Read Masana EZEKIYEL 5 Bible Online

EZEKIYEL 5 - Masana bible

EZEKIYEL 5

¹May naŋu, goora vi sana, slaŋ kewta ta siy hiliw hiliw kepe, ti kew-beleta ta wel jiwera, naŋ ma sli kew-bele na'ta, naŋ ma wel yaŋ hiɗi na'a, wel jiweraŋ hiɗi na'a kaw. Bugolda naŋ ma sli va ma ŋa nekka, naŋ ma ɓuraw ɗuŋusn goyo.

²Gal ma ɦidina naŋ ma ŋalam hay kuta, goy jar hoyok-ziyna, hay li ma buura ma sli hoyok-ziyn asawa; naŋ ma sli gal ma ɦidina vi ɗuŋusna, naŋ ma kaam goy hiɗi kew-beleta, ŋuyum goy tam hoyok-ziyn kafe, gal ma ɦidina naŋ ma komis kulo jar simeɗna, nan ma calam kuɗum hiɗi kew-gaferaŋa.

³Naŋ ma yaw mara ne', naŋ ma junum hay vun sligara vaŋu.

⁴Naŋ ma yaw mara kuɗum lo, naŋ ma cukum hay kuta, ŋalamis goy hiɗi kuta. Kut ma kali goyo kay ŋal ziyna vi sa Israyel goy kafe.

⁵Bum-Sumun Ma-Vatɗina vi Israyel di ki kayn nala: Kayni ti Yerusalem. Nan tuna' kulo way jaf-sumun kafe, way nagata ta kata'ta kafe.

⁶Na' ŋel dita vanu hiɗi ɗota-gatta van kafe, nisi muɗi joo'o suw jaf-sumuna hiɗi naga ma ŋuyi galsin kafe, kay mige nisi noy dita vanawa goyo, nisi min poy kuɗ ɗota-gatta vanɗi kaw.

⁷Kuɗ na'ta Bum-Sumuna Ma-Vatɗina di ki kayn nala: Kay nigi yaw kulo katanu suw jaf-sum sa ŋuyi katgina, kay mige nigi min tuɗ kuɗ ɗota-gatta vanɗi, kay mige nigi min li kuɗ dita vanɗi, kay mige lita vigi kaw may ŋray hiɗi sum sa ŋuyi katgin noŋɗi,

⁸kuɗ na'ta kayni, din mi Bum-Sumuna Ma-Vatɗina: Nan kaw, nan min fok kulo'o kigiya. Nan min hob vun kitata van goy jargiya, goy kir jaf-sumun kafe,

⁹nan min li katgiya va ma nan bay lum tuwana, va ma nan ma lum loɗina, kayni kuɗ liwista vigiya.

¹⁰Kuɗ na'ta kayni, goy jargiya sumayna ma mut gurona visiya, gurona ma mut sumaysiya kaw. Nan ma hob vun kitata van katgiya sle ma hin kuɗgina nan ma merem goy jar simeɗna kafe.

¹¹Kay mige, nan ka iriya, Din mi Bum-Sumuna Ma-Vatɗina, kay nigi muɗ liyn ma peldetna goy liwisi hiɗi liwista vigi kafe, nan kaw nan ma vi tuwan goy jargiya, iran ma li zulo kigi noŋɗi, nan ma li tigi ɗawn hiɗi hayan har'.

¹²Gal ma ɦidina visiya bakmaran ma vatsiya, mayt ma vatsi goy jargiya; gal hena ma ɦidina kew-gaferaŋa ma vatsi goy jargiya, gal hena ma ɦidina nan ma merem goy jar simeɗna, nan ma calam kuɗum hiɗi kew-gaferaŋa.

¹³ɦiyda van ma tuɗ ta-ta hay ya' ma vatna, ɦiyda van ta tisita nan ma daba' ya' goŋ', hayan ma sleɗa, nala nisi ma wi ala nanu Ma-Vatɗina, nan lawawa hay hunayta vanu, ta-ta nan dab yam ɦiyda van goy tisi goŋ'.

¹⁴Nan ma ɓulak nagata vigi goyo, na' ma muɗ mi liyn ma liwisi vok ir sum sa ŋuyi katgin kafe, sum sa jik hay hagata ma wum kafe.

¹⁵Nagata vigi ma muɗ mi liyn ma sa li nar kalamɗi, ma sumun ŋulumu, sum sa ŋuyi galgina ma li ɦuyum' hay li ma nan ma hob vun kitata van katgi ɗawni, hiɗi ɦiyda ŋolda, hiɗi purcakka hiɗi kitata ŋolda, mi nanu, Ma-Vatɗina ma ka lawa.

¹⁶Hay li ma nan ma gi ɓarawta vi mayta ta lisi joot katsi ɗawni, nan ma kota' ŋaa'a kay cimsi goyo. Ɓaraw na'ta nan ga' ɗawni kay cimgi goyo; kay nan min tun mayta vun las ta co kigita, fun ma ka vungi kay ti ne' ne'na nan ma slum goy vungiya.

¹⁷Nan ma gi mayta hiɗi muur ma siyna jargiya, nam ma hingi goy bay guro'o, bakmarana hiɗi busuwna ma jik jargiya; nan ma hin kew-gaferaŋa co kigiya. Di kayni mi nanu, Ma-Vatɗina.