Read Masana EZEKIYEL 38 Bible Online

EZEKIYEL 38 - Masana bible

EZEKIYEL 38

¹Ma-Vatɗina ka di yoboyn tan ala:

²Goora vi sana, muɗaŋ iraŋ kir Gog, hay nagata vi Magog, kat mulla vi Rok, vi Mesek hiɗi Tubal, daŋ vun-jobta talamu.

³Naŋ ma di talam ala: Bum-Sumuna Ma-Vatɗina ka di ala: Fay tuwayawa! Gog, mulla vi Rok, vi Mesek hiɗi Tubal.

⁴Nan ma sabaŋu, nan ma cuk jaɓn cinaŋu, nan ma kalaŋay goyo, naŋu hiɗi vok-ma-duura vaŋ noŋ kafe, kulumayna hiɗi sa ɓe kulumayna, kaf ganay hiɗi sligar ma ŋaana, vokŋa ma tokay ŋolla, sa ka ziy maray ma gurayna hiɗi ma ŋulona, kaf sa wi yal kew-gaferaŋa;

⁵hiɗi nisi sa hay Persiya, Etiopiya hiɗi Put, kaf ziy maray ma duura hiɗi bogorayna;

⁶Gomer hiɗi vokŋa visi kafe, jafna vi Togarma, gine'e hay gal ma gaana, hiɗi vokŋa visi kaf, sum sa ŋol ɦini-ɦini' sa ka hiɗi naŋu.

⁷Kotaŋ tuwaŋu, musaŋ jigere, naŋu hiɗi tokŋa ma ka ŋuyi taŋŋa kafe. Naŋ ma lin mi ŋomda visiya.

⁸Hay li ma buur ŋolo vatawana, hagat ma vulis taŋu kay tunaŋ hay lopna vaŋu, hay vatta vi liyna, naŋ ma co dur jaf-sum sa suɗ goy kuɗ kew-gaferaŋa, sa toksi ay goy jar jaf-sumuna pa, kulo kay hiɗiyna vi Israyel ma hay ɓa-ɓa ay hini goy ɦawa hiweŋ', nisi sa cukay goy jar jaf-sumuna pa, nisi ma lak hay sle'ta hay nagata visiya.

⁹Naŋ ma co katsiya, naŋ ma co'o ki biira nala, naŋ ma li ŋiray ca ki ɗugulla ma ŋuy yam nagata nala, naŋu hiɗi vokŋa vaŋ kafe, hiɗi jaf-sumun ŋolo sa ka hiɗi naŋu.

¹⁰Ki kayn nala Bum-Sumuna Ma-Vatɗina ka di'e: Hay buur namna ɗawni, varta ma kal hay dikaŋu, naŋ ma var varta ta joota.

¹¹Naŋ ma di ala: Nan min tuɗ dur nagata ta vuna' goy malita, nan min dur sum sa lakay kiliŋ hay sle'ta hay nagata visiya, nisi kaf sa ziyna visi ka cuki hay hoyok-ziyna ma gulmun may talamɗi, cokorom vunamɗi, vunam may giyɗi kaw.

¹²Nan ma tuɗ yaw sle ma ɓuraŋŋa, vurum slena kaw. May wulini naŋ tun ɓaŋ ɗawni tam ziyn ma ɦoy gaa'a, ma sumun ka li ziy hayam wulini yo, tam sum sa vileksi ay goy jar jaf-sumun pa, farayna visi ka'a, slena visi ka dak-daki kaw, sum sa ziyna visi ka hay way-nagat kuɗulu.

¹³Seba hiɗi Dedan, sa li filiwna hay Tarsis, guro-zlon kaf kaw ma di taŋ ala: Naŋ co kayni kay ti ɓuraŋi su? Naŋ nef tokŋa kayni kay ti ɓuraŋi su? Kay yaw doorota hiɗi ora su? Kay yaw farayna hiɗi slen su? Kay ti ɓuraŋ ŋolo su?

¹⁴Awa ŋaa'a, daŋ vun-jobta, goora vi sana, naŋ ma di tam Gog ala: Bum-Sumuna Ma-Vatɗina ka di'e: Awa, buura ma sumuna van sa Israyella lak hay sle'ta ɗawni, naŋ ma wi kayni,

¹⁵naŋ ma may goy hay liyn ma musta vaŋ pa, hay gal ma gaa gine pana, naŋu hiɗi jaf-sumuna ŋolo kuɗaŋu, kaf ɓey kay kulumayna, tokŋa vi sumun ŋolo, vok-ma-duura ŋolo.

¹⁶Naŋ ma tuɗ dur sumuna vanu sa Israyella, ki ɗugulla ma min tuɗ kusuɓ yam nagata nala, van kayni ma co'o hay dabta vi liyna, nan ma gaŋ iraŋay kat nagata vanu, kay jaf-sumuna ma wanu, hay li ma naŋ ma li semda van goy peldete vok irsiya, naŋ Gog!

¹⁷Ki kayn nala Bum-Sumuna Ma-Vatɗina di'e: Hay li ma nan di dit jewe hay vun sa sunda vanu sa jobta vi Israyel, hay li ma nisi di vun-jobta ir busat ŋolo ala nan ma gi ir sum sara ay kat sumuna vanu, Nala nan di kayni kaŋ naŋ su?

¹⁸Hay buur namna ɗawni, hay buur ma Gog ma co dur sum sa Israyel ɗawni, nan ma muɗ ɦiy ŋolo. Din mi Bum-Sumuna Ma-Vatɗina.

¹⁹Nan di kayni hay hunayta vanu hiɗi ɦiyda vanu ta ku keŋga. Awa, hay buur namna ɗawni wira nagata ma li ŋolo hay Israyel.

²⁰Kuluf ma goloŋŋa hiɗi layayn ma dukalawna tuwam ma muɗ vum vok iran bat-bat', muuriyan ma hay fulda nala kaw, hiɗi slen ma ɦarmat gaa kay nagata kaf, hiɗi sum sa ka gaa kay nagata kaf kaw. Hiɗiyna ma ɦo gaa'a, hiɗiy fiyokŋa ma ɦo gaa'a kaw, gulmunna ma ɦo gaa kay nagata.

²¹Kulo kay hiɗiyna van kaf pa, nan ma yi kew-gaferaŋa ay talamu, gigekaw ma muɗ vun kew-gaferaŋa valam kat ɓasulumna. Din mi Bum-Sumuna Ma-Vatɗina.

²²Nan ma ka kitat jaran hiɗi namu hiɗi bakmarana, hiɗi busuwna ma jaŋ goyna. Nan ma hin niy ma sina kulfut ŋolo hiɗi mogoyna, nan ma hin kuta hiɗi sufre* si gaa kalamu, kay vokŋa valamu, hiɗi sum sa kuɗum ŋol ɦini-ɦinina.

²³Nan ma ɗek ŋolda vanu hiɗi peldetta van goyo, nan ma ɗek tuwan goyo kir jaf-sumun ŋolo, nisi ma wi ala nanu mi Ma-Vatɗina.