Read Masana EZEKIYEL 47 Bible Online

EZEKIYEL 47 - Masana bible

EZEKIYEL 47

¹Nam tuɗan kalaf hay ziyda. Ɗuw na kayni, niyn ka kali goyo, gaa kuɗ vun-ziyda ma gaa kuɗuwna, kay ziyda ira' muɗi gal kuɗuwu; niyn ka jaŋay hay gal ɓam ma jufna vi ziyda, hay gal kayami vi giwin-ma-ɗifinna.

²Nam kalan goy jiya hay vun-ziy ma gal gaana, nam ŋuy hiɗi nan goy jiya, ta-ta goy jiy vi vun-ziyda ta ira' muɗi kuɗuwta. Nan ɗuw kayni niyn ka jaŋ goyo hay gal ɓam ma jufna.

³Hay li ma san kali goyo gal kuɗuwu, zigewn ka hay ɓalamu, nam ŋa goldoŋ birim ɗaw', nam ɦawan goloŋ hay niyna, niyn co ta-ta kulo vun hornay senu.

⁴Nam ŋa goldoŋ mara birim ɗaw lo, nam ɦawan hay niyn lo, niyn co ta-ta kulo ŋulofonu. Nam ŋa goldoŋ mara birim kep lo, nam ɦawanis vokan hay niyn lo, niyn co ta-ta kulo furanu.

⁵Nam ŋa goldoŋ mara birim ɗaw lo, niy-ma-riŋŋa namna nan as ɦawam loɗi, niy namna muɗi zul a nusum nusiya; ma san as a ɦawamɗi.

⁶Nam di tanu: Naŋ waawa su, goora vi sana? Nam tun vokanu, hotanay kulo deŋel niy-ma-riŋŋa.

⁷Hay li ma nam hotanay kulo deŋel hotna, nan ɗuw deŋel niy-ma-riŋŋa kayni gun ka ŋolo hay deŋelem kafe.

⁸Nam di tanu: Niy namna kayni ma kal goyo hay naga ma gal kuɗuwna, ma jik gaa hay Araba, ma kus hay niy-lum ma ŋolla; hay li ma niy namna kusawa hay niy-lum ma ŋolla, niy ma goloŋ hay niy-lum ma ŋolla ma muɗ goy kiliri.

⁹Slen ma irina ma geɗna kaf ma lak iriya hay liyn kaf ma niy-ma-riŋŋa ma jik haya; kulufna ma li hayam ŋol zututu, kay niy namna ma co ɗawni, niy-lum ma ŋolla ma muɗ kiliri, hay liyn kaf ma niy-ma-riŋŋa ma jik haya, slen kaf ma lak iriya.

¹⁰Sum sa ciwna ma lak hay liy namna, fokay hay Eyin-Gedi pa ta-ta hay Eyin-Eglayim, nisi ma ɓal den goloŋo. Kuluf namna ma li mi jaf kuluf ma goloŋ hay niy-lum ma ŋolla, nam ma li ŋol suwa.

¹¹Goloŋ gurayna hiɗi niy ma deŋelemna as muɗ kilirɗi, nam ma hinis goyo mi mandana.

¹²Hay niy-ma-riŋŋa, hay deŋelemu, hay galam kafe, gu ma vuɗna kaf ma daya. Goɗna valamu as yak goy gaaɗi, vuɗna valamu as ɓulakɗi, hay tilla kaf nam ma vuɗa, kay niyna valamu ma may goy hay liy ma peldetna pa. Vuɗna valamu ma li mi tina, humam ma goɗayna ma li mi gurgununa may.[15]

¹³Bum-Sumuna Ma-Vatɗina ka di'e ki kayn nala: Kayni mi jaara vi nagata ma nigi ma ɓurawam voco'o kay jafna vi Israyel sa doogo yam ma'na. Jafna vi Yosef ma fi galla ma'.

¹⁴Nigi ma yaw vocot ɗawni hena ki hen nala, ki nan yi va kanu hiɗi ɓan kulo meɗiya kay vula' mi sumaygiya nala. Naga na'ta ma hin ti vocota vigiya.

¹⁵Kayni mi jaara vi nagata; hay gal ma gaana, fokay tam niy-lum ma ŋolla pa, hay hagata vi Hetlon pa ta-ta hay vun Sedad,

¹⁶Hamat, Berota, Sibrayim, hay jaara vi Damas hiɗi jaara vi Hamat, Hatser-Hattikon hay gal jaara vi Havran.

¹⁷Ki kayn nala jaara ma fokis ɗawni, tun caw tam niy-lum ma ŋolla pa, tam Hatsar-Enon, hay jaara vi Damas, Safon hay gal gaa'a, hiɗi jaara vi Hamat: Kayni mi gal ma gaana.

¹⁸Gal ma kuɗuwna ma li ɗawni mi niy-lumna Yordan, jar Havran, Damas hiɗi Galaad, hiɗi nagata vi Israyel. Nigi ma li ŋaɓta valam ɗawni, tun cawis tam jaara ma gaan pa ta-ta tam niy-lum ma ŋolla ma gal kuɗuwna. Kayni mi gal ma kuɗuwna.

¹⁹Gal ma kayamna ma fokis kat Tamar pa ta-ta tam niyna vi Meriba hay Kades, ta-ta tam niy-ma-riŋŋa hay galla vi niy-lum ma ŋolla. Kayni mi gal ma kayamna.

²⁰Gal ma vulatina ma li mi niy-lumna ma ŋolla, fokay hay jaara pa ta-ta hay vun Hamat. Kayni mi gal ma vulatina.

²¹Nigi ma ɓuraw naga na'ta jargiya, kuɗ vuɗna vi Israyel kafe.

²²Nigi ma ɓurawam jar-tuwgi voco'o hiɗi ŋaɓta kuɗ ɦayta, kigi nigiya hiɗi sum sa pulla sa ka li ziy jargiya, sa min vuɗ guron jargiya; nisi ma muɗ si sum sa vuɗina jar sa Israyella. Nigi ma li ŋaɓta kuɗ ɦayta kay ɓuraw vocot jargiya hiɗi nisiya hay jafna vi Israyel.

²³Ki kayn nala, sa ma pulla, vuɗna ma nam mus hayamna ɗawni, vulum vocota valam haya kaw. Din mi Bum-Sumuna Ma-Vatɗina.