Read Masana EZEKIYEL 43 Bible Online

EZEKIYEL 43 - Masana bible

EZEKIYEL 43

¹Nam tuɗan kat vun-ziyna, vun-ziyna ma iram muɗi hay gal kuɗuwna.

²Duw na kayni, gajijita vi Lawna vi Israyel ka tuɗay hay gal ma kuɗuwn pa. Delem ma dina ŋray ca ki suwana vi niy ma ŋolla nala, nagat ka wile'e kuɗ gajijita valamu.

³Va ma vul tuwam kiranu ŋray ca hiɗi va ma vul tuwam kiranu hay li ma nan co kay ɓulak hoyok-ziyna; slen namna ma vul tuwam kiranu ŋray ca hiɗi sle ma vul tuwam kiranu goboy hiɗi niy-lumna Kebar. Nan gi tuwan gaa'a, dab vokan gaa kay nagata.

⁴Gajijita vi Ma-Vatɗina ka tuɗ voka'a kat ziyda hay vunna va'a ma iram muɗi gal kuɗuwna.

⁵Bugol kayni Ŋusta slan goyo, kalan hay wur-daŋŋa ma kalafna. Duw na kayni hay-ziyd ka hobay hiɗi gajijita vi Ma-Vatɗina.

⁶Nan hum sa mara kep ka law tanu goy hay ziyda pa, sa mara ka coli goboy hiɗi nanu.

⁷Nam di tanu: Goora vi sana, tan kayni mi liyna vi zlamda-mulda vanu, liyn ma nan ma tun wur-sen haya. Nan ma mus tani dok-doko jar sa Israyella. Semda vanu ta peldetta jafna vi Israyel hiɗi muliyana visiya ma muɗa' liwisi kuɗ viyuwta visiya loɗi, nisi ma muɗa' liwisi hiɗi tuw ma mitina[13] vi muliyana visiya kulo kay liyn ma ɗiŋiriŋɗi kaw.

⁸Nisi ay pi vun-ziyna visi goboy tam vun-ziyna vanu, nisi ay pi dolla vi vun-ziyna visi kat dolla vi vun-ziyna vanu, jar-ziyna vanu hiɗi fisina gulmun ay giy jaram kepe; nisi muɗ semda van ta peldetta goy liwisi hiɗi joo ma nisi lumna; kuɗ kayni nan ŋalsiyawa goyo hay ɦiyda vanu.

⁹Wulin kayni, viyuwta visiya hiɗi tuw ma mitina vi muliyana visiya nisi ma tuɗum goy gine hiɗi nanu, nan ma mus dok-dok jarsiya.

¹⁰Naŋu, goora vi sana, ɗekaŋ ziyd kayni kir sa Israyella, hinsi muɗ zulo'o kay joota visiya, nisi ma ŋaɓ plaŋŋa va'a kaw.

¹¹La nisi muɗi zulo'o kuɗ slen ma nisi lum kafna, naŋ ma ɗeksi kay jifna vi ziyda na'ta, colta va'a, vuna'a ma kal goyna hiɗi vuna' ma kal kalafna, ɗota va' kaf hiɗi gatta ta kuɗa'ta, ɗota va' kaf hiɗi sle ma diy ka'na, naŋ ma ɗekem goy kirsiya, nisi ma li kuɗ sle ma ɗoy ka'na kaf, li kuɗ dita va' kaf. Nisi ma hob vun slena.

¹²Kayni ti gatta vi ziyda. Kulo kay sin-hiɗiyta, ir-liyna va' kaf ka peldete. Kayni ti gatta vi ziyda yo.

¹³Kayni mi ŋaɓta vi giwin-ma-ɗifinna, ŋaɓta vi goldoŋ namna suw goy kay ŋaɓta vi goldoŋ ma ɦawana ir way-ɓamta kepe. Galam ma vuroki gaana ir goldoŋ kep, buɗukŋa valamu ir goldoŋ kep kaw. Gaŋam ma ŋuyi talamna ir way-ɓamta ɦidi, kayni mi va ma vul donota mi giwin-ma-ɗifinna.

¹⁴Fokay kat gaŋam ma vuroki gaana, gaa tam nagata pa, ta-ta tam tuwam ma kulona, goldoŋ ka ma', goldoŋ ka kep kuɗ buɗukamu kaw, fokay tam tuwam ma goora pa ta-ta tam tuwam ma ŋolla kayni co ir goldoŋ fiɗi, goldoŋ kep kuɗ buɗukamu kaw.

¹⁵Giwin-ma-ɗifinna sinem ma kulona ka hiɗi goldoŋ fiɗi; miyok fiɗi ka dayay kulo hayam pa.

¹⁶Giwin-ma-ɗifinna sinem ma kulona ka hiɗi goldoŋ doogo yam ma' kuɗ fiyokomu, goldoŋ doogo yam ma' kuɗ buɗukamu. Gefem fiɗi kaf ŋray ca.

¹⁷Tuwam ka hiɗi goldoŋ doogo yam fiɗi kuɗ fiyokomu, goldoŋ doogo yam fiɗi kuɗ buɗukamu kaw hay gefem fiɗi pete; gaŋam ma ŋuyi talamna ka hiɗi gal goldoŋ kepe; gaŋam ma gaa vi nagata ka hiɗi goldoŋ kep hay galam kaf, liyna valam ma jikŋa iram muɗi kuɗuwu.

¹⁸Nam di tanu: Goora vi sana, ki kayn nala Bum-Sumuna Ma-Vatɗina ka di'e: Kayni mi slen ma ɗoya kay giwin-ma-ɗifinna, kay buura ma nigi ma inimna, kay li ɗifin ma ŋal-goyna, kay yam busuwna kulo kalamu kaw.

¹⁹Naŋ ma vul put ma joriyo kepe mi muliyan-sa-ɗifinna sa Levitna, sa hay jafna vi Sadok, sa ka co vok iranu kay sunanu, kay nisi ma li ɗifin ma kay sulukŋa. Din mi Bum-Sumuna Ma-Vatɗina.

²⁰Naŋ ma yaw busuwna valamu, naŋ ma lum kulo tam miyokŋa vi giwin-ma-ɗifinna hay gefna vi tuwam ma fiɗina hiɗi tuwam ma ŋuyi talam kafna, naŋ ma yaw sulukŋa goyo tam giwin-ma-ɗifinna, hiɗi kayni naŋ ma poromu.

²¹Naŋ ma vi put-gujuna ma kay sulukŋa, ma ŋalam goyo hay liyna vi ziyna ma tuni goy ir valam ta', goy jiy liyn ma peldetna.

²²Hay buurta ma'ta, naŋ ma mar ɦu-ŋekŋa ma bay moy talamu, ŋatamu kay sulukŋa, ma yaw sulukŋa goyo kay giwin-ma-ɗifinna, ki yawam goyo hiɗi put-gujun nala.

²³Hay li ma naŋ vat ɗifin ma kay sulukŋawa, naŋ ma vi put-guju ma joriyo kep, ma moy may talamɗi, hiɗi ɦu-gamala ma moy may talamɗi kep lo, naŋ ma yawamay goy jar faray-gurayn pa.

²⁴Naŋ ma maram vok Ma-Vatɗina, muliyan-sa-ɗifinna ma cuk mandan kalamu, ma ŋalam goyo vok-ir Ma-Vatɗina.

²⁵Jar buur siɗiya kaf kayni, hay buurta kaf naŋ ma ŋat ɦu-ŋek kep kay sulukŋa; naŋ ma ŋat put-guju ma joriyo kepe, ɦu-gamala kepe kaw, ma yawamay jar faray-gurayna, ma li hiɗi moy talamɗi kaf.

²⁶Nigi ma por giwin-ma-ɗifinna ir buur siɗiya, nigi ma muɗum peldete kay vulum goy tam Ma-Vatɗina.

²⁷Hay li ma buur cani vatawa, tun caw tam buurta glafandita pa ta-ta vok ɗaw, muliyan-sa-ɗifinna ma ŋal ɗifinna kulo kay giwin-ma-ɗifinna, li ɗifinna vi lop ma slugon kulo kalamu kaw. Nala nan ma var kigiya. Din mi Bum-Sumuna Ma-Vatɗina