Read Masana EZEKIYEL 45 Bible Online

EZEKIYEL 45 - Masana bible

EZEKIYEL 45

¹Hay li ma nigi ma li ŋaɓta kuɗ ɦayta kay ɓuraw nagat jargi voco'o, nigi ma yaw gal mara'a, tunum goy ir vi Ma-Vatɗina, galla ma peldetna hay nagata. Liy namna fiyokka valam ma li ir goldoŋ birim dok-ma' yam vasl, buɗukŋa valamu ir goldoŋ birim doogo, nam ma lin mi liy ma peldetna kalaf hay ir liyna valamu.

²Kuɗ liy namna nigi ma ŋa goldoŋ kis-vasl hay gefem fiɗi pete, kay liyn ma peldetna, nigi ma ŋa goldoŋ dok-vasl kay liy ma hini goy ɦawana hay galam kafe.

³Kuɗ liyn namna ma fiyokka valamu ir goldoŋ birim dok-ma' yam vasl, buɗukka valam ir goldoŋ birim doogo kayni, nigi ma ŋa liyn mara goyo kay liyn ma peldetna, kay liyn ma peldet suwina.

⁴Nam ma lin mi liyn ma peldetna vi nagata, nam ma lin mi liyna vi muliyan-sa-ɗifinna sa li lop hay liy ma peldetna, nisi sa co goboy vok ma Ma-Vatɗina kay li lopna valamu; kayni ma lin mi ziyna visiya, liyna ma tuni goy valamna kayni liy ma peldetna.

⁵Goldoŋ birim dok-ma' yam vasl kuɗ fiyokka, goldoŋ birim doogo kaw kuɗ buɗukka, ma lin mi galla vi sa Levitna sa ka li lop hay Ziyda, hiɗi ziy ma kalafn dok-ma'.

⁶Nigi ma ŋa liyn goldoŋ birim vasl kuɗ buɗukamu, ir goldoŋ birim dok-ma' yam vasl kuɗ fiyokomu, ŋray dig liyn ma ŋaɓam goyo kay liyn ma peldetna, nam ma li mi ir galla vi hoyok-ziyna, nam ma li vi sum sa Israyella kafe.

⁷Nigi ma hin liyn goy ɦawa'a hay gal ma ma'na vi ir liyn ma peldetna vi hoyok-ziyna mi mulla. Hinim kuɗ fiyokka vi liyn ma peldetna, hiɗi fiyokka vi ir liyn ma hini mi hoyok-ziyna, hay gal ma vulatina ta-ta hay vulatiya, hay gal ma kuɗuwna ta-ta fiyokka valam ŋray dig gal ma kepna jar hen ca, fokay hay jaara ma vulatin pa ta-ta tam jaara ma kuɗuwna.

⁸Kayni ma lin ti nagata valamu, ir galla valamu hay Israyel; muliyana vi Israyel ma yaw slen hay ɓam sumunɗi. May nisi ma hin nagata mi sa Israyella kuɗ jafna visiya visiya.

⁹Bum-Sumuna Ma-Vatɗina di ala: Asawa nata, muliyana vi Israyel, hingi ɦawlata hiɗi vurumta goyo, ligi gasita hiɗi ɗigerta, butgi sumuna van goy ɓam curo'da vigiya. Din mi Bum-Sumuna Ma-Vatɗina.

¹⁰Slena vigi ma ŋa slena nigi ma kotom hay hagamu, dutta-kusta vigi ma li hay haga'a, gasasta ta ŋa mula ma li hay haga'a kaw.

¹¹Dutta-kusta hiɗi gasasta ta ŋa mula ŋaɓta valam ma li ŋray ca: Gasasta ta ŋa mula ma lin mi gal-ma-doogona vi goor-birmilla, dutta-kusta ma lin ti gal ta doogota vi goor-birmilla kaw, ŋaɓta valamu ma li ŋray ca kuɗ goor-birmilla.

¹²Sikella* ma li ir gera* dok-ma'. Minna* vigiya ma li ir sikel dok-ma', sikel dok-ma' yam vasl, sikel doogo yam vasl.

¹³Kayni mi vulda ma nigi ma yawam goyna: Gal ma karkiyana vi dutta-kusta vi alkamarena hay goor-birmilla nigi ma yawam goyo, gal ma karkiyana vi dutta-kusta vi orgena hay goor-birmilla nigi ma yawam goyo kaw.

¹⁴Ŋaɓta vi mula, kay gasasta vi mula kepe, gal-ma-doogona vi gasasta kay kor kepe, ma ŋray ca hiɗi goor-birmilla ma gasas doogona. Kay gasas doogo kayni ir goor-birmil kepe.[14]

¹⁵Jar faray ma ɗorayna vi Israyel kayni, kuɗ farana vi fok-dimi ma kis-ma'na, nigi ma vi jaram kepe, kay li ɗifin ma ŋal-goyna hiɗi ɗifinna vi lop ma slugon hiɗi namu, kay nam ma lin mi ɦu-dimi ma poora vigiya. Din mi Bum-Sumuna Ma-Vatɗina.

¹⁶Sum sa hay nagata kaf ma li vulda na'ta kay mulla vi Israyel.

¹⁷Mulla ma li ɗifin ma ŋal-goyna, vulda hiɗi niy ma yamam goyna hay yuldena, hay til ma wulina, hay sabatna, hay buur ma yuldena jar jafna vi Israyel kaf; nam ma li ɗifin ma kay sulukŋa, vulda, ɗifin ma ŋal-goyna, ɗifinna vi lop ma slugona kaw, kay poora kay jafna vi Israyel.

¹⁸Bum-Sumuna Ma-Vatɗina ka di ala: Hay buurta jewta vi til ma jewna, naŋ ma vi put-guju ma joriyo kepe ma moy may talamɗi, naŋ ma yaw sulukŋ goy kay liyn ma peldetna.

¹⁹Mul-ma-ɗifinna ma yaw busuwna vi ɦu ma ŋatam kay ɗifin ma kay sulukŋa, nam ma tunum kulo tam vun-ziyda, hay gef giwin-ma-ɗifinna fiɗi pete, tam dolla vi vun-ziyda vi wur-daŋŋa ma kalafna.

²⁰Naŋ ma li ki kayn nala kaw hay buurta siɗiyata vi tilla, kay san ma li suluk bay varta bay wida kaw; ki kayn nala nigi ma li poora kay Ziyda.

²¹Hay buurta doogo yam fiɗita vi til ma jewna, nigi ma li Paskata. Kayni ti yuldeta ta ir buur siɗiya. Nigi ma ti fun-bay-kufna.

²²Hay buur namna ɗawni, mulla ma li ɗifin ma kay sulukŋa hiɗi put-guju kep, kay por tuwamu, kay por sumuna kaw.

²³Jar buur ma siɗiyana vi yuldet lakŋi, nam ma li ɗifin ma ŋal-goyna tam Ma-Vatɗina hiɗi luway-jufay siɗiya, hiɗi fok-gamala siɗiya kaw ma moy may talamɗi, ŋat ɦu-ŋek kep hay buurta buurta kaw, kay ɗifin ma kay sulukŋa.

²⁴Nam ma vul futuwna ir dutta-kusta kepe kay put kep kep, hiɗi dutta-kusta kay ɦu-gamala kep kep. Doŋdoloŋ ma mula kay dutta-kusta kep kepe.

²⁵Hay buurta doogo yam vaslta vi til ma siɗiyana, hay yuldeta, nam ma li ɗifin namna ma kay sulukŋa ir buur siɗiya lo. Difin ma ŋal-goyna ŋray ca, vulda vi mula ma li ŋray ca nala kaw.