Read Masana EZEKIYEL 46 Bible Online

EZEKIYEL 46 - Masana bible

EZEKIYEL 46

¹Bum-Sumuna Ma-Vatɗina ka di'e ki kayn nala: Vun-ziyna vi wur-daŋŋa ma kalafna, ma iram muɗi kuɗuwna, ma hin dok-dok dukiya hay buur ma karkiyana vi lopna, may nigi ma malam goyo hay buur ma sabatna, nigi ma malam goy kaw hay buura vi til ma wulina.

²Hay li ma mulla kal kalafi, nam ma jik hay hagata vi diɓira vi vun-ziyna ma goy jiyna, nam ma col goboy tam dolla vi vun-ziyna; mul-ma-ɗifinna ma li ɗifin ma ŋal-goyna hiɗi ɗifinna vi lop ma slugona; nam ma girif gaa'a vok vun-ziyda, bugolda nam ma kali goyo, vun-ziyna nigi ma dukumɗi ta-ta hay vulatita.

³Sumuna vi nagata ma girif gaa'a vok Ma-Vatɗina hay vun-ziyda, hay buura vi sabatna hiɗi til ma wulina.

⁴Difin ma ŋal-goyna ma mulla maram tam Ma-Vatɗina hay buura vi sabatn ɗawni, guro fok-dimi karkiya hiɗi ɦu-gamala kepe ma moy may talamɗi.

⁵Nam ma vul futuwna ir dutta-kusta kepe kay ɦu-gamalana, vul ki nam min nala kay guro fok-dimina, doŋdoloŋ ta mula kep kay dutta-kusta.

⁶Hay buura vi til ma wulina, nam ma vul put-guju ma joriyo kepe, ma moy may talamɗi, guro fok-dimi karkiya hiɗi ɦu-gamala kepe ma moy talamɗi.

⁷Nam ma li vulda hiɗi futuwna ir dutta-kusta kepe kay put-gujuna, dutta-kusta kepe kay ɦu-gamalana, vul ki nam min nala kay guro fok-dimina, doŋdoloŋ ta mula kep kay dutta-kusta.

⁸Hay li ma mulla min kal kalafi, nam ma kal hay hagata vi diɓira vi vun-ziyna, nam ma hot kal goy hay hagata na'ta.

⁹Hay li ma sumuna vi nagata coowa vok Ma-Vatɗina kay li yuldeta, sa ma min kal kalafi kay girifa, la nam jikawa hay vun-ziyn ma gal kayamna, hay li ma nam hot goy ɗawni, nam ma jik hay vun-ziy ma gal gaana, sa ma kalawa kalafi hay vun-ziy ma kayamna, hay li ma nam hot goy ɗawni, nam ma jik hay vun-ziy ma gal gaana. Hay li ma san min kal goyo, nam ma jik hay hagata ta nam kali kalaf haya'taɗi, may nam ma kal goy hay hagat ta gafa'ta.

¹⁰Mulla ma kal kalaf kuɗsiya, hay li ma nisi min kal kalafi. Nam ma kali goyo hay li ma nisi min cuk goyo may.

¹¹Hay yuldeta hiɗi buur ma yuldena vigiya, vulda vigiya ma li ir dutta-kusta kepe kay put-gujuna, dutta-kusta kepe kay ɦu-gamalana, vul ki nam min nala kay guro fok-dimina, doŋdoloŋ ta mula kepe kay dutta-kusta.

¹²La mulla min li ɗifin ma ŋal-goyna, lebo ɗifinna vi lop ma slugona ma kuɗ minda, ziyna ma iram mali goyo hay gal kuɗuwu nigi ma malamti vunam goyo, nam ma li ɗifin ma ŋal-goyna hiɗi ɗifinna vi lop ma slugona, ki nam lum hay buura vi sabatna nala, bugolda nam ma kal goyo, hay li ma nam kalawa goyo, nigi ma duk vun-ziyna.

¹³Hay buurta kaf nigi ma vi goor ɦu-dimina ma busata valam kepna, ma moy talamɗina, nigi ma ŋalam goy ɗifini tam Ma-Vatɗina, nigi ma li kayni hay graw culumta dok-doko.

¹⁴Hay graw culumta kafe, kayni ti vulda ta nigi tapa' talamu: Gal ma karkiyana vi dutta-kusta, hiɗi gal ma ɦidina vi doŋdoloŋga kay hiliɓim hiɗi futuwna. Kayni mi vulda tam Ma-Vatɗina. Ɗota-gatta kayni hini jargiya kay dok-doko.

¹⁵Hay graw culumta kafe, nigi ma ŋat goor ɦu-dimina, li vulda, vul mula kaw, kay ɗifin ma ŋal dok-dokŋa.

¹⁶Bum-Sumuna Ma-Vatɗina ka di ala: La mulla vul va ɦawa'a mi kep jar gurona valamu, va ma nam vulum mi goora muɗi ti vocota vi gurona, muɗi mi ir vocota vi gurona.

¹⁷May la nam sli va kuɗ vocota valamu, vula' mi sa ma sunda valam mara kepe, va namna ir valamu ta-ta co tam busata vi butta-goyta, bugol kayni va namna ma hot vi mulla, vocota valam ma hin kayni mi gurona valam tuta.

¹⁸Mulla as yaw vocot hay ɓam sumunɗi, nam as yaw farayna visi kisiɗi, vocota ta nam vula' mi gurona valam ɗawni, nam yawa' kuɗ farayna valamu, kay sumuna vanu nigi ma yaw slena visi donoɗi.

¹⁹Nam tuɗan kuɗumu, hay liyn ma kal kalafna hay gal vun-ziyda, nam tuɗan hay ziy ma kalafna ma peldetna ma koti kay muliyan-sa-ɗifinna, ziy ma vunam muɗi hay gal ma gaana. Liyn mara ka kalaf kuɗuwu, hay gal ma vulatina.

²⁰Nam di tanu: Kayni mi liyn ma muliyan-sa-ɗifinna ma zal sliw ma ɗifinna vi jiw-zlata hiɗi sliw ma ɗifin ma kay sulukŋa, liyn ma nisi zal vulda haya, kay a nam ma co goy kir sumunɗi, irsi ma cuk kay sle ma peldetnaɗi.

²¹Nam kalan goy hay wur-daŋŋa ma goy jiyna, tuɗan tam gef wur-daŋŋa ma fiɗin pete. Hay wur-daŋŋa ma fiɗin pet daŋŋa valam ka'a.

²²Hay gef wur-daŋŋa fiɗi pete daŋŋa valam hiɗi yalam dukiya, fiyokka valam ir goldoŋ dok-ɦidi, buɗukka valam ir goldoŋ dok-ɦidi; kaf ŋaɓta valam ŋray ca, hay gef wur-daŋŋa.

²³Nam fiɗi kaf tuwam ŋuyiya, giwinna ay kotiya, cuki kulo goboyo kat tuwam ma ŋuyina.

²⁴Nam di tanu: Kayni mi liyna wi sum sa li tina, liyn ma sum sa gut hay lopna vi ziyda zal sliw ma sumun li ɗifin hiɗi namna.