Read Masana EZEKIYEL 7 Bible Online

EZEKIYEL 7 - Masana bible

EZEKIYEL 7

¹Ma-Vatɗina ka di yoboyna tan ala:

²Naŋu, goora vi sana, humaŋ va ma Bum-Sumuna Ma-Vatɗina di'e: dabta vi nagata vi Israyel. dabta ka co'o hay gef-nagata ma fiɗin pete.

³Wulin kayni dabta ka co kigiya; nan min gi ɦiyda van gaa kigiya, nan ma ka kitat kigiya kuɗ lopna vigiya, nan min tungi liwista vigi kaf kigiya.

⁴Nan ma wigi hawgi loɗi, nan ma tun ŋalda van kigi noŋɗi. Kay lopna vigiya nan ma tunum kigiya, kay nigi ma ziyimu, liwista vigiya ma mus jargiya; nigi ma wi ala nanu mi Ma-Vatɗina.

⁵Ki kayn nala Bum-Sumuna Ma-Vatɗina di'e: Joota, joota ta ira' tayɗi. Humgiya na' ka co'o.

⁶dabta ka co'o, dabta na' ka co'o, na' zliyawa kulo katgiya, duwgiya na' ka co'o.

⁷dabta coowa kigiya, sum sa hay nagatna, liyn coowa, buura ka co goboyo, buur ma hiwirta, ciriyna vi firita may kulo kay hiɗiyn loɗi.

⁸Wulin kayni nan min yam ɦiyda van goy kigiya, dab yam ɦiyda van goy goŋ' katgiya; nan min ka kitat kigiya kuɗ lopna vigiya, nan ma tun liwista vigi kigiya, kay nigi ma ziya'a.

⁹Nan ma wigi hawgi loɗi, nan ma tun ŋalda van kigi noŋɗi. Lopna vigiya nan ma tunum kigiya kay nigi ma ziyimu, liwista vigi ma mus jargiya; nala nigi ma wi ala nanu mi Ma-Vatɗina, namu ma watgiya.

¹⁰Buur ɗaw tuɗini! Nam ɗaw coni, liyn coowa. zugulda goɗawa, subur-tuwta wulawa.

¹¹ɦawlata muɗawa ŋolo, muɗi ti zugulda kat joota vi sumuna, nisi hin loɗi, giji-gijina visi may loɗi, vok ŋolla may loɗi, sa as yor tuwam kuɗsi loɗi.

¹²Liyn ka co'o, buura ka co'o, hin sa ma gus slena li firi loɗi, hin sa ma gus slen goyna ti do'olla loɗi, kay ɦiyda ŋolda ka mun goyo, kat sum sa hay hoyok-ziyn kafe.

¹³Sa ma gus slen goyna ma fi vana valam loɗi, la nam ka malam jar sum sa irin kaw; kay vun-jobta ta diy kat vokŋa visiya ma hot goy bugola'ɗi, san gigekaw ma mus iriɗi kuɗ jiw-zlata valamu.

¹⁴Nisi ka buw togolomna, slen kaf kotiya, may sa ma tuɗ vun duura mayɗi, kay ɦiyda van ta ŋolda ka foki kulo'o kat vokŋa visi kafe.

¹⁵Kew-gaferaŋa goy jiya, bakmarana hiɗi mayta kalafi, sa ma ka goy sinena kew-gaferaŋa ma cumu, sa ma ka hay hoyok-ziyna mayta hiɗi moyna ma cumu.

¹⁶Cawsi ma hin goyna ma pir goyo, nisi ka kulo kay hiɗiyna, ki guk ma hay lokŋa nala, kaf ka tiya, gigekaw ka tiya kay joota valamu valamu.

¹⁷Ɓisi kaf muɗi maŋaya, ŋulofsi muɗi visi law-law'.

¹⁸Nisi ka cuki hiɗi sligar-bolla, narta ŋuysiyawa; irsi ka hobay hiɗi zulota, yisi kaf ka welay goyo.

¹⁹Nisi ma cuk gurjuta visi goy hay hagata, ora visiya ma muɗ mi va ma jok moyn kuɗ sa'a; doorota hiɗi ora visiya as butsi goyɗi, hay buur ma ɦiyda ŋolda vi Ma-Vatɗina; ciwta visi as hobɗi, haysi as hobɗi kaw; kay kayni mi hiɗiy ma dabsi sesina, mi va ma puksi gaana kaw.

²⁰Nisi subur tuwsiya hiɗi ganna visi ma jifiyna, nisi ceɗ va ma sli tuw sana ma liwisna, ma mar ɓulakka kisiya. Kuɗ na'ta kayni nan min muɗum mi va ma jok moyn kuɗsina.

²¹Nan ma hin sum sa pulla vurumumu, sum sa min li nagat joona ma slumu, ki va ma ɓuraŋŋa nala, kay nisi ma muɗum goy liwisi.

²²Nan ma muɗ iran goy katsiya, nisi ma muɗ timgilla van goy waa'a, sum sa coŋcoloŋŋa ma cuk kalaf hay ziyna vanu, ma muɗum goy ziy ma waa'a.

²³Kotgi jaɓna, kay nagata hobay hiɗi sum sa ci matna, hoyok-ziyna hobay hiɗi ɦawlata.

²⁴Nan min mar jaf-sum sa joota visi suwina, kay nisi ma sli ziyna visiya; nan ma vat subur-tuwta vi sum sa donon goyo, liyn ma peldetna visiya ma muɗis goy waa'a.

²⁵Ɓulakka coowa, nisi gar su'da, may su'da tayɗi.

²⁶Joot ka co voka' suwa suwa, labara co ay mi mara'a mara'a, nisi job tam sa jobta kay ɗeksi slena, may gatta tay hay vun muliyan-sa-ɗifinna loɗi, gatta tay vun sa maariyan loɗi kaw.

²⁷Mulla ka ti do'olla, sa yerimana ka vun hawta, sum sa hay nagata ɓisi visi bat-bat', nan min li tisiya kuɗ lopna visiya, nan ma ka kitat kisiya kuɗ poyta visiya, nala nisi ma wi ala nanu mi Ma-Vatɗina.