Read Masana EZEKIYEL 42 Bible Online

EZEKIYEL 42 - Masana bible

EZEKIYEL 42

¹Nam kalan goyo hay wur-daŋŋa ma jiyna, hay gal ma gaana, nam tuɗan kat ziy ma kalafna ma ka ɗiger vok liyn ma goy ɦawana, ɗiger vok ziyna, hay gal gaa'a.

²Goy hay vok-ziyna, hay liyn ma vun-ziyna ma gaana ka'a, fiyokka valam ir goldoŋ kis, buɗukka valam ir goldoŋ dok-vasl.

³Kayni ay ɗiger vok goldoŋ ma dok-ma'na vi wur-daŋŋa ma hay kalafna, ɗiger vok yam nagata ma dakay gaana vi wur-daŋŋa ma goy jiyna. Haga ma kalafna ka ŋray dig haga hen ma kalafna, kuɗ ziy ma jakay kulo kay tuwam ɦidina.

⁴Goy vok ziy ma kalafna, liyn ma tuɗna ka'a, ma be'da valam ir goldoŋ doogo hay kalafi, haga heta ir goldoŋ kepe kaw; vunam mali hay gal gaa'a.

⁵Ziy ma kalafna ma kulona hebay suw ziy ma kalafna ma gaana hiɗi ma jaara, kay haga ma kalafna ka yaw liyn goy kalamu.

⁶Ziy ma jakay kay tuwamna ka ɦidi. May dolla may hayam ki dolla vi wur-daŋŋa nalaɗi. Kuɗ na'ta kayni, fokis gaa vi nagat pa, ziy ma kalafna ma kulona nam hebay suw ziy ma kalafna ma gaana hiɗi ma jaara.

⁷Gulmun ma goy jiyna, ma kuɗ fiyokka vi ziy ma kalafna, hay galla vi wur-daŋŋa ma goy jiyna, ɗiger vok ziy ma kalafna, fiyokka valam ir goldoŋ dok-vasl.

⁸Fiyokka vi ziy ma kalafna hay galla vi wur-daŋŋa ma goy jiyna ir goldoŋ dok-vasl, may goy ɗiger vok Tempella, goldoŋ ka kis.

⁹Gaa kuɗ ziy ma kalafna namna, liyn ma kal kalafi hay gal kuɗuwna ka'a, jikay kayni hay wur-daŋŋa ma goy jiyn pa.

¹⁰Ziy guray hegena ka kuɗ buɗukŋa vi gulmunna vi wur-daŋŋa, hay gal ma kuɗuwna, ɗiger vok liyn ma goy ɦawana, ɗiger vok ziyda kaw.

¹¹Goy vokomu, liyn ma tuɗna ka'a, ki vok ziy ma kalafna ma ka hay gal ma kuɗuwna nala. Fiyokka hiɗi buɗukka ŋray ca; liyn ma kal goyna, lakka valamu hiɗi vun-ziyna valamu kaf ŋray ca.

¹²Ŋray ca nala kaw kay vun-ziyna vi ziy ma kalafna ma hay gal kayamna liyn ma kal kalafna ka kulo kay hagat kepe, hagata ta ka ɗiger vok gulmunna ma ŋray diga'a, hagata ta may kuɗuw pa, hay li ma san tuɗ kat ziy ma kalafna.

¹³Nam di tanu: Ziy ma kalafna ma gal gaana, ziy ma kalafna ma gal kayamna, ma ka vok liyn ma goy ɦawana, kayni mi ziy ma peldetna, muliyan-sa-ɗifinna sa co vok ir Ma-Vatɗina ma ti slen ma peldet suwina haya; nisi ma lak sle ma peldet suwina haya, vulda-ɦawata, faray ma ŋatiya hay ɗifinna vi poora, hiɗi ɗifinna vi jiw-zlata; kay liyn kayni peldete.

¹⁴Hay li ma muliyan-sa-ɗifinna ma cuk kalafi hay liyn ma peldetna, nisi ma kali goy hay wur-daŋŋa ma goy jiyna gosoy deɗi, may sligara visi ma nisi li lop hiɗi namna nisi ma hinim kalaf hay liy namna lak', kay sligar namna kayni peldete; nisi ma cuk sligar mara tisiya kay co hay liy ma sumun lak hayamna.

¹⁵Hay li ma nam vat ŋaɓta vi hay ziyd ma kalafna vatna, nam kalanay goyo hay vun-ziyna ma gal kuɗuwna, nam ŋaɓ haya' ma kalafna kafe.

¹⁶Nam ŋaɓ gal ma kuɗuwna hiɗi zugulda ta ŋaɓta, nam co noŋ pet ir zugul kis-vasl,

¹⁷nam ŋaɓ gal ma gaana hiɗi zugulda ta ŋaɓta, nam co noŋ pet ir zugulda kis-vasl.

¹⁸Nam ŋaɓ gal ma kayamna hiɗi zugul ta ŋaɓta, nam co noŋ pet ir zugul kis-vasl.

¹⁹Nam muɗ iram hay gal ma vulatina, nam ŋaɓam goyo hiɗi zugulda ta ŋaɓta, nam co noŋ pet ir zugulda kis-vasl.

²⁰Nam ŋaɓ tuw gulmunna hay gefem ma fiɗin pete: Fiyokka valamu ir zugul kis-vasl, ɓuɗukka valam ir zugul kis-vasl. Gulmun namna ɓuraw jar liyn ma peldetna hiɗi liyn ma waana.