Read Masana EZEKIYEL 36 Bible Online

EZEKIYEL 36 - Masana bible

EZEKIYEL 36

¹Naŋu, goora vi sana, daŋ vun-jobta kat hiɗiyna vi Israyel. Naŋ ma di ala: Nigi hiɗiyna vi Israyel, humgi yoboyna vi Ma-Vatɗina.

²Bum-Sumuna Ma-Vatɗina ka di ala: Kay mige sa ma gawta ka cen kuɗgi haha! Hiɗiy fiyokŋa namna ma din-dinna muɗi vuma numa'a.

³Awa ŋaa'a, daŋ vun-jobta. Naŋ ma di ala: Bum-Sumuna Ma-Vatɗina ka di ala: Awa, kay nisi mini kay hin nagata vigi goy hiweŋ', mini kay cimgi goyo hay galgi kafe, kay nigi ma muɗ goy vi jaf-sum segena, kay sumun ɓak kigi ŋolo, winek kigi ŋolo kaw,

⁴Awa ŋaa'a, hiɗiyna vi Israyel, humgi yoboyna vi Bum-Sumuna Ma-Vatɗina. Ki kayn nala Ma-Vatɗina ka ɓak tam hiɗiyna hiɗi liy ma jiŋiliŋŋa, tam liyn ma korkocona hiɗi lokŋa, tam liyn ma ɓulakiya, hini goy hiweŋ', hiɗi hoyok-ziy ma hini goyna, ma sum sa ŋuyi galamna vurumumu, cen kuɗum kawna;

⁵Awa ŋaa'a, Bum-Sumuna Ma-Vatɗina ka di ala: Hay hunayta vanu ta ku keŋga, nan law kat jaf-sum segena, kat Edom noŋ kafe kaw, nisi sa ɓuraw nagata vanu jarsiya, hiɗi firit hobay hay diksi cep-cep', hiɗi burahta hay diksiya kaw, kay vurum hatna vi farayna.

⁶Awa ŋaa'a: Daŋ vun-jobta kat nagata vi Israyel. Naŋ ma law tam hiɗiyna hiɗi liy ma jiŋiliŋŋa, tam liy ma korkocona hiɗi lokŋa ala: Bum-Sumuna Ma-Vatɗina ka di'e: Nan ka law tani hay ɦiyda vanu hiɗi hunayta vanu, kay mige jaf-sum segena hobgi hiɗi zulota.

⁷Awa ŋaa'a, Bum-Sumuna Ma-Vatɗina ka di ala: Nanu, nan yi va kanu hiɗi ɓan kulo meɗiya. Awa, sum sa ŋuyi galgina ma hobis hiɗi zulota.

⁸May nigiya, hiɗiyna vi Israyel, ɓigi ma hot goɗa, nigi ma vuɗ vuɗna vigiya kay sumuna vanu sa Israyella, kay slen kayni ka goboy kay co'o.

⁹Wulin kayni nan ka hiɗi nigi yo, nan ma muɗ iran kirgiya, nisi ma muɗ zumgiya, cuk jaf gaa haygiya kaw.

¹⁰Nan ma biya sum-wurana kulo kigiya, jafna vi Israyel noŋ kafe; hoyok-ziyna sumun ma lak ziy hayamu; sumun ma in ziyn kulo hay baŋal liy ma toy gaana.

¹¹Nan ma biya sumuna hiɗi farayna kulo kigiya, nisi ma biya ŋolo, ma muɗ vuɗ ŋolo kaw. Nan min biyagi ki hay liy ma jewna nala, nan ma li ŋaat kigiya suw ma jewna; nala nigi ma wi ala nanu mi Ma-Vatɗina.

¹²Nan ma hin sum-wuran poy kulo kigiya, nigi nigi sumuna van sa Israyella, Nigi ma muɗ ir visiya, nigi ma muɗ ti vocota visiya, nigi ma hinsi goy bay guro'o loɗi.

¹³Ki kayn nala Bum-Sumuna Ma-Vatɗina di'e: Kay nisi ka digi ala nigi vat sum-wuran goyo, jafna vigi kay tuwgiya nigi hinsi goy bay guro'o,

¹⁴kuɗ na'ta kayni nigi ma vat sum-wuran goy loɗi, nigi ma hin jafna vigi goy bay guro loɗi. Din mi Bum-Sumuna Ma-Vatɗina.

¹⁵Nigi ma hum ŋulda vi jaf-sumun loɗi, nigi ma ziy zulota vi sumun loɗi, nigi ma vat jaf-sumuna vigi goy loɗi, Din mi Bum-Sumuna Ma-Vatɗina.

¹⁶Ma-Vatɗina ka di yoboyn tan ala:

¹⁷Goora vi sana, nisi sa hay jafna vi Israyel, hay li ma nisi ays lakay ziy hay nagata visiya, nisi muɗa' liwisi hiɗi poyta visiya, hiɗi lopna visi kaw; poyta visi ay vok iranu ki liwisna vi cata ta busuwn ka ta'a nala.

¹⁸Ki kayn nala nan gi ɦiyda van gaa kisiya kuɗ busuw ma nigi jaŋam goy hay nagatna hiɗi lawayn ma waana visi ma nisi muɗ nagat liwis hiɗi namna.

¹⁹Nan mersi goy jar jaf-sumuna, nisi meray goy hay nagat tara'a tara'a; nan ka kitatawa kisiya kuɗ poyta visiya, hiɗi lopna visiya.

²⁰Hay li ma nisi co goy vi jaf-sum sa nisi kal goy visina, nisi muɗ semda van ta peldetta goy waa'a, sumun ka di kisi ala: Kayni si sumuna vi Ma-vatɗina, nisi kal ay goy kayn hay nagata valam pa.

²¹Semda vanu ta sa Israyella muɗa' goy waata nan hota' tiya jar sum sa nisi kali goy visina.

²²Awa ŋaa'a, daŋ tam jafna vi Israyel ala: Bum-Sumuna Ma-Vatɗina ka di'e: Nan li nala kayni may kuɗgi nigiɗi, nigi sa Israyella, nan li nala kayni kuɗ semda van ta peldetta ta nigi muɗa' goy waa'a jar jaf-sum sa nigi co goy visina.

²³Semda van ta ŋolda ta nigi muɗa' goy waa'a jar jaf-sumunta, nan ma muɗa' goy peldete, semda na'ta ta nigi muɗa' goy waa'a jar jaf-sumuna, nala jaf-sumun ma wi ala nanu mi Ma-Vatɗina, hay li ma nigi ma muɗ semda van goy peldete vok irsiya. Din mi Bum-Sumuna Ma-Vatɗina.

²⁴Nan ma yawgiyay goy jar jaf-sumuna, nan ma tokgiyay hay nagat kaf kay margi hay nagata vigiya.

²⁵Nan ma yam niy ma kilira goy kigiya, nigi ma por goyo; nan ma porgi goyo kay liwista vigiya hiɗi lawayn ma waana vigi kaf.

²⁶Nan ma vulgi dikga ta wuliya, nan ma tun hay dikgiya ŋusta ta wuliya; nan ma yaw goy hay tuwgiya dikga ta ɗeŋ ki hiɗiyna, nan ma vulgi dikga ta luma'ta.

²⁷Nan ma tun ŋusta van hay dikgiya, nan ma li a nigi tap kuɗ ɗota-gatta vanu, a nigi ma li kuɗ dita vanu, ŋoma'a kaw.

²⁸Nigi ma li ziy hay nagata ta nan vula' mi sumaygiya; nigi ma muɗ si sumuna vanu, nan ma muɗ mi Lawna vigiya may.

²⁹Nan ma suɗgi goyo kay liwista vigi kafe, nan ma yi alkamaren aya, nan ma biyam ŋolo; nan ma gi mayta tigi loɗi.

³⁰Nan ma biya vuɗna vi guna, hiɗi wan ma hay sinena, kay nigi ma ziy zulota vi mayta jar jaf-sumun loɗi.

³¹Nala humgi ma gigi kay poyta vigi ta ay joota, hiɗi lopna vigi ma ay ŋaaɗina; nigi ma sar ir tuwgi noŋɗi, kuɗ joota vigiya hiɗi slen ma liwis ma nigi lum jewna.

³²Nigi ma wi ala slen kayni nan lum kayn may kuɗgi nigiɗi. Din mi Bum-Sumuna Ma-Vatɗina. Hin tuwgi muɗ zulo'o kay poyta vigi ta jewta, nigi jafna vi Israyel.

³³Ki kayn nala Bum-Sumuna Ma-Vatɗina di'e: Hay buur ma nan ma porgi goy kay joota vigi kaf ɗawni, nan ma hot hob hoyok-ziyna vigi hiɗi sumuna, sumun ma hot in ziyn kulo baŋal liy ma ɦoy gaana.

³⁴Liyn ma sum sa jik hay hagata ɗuwum goy ɦawa hiweŋŋa muɗ ɗuwum ɗawni nam muɗi mi sine'e.

³⁵Sumun ma di ala: Nagata na'ta ta ay goy ɦawa hiweŋga muɗi ki jardeŋŋa vi Edena nala, hoyok-ziy ma ay ɦoy gaa'a, hini goy hiweŋ', toy gaa'a kawna, muɗi hiɗi gulmun talamu, sumun ka hayamu kaw.

³⁶Jaf-sum sa hin katgin ɗawni ma wi ala nanu Ma-Vatɗina, nan kot in ziyn ma ɦoy gaana, hot li sinen hay liy ma hini goy hiweŋŋa kaw. Nan Ma-Vatɗina, nan daawa, nan ma li va'a kaw.

³⁷Bum-Sumuna Ma-Vatɗina di ala: Nan ma hot yan gaa kuɗ gurona vi Israyel lo. Kayni mi slen ma nan ma lum tisiya: Nan ma biya sumuna ki farayn nala.

³⁸hoyok-ziy ma toy gaana ma hot hob hiɗi sumuna, ŋray ca ki faray ma gum ɗifinna nala, hiɗi faray ma tuɗum hay Yerusalem hay buura vi yuldena va' ma ŋulona, nala nisi ma wi ala nanu mi Ma-Vatɗina.