Read Masana EZEKIYEL 35 Bible Online

EZEKIYEL 35 - Masana bible

EZEKIYEL 35

¹Ma-Vatɗina ka di yoboyn tan ala:

²Goora vi sana, muɗaŋ iraŋ kir hiɗiyta vi Seyir, daŋ vun-jobta kata'a.

³Naŋ ma di ta' ala: Bum-Sumuna Ma-Vatɗina ka di'e: Fay tuwayawa! Hiɗiyta vi Seyir, nan meɗ ɓanawa goy kagu, nan ma hinag goy ɦawa'a, muɗag goy hiweŋ'.

⁴Nan ma ɓulak hoyok-ziyna vag goyo, nak ma muɗ goy mi liy ma hiweŋŋa. Nak ma wi ala nanu mi Ma-Vatɗina.

⁵Kay mige sum sa hayagu gawta ta diksita tay vatɗi. Kay mige nigi ci sum sa Israyel goy hiɗi kew-gaferaŋa, hay li ma zlat fisiya, hay liy ma joota liy ŋolo.

⁶Nan ka iriya, din mi Bum-Sumuna Ma-Vatɗina. Nan ma muɗag busuwu; busuwn ma tap kuɗagu; kay mige nak min ka gaw hiɗi busuwnɗi, busuwn ma tap kuɗagu.

⁷Hiɗiyta Seyir nan ma hina' goy ɦawa'a, muɗa' goy hiweŋ', sum sa poy haya'na kaf nan ma vatsi goyo.

⁸Hiɗiyna vi Seyir nan ma hobom hiɗi sum sa mitina; hiɗiyna, lokŋa, zul-hiɗiyna, liy ma korkocona, nisi sa kew-gaferaŋ calsina ma cuk gaa haya.

⁹Nan ma hinag yag goy ɦawa'a ta-ta hay vatɗita, hoyok-ziyna vagu sa as li ziy hayam loɗi, nala nigi ma wi ala nanu mi Ma-Vatɗina.

¹⁰Kay mige nak di ala jaf-sum sa ma'na, nagat ta ma'ta ma muɗ vagu, sumuna vag ma lak haya'a. May Ma-Vatɗina ay zaw.

¹¹Awa ŋaa'a, nan ka iriya, Din mi Bum-Sumuna Ma-Vatɗina, nan ma li tigi ɗawni hiɗi ɦiyda, hiɗi hunayta kaw ŋray ca ki nigi ɗek gawta vigi goyo katsi nisi nala; nan ma ɗek tuwan goy jarsiya, hay li ma nan ma ka kitat kigiya.

¹²Nala nak ma wi ala nanu Ma-Vatɗina, nan humi labara kay ŋulda ta nak ŋul hiɗiyna vi Israyel hiɗi na' kafe, hay li ma nak di ala hiɗiyna vi Israyel hini goy hiweŋ', nam muɗi mi liyn ma farayna vag ti haya.

¹³Nak fokay kulo katanu hiɗi ɓakŋa vagu, sumuna vag di yoboyn ma to'ofayn katanu, humum mi nan kay tuwanu.

¹⁴Ki kayn nala Bum-Sumuna Ma-Vatɗina di'e: Hay li ma nagat kaf ma lak hay firita, nak hayɗin nan ma muɗag goy hiweŋ'.

¹⁵Kuɗ firi ma nak firi ala ziyna vi Israyel hini goy ɦawa'ana, nan ma lag nak nala kaw; yak ma hin goy ɦawa hiweŋ', nak hiɗiyta vi Seyir. Naku hiɗi Edom noŋ kafe; nala nisi ma wi ala nanu mi Ma-Vatɗina.