Read Masana EZEKIYEL 39 Bible Online

EZEKIYEL 39 - Masana bible

EZEKIYEL 39

¹Naŋu, goora vi sana, daŋ vun-jobta kat Gog. Naŋ ma di ala: Bum-Sumuna Ma-Vatɗina ka di'e: Fay tuwayawa, Gog, mulla vi Rok, vi Mesek hiɗi Tubal.

²Nan ma sabaŋu, nan ma tun vokaŋu, nan ma maraŋay goy hay liy ma gine ŋolla vi gal ma gaan pa, nan ma maraŋ kulo kay hiɗiyta vi Israyel.

³Diŋdiŋ ɓarawta vaŋu ta hay ɓaŋ ta gulda nan ma zlaka' goyo, ɓarawna vaŋu ma hay ɓaŋ ma jufna nan ma yakam gaa'a.

⁴Naŋ ma nig gaa'a kay hiɗiyta vi Israyel, naŋu hiɗi vokŋa vaŋ noŋ kaf, hiɗi sum sa ka hiɗi naŋu; nan ma vulaŋ goy tam lay ma ti sliwna, layayn kuɗ jafam kaf, hiɗi muuriyan ma hay fulda. Nan ma vulaŋu kay nam mutaŋu.

⁵Naŋ ma nig gaa'a hay fulda, kay nanu, nan daawa, Din mi Bum-Sumuna Ma-Vatɗina.

⁶Nan ma gi kuta hay Magog, jar nisi sa li ziy kulo kay jokota hiɗi sle'ta; nala nisi ma wi ala nanu mi Ma-Vatɗina.

⁷Nan ma ɗek semda vanu ta peldetta goy jar sumuna vanu sa Israyella, nan ma hin semda van ta peldetta muɗ goy waa loɗi; nala jaf-sumun kaf ma wi ala nanu mi Ma-Vatɗina, ma peldetna vi Israyel.

⁸Humgiya, slen kayni ka co'o, nam ma li'e. Kayni mi buur ma nan di kalamna. Din mi Bum-Sumuna Ma-Vatɗina.

⁹Hay na'ta ɗawni, sum sa hay hoyok-ziyna vi sa Israyella ma cukay goyo, sle-ma-duura nisi ma cukum hay kuta kay ŋalam goyo, nisi ma ŋal maray ma gurayna hiɗi ma ŋulon goyo, diŋ-diŋ ɓarawna hiɗi ɓarawna kaw, zugulayna hiɗi yakana kaw; nisi ma ŋal ku hiɗi namu ir busat siɗiya.

¹⁰Nisi ma yaw gun ay goy hay fuldaɗi, nisi ma ka gun goy kuɗ jurutɗi kaw, kay nisi ŋal kuta visi ɗawni hiɗi sle-ma-duura, sum sa tisi ɓuraŋ jewna nisi ma tisi ɓuraŋi, sum sa vurumsi jewna nisi ma vurumsiya. Din mi Bum-Sumuna Ma-Vatɗina.

¹¹Hay buur namna ɗawni, nan ma vul liyn ma pita vi Gog hay Israyel, hay lokŋa vi sa tuɗ rogoyna, hay gal ma kuɗuwna vi niy-lum ma ŋolla, zulla visiya ma duk hagata vok sum sa tuɗ rogoyna. Kayni mi liyn namna ma nisi ma pi Gog hiɗi vokŋa valam ma gu' gu'na haya, liyn namna nisi ma yum ala: Lokŋa vi vok ma gu' gu'na vi Gog.

¹²Jafna vi Israyel ma pisi gaa'a, kay por yam nagata; pita visi ma li ir til siɗiya.

¹³Sum sa hay nagat kaf ma pisi gaa'a, semda visi ma tiya, hay buur ma nisi ma suburan senu. Din mi Bum-Sumuna Ma-Vatɗina.

¹⁴Nisi ma lak sum sara goy noŋ lak', kay ŋuy yam nagata. Nisi ma tap tuwsi hiɗi sum sa tuɗ rogoyna, kay yaw sum sa tuwsi bay pi gaa kuɗ nagat tuwana, kay pisi gaa'a, kay por yam nagat goyo. Nisi ma garsiya ta-ta ir til siɗiya.

¹⁵Sum sa tuɗ rogoy nisina ma ŋuy nagata; hay li ma sa kep jarsiya wi zok sa-wurawa, nam ma pi va kulo talam ɗumuruk' zaw, kay sa pi sumuna ma co yaw zokŋa, kay tuɗ pum hay lokŋa vi vok ma gu' gu'na vi Gog.

¹⁶hoyok-ziyn mara ma yum Hamona ma li ka lo.[12] Ki kayn nala nisi ma por nagat goyo.

¹⁷Naŋu goora vi sana, Bum-Sumuna Ma-Vatɗina ka di ala: Daŋ tam layayn kuɗ jafam kaf, hiɗi muuriyan ma hay fulda kaf ala: Tokgi tuwgi aya, nigiyaya, tapgi tuwgi ay hay liyn kaf kay ɗifinna vanu, ɗifin namna ma nan ŋatam kigi nigiya, ɗifin ma ŋolla kulo kay hiɗiyta vi Israyel. Nigi ma tigi sliwna, cigi busuwna kaw.

¹⁸Nigi ma tigi sliwna vi sum sa donona, nigi ma ci busuwna vi sa yerimana gaa kay nagata, fok-gamalana, guro fok-dimina, fok-ŋekŋa, luway-gujuna, kaf kayn mi ma ɗorayna vi Basan.

¹⁹Nigi ma ti mul-sliwna ta-ta nigi hoba, nigi ma ci busuwna ta-ta nigi ɦoy goyo, hay yuldeta vi farayna ma nan ŋatam ɗifini kigiya.

²⁰Nigi ma hob hiɗi tina vanu, hiɗi sliw kulumayna hiɗi sa ɓe kalamna, hiɗi sliw sum sa donona, hiɗi sa wi duura kafe, Din mi Bum-Sumuna Ma-Vatɗina.

²¹Nan ma ɗek gajijita vanu goy jar jaf-sumuna; jaf-sumun kaf ma wi kitata ta nan min ka'ta, hiɗi ɓanu ma nan min tunum kisina:

²²Jafna vi Israyel ma wi ala nanu mi Ma-Vatɗina, Lawna visiya, tun caw vaydi pa ta-ta hay vokka.

²³Jaf-sumun kaf ma wi ala, sum sa Israyella ay yaway goy gorvo kayni kuɗ joota visiya, kuɗ bay-vida visi ma kuɗanna, kuɗ na'ta nan ŋaysi vok-iranu; nan vulsi goyo hay ɓam sa gawt kisina, kay nisi kaf ma pukis gaa'a vok kew-gaferaŋa.

²⁴Nan li tisi kayni kuɗ liwista hiɗi jiw-zlata visiya, kuɗ na'ta nan ŋay iran kisiya.

²⁵Awa ŋaa'a, Bum-Sumuna Ma-Vatɗina ka di ala: Wulin kayni sa gorvona vi Yakub nan ma hotsiyaya, nan ma li slugota kay jafna vi Israyel kafe. Nan ma li hunaya kay semda van ta peldetta.

²⁶Ki kayn nala yisi ma jok zulota visiya, hiɗi bay-ɗigerta visi kaf ta nisi la' katanu. Nisi ma lak hay sle'ta hay nagata visiya, bay sa ɦiwirsiya.

²⁷Hay li ma nan ma hotsiyay goy jar jaf-sumun pa, hay li ma nan ma toksi ay goy hay nagata vi sa gaw kisin pa, nisi ma li semda van goy peldete vok ir jaf-sumun ŋolo.

²⁸Sumun ma wi ala nanu mi Ma-Vatɗina Lawna visiya, ma kalsi goy gorvo vi jaf-sumuna, ma toksi yam tuwsi hay nagata visiya; sa kuɗsi kep kaw nan ma hinim ay goy ɗawnɗi.

²⁹Nan ma ŋay vok iran kisi loɗi, kay nan ma yam Ŋusta vanu goy kay jafna vi sa Israyella. Din mi Bum-Sumuna Ma-Vatɗina.