ma lak hay sle'ta, sa ma ɦiwirsi ma muɗ may loɗi.

²⁹Nan ma pisi guna ma selem ma tiya; mayta ma fisi hay nagata visi loɗi, sumun ma muɗsi zulo loɗi.

³⁰Nisi ma wi ala nanu Bum-Sumuna Ma-Vatɗina visiya, nan ka hiɗi nisiya, nisiya si sumuna vanu, nisi jafna vi Israyel. Din mi Bum-Sumuna Ma-Vatɗina.

³¹Nigiya, fok-dimina vanu, fok-dimina ma ti hatna vanu, nigiya si sum-wurana, nanu mi Lawna vigiya. Din mi Bum-Sumuna Ma-Vatɗina.