Read Masana EZEKIYEL 37 Bible Online

EZEKIYEL 37 - Masana bible

EZEKIYEL 37

¹Ma-Vatɗina kal donota valam hayanu, tuɗ colan goy jar liy ma lokŋa; nam ay hobay cep-cep' hiɗi zokŋa.

²Nam jikan kat zokŋa, kulo talam goboyo. Zok namna ay molay ŋolo, molay gaa hay lokŋa, soy goy ŋolo kaw.

³Nam di tanu: Goora vi sana, zok namna lakŋi hot muɗ iri lo su? Nan hotom dit ala: Bum-Sumuna Ma-Vatɗina, wi kayn mi naŋu.

⁴Nam di tanu: Daŋ vun-jobta tam zok namna, naŋ ma di talam ala: Zok ma soy goyna, humgi yoboyna vi Ma-Vatɗina.

⁵Bum-Sumuna Ma-Vatɗina ka di tam zok namna ala: Humgiya, nan min hin sukŋa kal haygiya, nigi ma hot iri lo;

⁶nan ma si sutayn tigiya, nan ma hin sliwn si tigiya, nan ma bar ɗigiy tigiya, nan ma kal sukŋa haygiya, nigi ma lak iriya. Nigi ma wi ala nanu mi Ma-Vatɗina.

⁷Nan ka di vun-jobta, ki hagata vuli tan nala. Hay li ma nan ka di vun-jobta, suwan li'e: Slen geɗa, zokŋa ɦur kulo tam tuwam goboyo, hena tam hena.

⁸Nan ɗuw kayni, sutayna ka siy tam zokŋa. Sliwn tun caw si tam zokŋa, ɗigiyna bur kay sliwna, may sukka tay hayam noŋɗi.

⁹Nam di tanu: Goora vi sana, daŋ vun-jobta, lawaŋ tam Ŋusta, daŋ vun-jobta, goora vi sana. Naŋ ma di tam Ŋusta ala: Bum-Sumuna Ma-Vatɗina ka di ala: Ŋusta, nagay goy hay gef-liyna ma fiɗin pete, biwag kay sum sa mitin lakŋi, kay nisi ma hot lak iriya.

¹⁰Nan di vun-jobta ki nam vulan hagata nala. Ŋusta kal haysiya, nisi muɗ iri lo, lak kulo kay sesiya. Nisi ay mi vok-ma-duura ma ŋolo ŋolo.

¹¹Nam di tanu: Goora vi sana, zok namna kayni mi jafna vi Israyel noŋ kafe. Humaŋu, nisi ka di ala: Zokŋa vuma soowa goyo, cubta-sle'ta vuma vatay goyo, numa baawa goyo.

¹²Awa ŋaa'a, daŋ vun-jobta. Naŋ ma di tisi ala. Bum-Sumuna Ma-Vatɗina ka di tigi ala: Nan mal vun zulla vigi goyo, nan min daygi kulo hay zulla vigiya, nigi sumuna vanu, nan min hotgiyay hay nagata vi Israyel.

¹³Nigi ma wi ala nanu mi Ma-Vatɗina hay li ma nan ma mal vun zulla vigi goyo, nan ma daygiyay goy hay zulla vigi pa, nigi sumuna vanu!

¹⁴Nan ma tun Ŋusta van haygiya, nigi ma hot lak iriya; nan ma hot lakgi hay nagata vigiya, nala nigi ma wi ala nanu, Ma-Vatɗina, nan di va'a, nan li va'a kaw. Dita vi Ma-Vatɗina.

¹⁵Ma-Vatɗina ka di yoboyn tan ala:

¹⁶Naŋu, goora vi sana, slaŋ gu-kuɓulus kepe, ɗoŋ kulo kalam ala: Tam jafna vi Yuda hiɗi tam gurona vi Israyel sa tapay tisin kafe. Slaŋ gu-kubulus mara kep lo, ɗoŋ kulo kalam ala: Tam Yosef, guna vi Efrayim, hiɗi tam jafna vi Israyel kaf sa tapay tisina.

¹⁷Tapaŋ vun gu-kuɓulus namna kulo tam tuwamu, a nam ma muɗ kulo way-ɓaŋu ki gu-kuɓulus ma kepna nala, kay a nam ma tap kulo way-ɓaŋu.

¹⁸Hay li ma sum sa hay jafna vaŋu joboŋawa ala: Va ma naŋ lum kayni naŋ may duma'ti cawamɗi su ni,

¹⁹naŋ ma hotsi dit ala: Bum-Sumuna Ma-Vatɗina ka di ala: Fay tuwayawa yo, nan sli guna vi jafna vi Yosef ma ka hay ɓam jafna vi Efrayim hiɗi jafna vi Israyel sa tapay tisina, nan ma tapam vun tuwam hiɗi guna vi Yuda, kay muɗum goy gu ma kepna. Nisi ma tap kepe hay ɓanu.

²⁰Gu-kubulus namna ma naŋ ɗo kalamna ɗawni, naŋ ma vum hay ɓaŋu, goy kirsi haraŋ kafe.

²¹Naŋ ma di tisi ala: Bum-Sumuna Ma-Vatɗina ka di'e: Fay tuwayawa yo, nan yaw sa Israyella goy jar jaf-sumuna sa nisi kali goy hay nagata visin pa; nan ma tapsi ay goy hay liyn kaf, nan ma hotsiyay hay nagata visiya.

²²Nan ma muɗsi goy jaf-sum sa kepna hay nagata, hay hiɗiyna vi Israyel; nisi kaf mulla visi ma li kepe, nisi ma lak dok-dok hay nagat ma' loɗi, ma li ɓuraway goy kuɗ mulda ma' loɗi.

²³Nisi ma muɗ tuwsi liwisi hiɗi Lawayna visi ma waana loɗi, kuɗ lawayn ma liwisna hiɗi jiw-zlata visi kaf loɗi; nan ma suɗsi goyo hay liyn kaf ma nisi li ziy haya, ma nisi li suluk haya kaw, nan ma porsiya; nisi ma muɗ si sumuna vanu, nan ma muɗ mi Lawna visiya may.

²⁴Sa ma sunda vanu David ma muɗ mi mulla visiya, nisi kaf sa ma ŋomda visi ma li kepe. Nisi ma tap kuɗ dita vanu, nisi ma li kuɗ ɗota-gatta vanu, ma ŋoma'a kaw.

²⁵Nisi ma li ziy hay nagata ta nan vula' mi sa ma sunda vanu Yakub, nagata ta sumaygi ay li ziy haya; nisi ma li ziy haya, nisiya, gurona visiya hiɗi guro-ŋolona visiya kaw, ta-ta dok-doko. Sa ma sunda vanu David ma li mi mulla visiya dok-doko.

²⁶Nan ma jun bonota ta sle'ta hiɗi nisiya, bonota ta vatɗita ma li jarma'a, nan ma laksi gaa'a, nan ma biyasiya, nan ma tun liyn ma peldetna vanu jarsiya kay dok-doko.

²⁷Liyn ma musta vanu ma tunis jarsiya; nan ma muɗ mi Lawna visiya, nisi ma muɗ si sumuna vanu may,[11]

²⁸ki kayn nala jaf-sumuna ma wi ala nanu mi Ma-Vatɗina ma muɗ sa Israyel goy peldetna, hay li ma liyn ma peldetna vanu ma tunis jarsiya kay dok-doko.