Read Masana DANIEL 2 Bible Online

DANIEL 2 - Masana bible

DANIEL 2

¹Hay busata ma'ta vi Nebukadnesar hay mulda, duwayt dumu, dikam muɗ vum bat-bat', senda may na kiramɗi.

²Mulla gi sunda kay yi sa li gul-yalda, sa ɗuw mislekŋa, sum sa guna hiɗi sa Kaldeena, kay nisi ma di caw duwayt goy mi mulla. Nisi co'o, lak kulo vok mulla.

³Mulla di tisiya: Duwayt danu, dikan may tun sukɗi, kay nan min fi caw duway na'ta.

⁴Sa Kaldeena di tam mulla hiɗi vun Arameena ala: Mulla, musaŋ iri ta-ta musge. Naŋ ma duma duway na'tiya, numa ma daŋgi cawa' goyo.

⁵Mulla hot sli ditiya, nam di tam sa Kaldeena ala: Dita van coli ala, la nigi ɗekan duway na'ta goyɗi, da' cawa' goyɗi kaw, nigi ma calis goyo, ziyna vigiya ma muɗ goy difir-fira.

⁶May la nigi ɗekan duway na'tawa, da' cawa'awa goyo kaw, nigi ma fi slen ŋolo ɦawa'a hay ɓanu, slen ma vulda ŋolo hiɗi suburta ŋolo kaw. Kuɗ na'ta kayni nigi ma dan duway na'ta, da' cawa' goyo kaw.

⁷Nisi hot dita sesi ma ma'na lo ala: Mulla, ɗekaŋ duway na'ta goy tam sa sunda vaŋu, nala numa ma daŋgi cawa'a.

⁸Mulla hot sli ditiya di'e: Nan wi goy gasi ala nigi min ba liyna, kay nigi wi dita ta nan cola'ta.

⁹May la nigi ɗekan duway na'taɗi, kita na'ta ma jungiya; wulini tuwgi ka kotiya kay dan yoboy ma sinna hiɗi ma waana, kay cub ta-ta a liyn kala. Kay na'ta ɗekangi duwayta, nala nan ma wi ala nigi nagay kay da' cawa' goyo.

¹⁰Sa Kaldeena hot dit tam mulla ala: Va ma naŋ mulla job kalam kayni sa mara hay nagata kep kaw ma as dum cawam goyo mayɗi. Kay mige, la mul marige kaw, la nam ŋolo, dono'o kaw, slen ma ki kayn nala nam bay jobom tam sa wi gul-liyna hiɗi sa wi caw mislekŋa hiɗi sa Kaldeena tuwa.

¹¹Kay va ma naŋ mulla jobom kayni nam lop ŋolo suw asa, sa mara'a ma as ɗek kayni vokaŋ naŋ mulla mayɗi, say lawayna sa musta visi may jar sumunɗina tuta.

¹²Kuɗ kayni mulla muɗ ɦiy ŋolo hiɗi purcakka suw asa. Nam vul hagata kay ci sum sa yalla sa hay Babilon kaf goyo.

¹³Nala ɗota kayni kali goyo, a nisi ma ci sa yalla kaf goyo, nisi gar Daniel hiɗi nuriyomna kaw kay cisi goyo.

¹⁴Hay na'ta Daniel di yoboyn ma yali, ma ŋali kaw tam Aryok, ma ŋolla vi sojen sa ŋom mulla, ma kali goyo kay ci sum sa yalla hay nagata vi Babilon kaf goyna.

¹⁵Nala Daniel sli ditiya job tam Aryok soje ma ŋolla vi mulla ala: Mulla vul vun-ma-gatna ma dono ŋol ki kayn nala kay mige? Aryok vi sem lawta goy mi Daniel.

¹⁶Nala Daniel kali kat mulla, Daniel siɗaw mulla kay nam ma hinim liyn neeɗa kay nam ma dum caw duwayt goyo.

¹⁷Bugol kayni Daniel kali vo hay ziyna valamu, nam vul labara tam Hananiya, Mikayel hiɗi Azariya, sa nuriyomna,

¹⁸kay nisi ma job slugota vi Lawn ma wuralawna a nam ma ɗeksi ŋayayta kayni goy kirsiya, kay Daniel hiɗi nuriyomna ma fi cita-goyta hiɗi sum segen sa yalla sa ka hay Babilonɗi.

¹⁹Hay na'ta kayni ŋayayta na'ta vulis kir Daniel hay li ma van ɗek tuwam kiramu hay henjeta. Nala Daniel subur Lawna ma hay wuralawna.

²⁰Daniel sli ditiya nam di'e: Suburta tam semda vi Lawna, hay vatɗit pa ta-ta hay vatɗita.

²¹Talam namu yalda hiɗi donota ka'a. Namu mi ma muɗ liyna hiɗi buura, ma cuk muliyan gaa'a, ma tun muliyana, ma vul yalda tam sa yalla, ma vul yamda-wida tam nisi sa ka hiɗi wida-yalla.

²²Namu mi ma pat dir slen ma zulu ma ŋayayna kaw goyna, namu wi slen ma ka hay jufunda, tam namu haraŋa ka'a.

²³Naŋ Lawna vi sumiyanu, nan tiyaŋ seŋu, suburaŋ kaw, kay yalla hiɗi donota ma naŋ vulanawa, kay naŋ ɗekanawa kay va ma vulawa kiranu, numa siɗawaŋ kalamu, kay naŋ ɗekmaawa kay lawta mi mulla.

²⁴Bugol kayni Daniel kal kat Aryok ma mulla vulum hagata kay ci sum sa yalla hay Babilon kaf goyna. Nam kali talamu dum ala: Naŋ ma ci sum sa yalla hay Babilon goyɗi, gan diran tam mulla, nan min dum caw duwayt goyo.

²⁵Aryok tuɗ Daniel gosoyo tam mulla, ka dum ala: Nan fi sa kepe jar sum sa yawsi ay goy hay Yuda pana, nam as daŋ caw duwayt goyo.

²⁶Mulla sli ditiya di tam Daniel ma nisi yum Belsasar: Daniel, naŋ nagay kay ɗekan kay duwayta, kay da' cawa' goyo kaw su?

²⁷Daniel hot dit tam mulla ala: Ŋayayta ta naŋ mulla min huma' cawa'ta kayni, sum sa yalla as fa' cawa'ɗi, sa wi caw mislekŋa, sa wi gul-liyna hiɗi sa tun gireyta kaf as ɗeka' kiraŋɗi;

²⁸may Lawna mara ka kep hay wuralawna ma ɗek caw ŋayayta goyo, namu ma as ɗek kiraŋ naŋu mulla Nebukadnesar slen ma min li'e hay buur ma vokŋa. Kayni ti duwayta ta daŋu hiɗi va ma vul tuwam kiraŋu, hay li ma naŋ ka buri gaa kay va ma buura vaŋu:

²⁹Naŋ mulla, hay li ma naŋ ka buri gaa kay va ma buura vaŋu, varta ta co kaŋga law kay slen ma min li'e hay liyn ma vokayna. Nam ma ɗek ŋayayta ɗekaŋawa kay slen ma min li voko.

³⁰La ŋayay na'ta ɗekawa kiranu, kayn min di ala yalla vanu suw sum sa irin kafe naɗi, may kayni kay dir duwayta ma diys goy taŋ naŋ mulla, kay naŋ ma wi varta vi dikaŋu kaw.

³¹Awa mulla, va vul tuwam kiraŋu, naŋ wi va ma sli tuw sana ma ŋolo, va ma sli tuw sana namna ŋol yo, wileta valamu laŋ ɦuyumu kaw. Nam ka coli kulo vokaŋu, nam ɗuw ir valam pa'.

³²Va ma sli tuw sana namna yalam ma kulona mi or ma bay-rigasna, war-digamu hiɗi gilaŋatamu mi doorona, hayamu hiɗi furamu mi wayn ma slawi may.

³³Gayamu mi kawaya, selemu galam kawaya, galam naga'a.

³⁴Hay li ma naŋ ka ɗuwumu, hiɗiyn kepe patay goyo, may hiɗi ɓam saɗi. Va ma sli tuw sana nam vum hay selemu ma kawayna hiɗi naga dirginna; muɗum goy butuwu.

³⁵Hay na'ta kawayna, naga-dirginna, wayna, doorota hiɗi ora tapay kaf guri goyo, muɗi ki burana ma simeɗna dolom goy hay muɗakŋ pa hay cayda nala. Simeɗn dolomu, sa may fum baŋalam noŋɗi. May hiɗiyna ma vi va ma sli tuw sana hay gayamna muɗi goy hiɗiyta ta ŋolo, nam hob nagata kafe.

³⁶Kayni ti duwayta ta daŋga. Numa min daŋgi cawa' goyo, mulla.

³⁷Awa mulla, naŋu mi mulla vi muliyana, kay Lawna ma wuralawna vulaŋ mulda gaŋeraŋa, donota hiɗi gajijita.

³⁸Hay liyn pet ma gurona vi sumuna ka lakay haya, muuriyan ma hay fulda hiɗi layayn ma dukalawn kaf, nam tunaŋ mul kisi kafe; yamda ta ora mi naŋu.

³⁹May bugolaŋ naŋu, mul tara'a ma day kulo'o, na' kiɗay suw faŋ naŋga, bugolda mulda ta sem ɦidit lo, na'a ma lin mi wayna, na' ma kol kay nagat kuɗulu.

⁴⁰Mulla ta sem fiɗita ma co lo, na' ma li hirliŋi ki kawayn nala; ki kawayn gur slen goyo tom goy kafe nala, nam ma gur slena tom goy kaf, ki kawayn to slen goy kaf nala kaw.

⁴¹Ki selemu hiɗi cita-selemu ma naŋ wumna nala, galam kawaya galam naga-dirginna kaw, mul na'ta ma ɓurawa; may va mara ma hin haya, donota vi kawayna ir ka haya, kay mige naŋ wi kawayna rigasay hiɗi naga-dirginna.

⁴²Ki cita-selemu ma naŋ wumna galam kawaya galam naga-dirginna nala, mul na'ta gala' ma li dono'o, gala' ma li maŋaya.

⁴³Ki kawayn ma naŋ wumna rigasay hiɗi naga-dirginna nala, cawa' kayni ala nisi ma tap tuwsiya hiɗi bonota vi sumuna, may nir na'ta kepe nisi may tapay kepɗi, ki kawayna hiɗi naga-dirginna as rigasɗi nala kaw.

⁴⁴Hay liyna vi muliyan nisina, Lawn ma wuralawna ma day yam mul tara kulo kepe, mul na'ta ma ɓulak goy noŋɗi, mulda na'ta jaf-sum sara ma kol ka'ɗi, mul hen lakŋi na' ma gurum goyo, tom goy kafe, mul na'ta ma mus ta-ta hay vatɗita.

⁴⁵Ki naŋ wi hiɗiyn kep patay goy hay hiɗiyt pa, may hiɗi ɓam saɗi, nam gur kawayn goyo, gur wayt goyo, naga-dirginna, doorota hiɗi or kaw. Lawn ma ŋolla ɗekawa kir mulla slen ma min li'e hay liyn ma vokŋa, duwayta kayni gasiya, cawa' ma di-goyna nagay a sa vi hayamu.

⁴⁶Ki kayn nala mulla Nebukadnesar girif gaa'a, nam dab vokom gaa'a vok Daniel, nam vul hagata kay nisi ma li ɗifini tam Daniel, lum ɗifin ma hiɗi urdina kaw.

⁴⁷Mulla sli ditiya di tam Daniel: Hay gasita, Lawna vigiya mi Lawna vi lawayna, mi Ma-Vatɗina vi muliyana, nam pat goy dir slen ma ŋayayna, kay mige naŋ pat dir ŋayayta na'ta goyo.

⁴⁸Bugol kayni mulla muɗ Daniel goy sa ma ŋolo, nam vulum farayn ŋolo. Nam vulum ŋolda kay nagata vi Babilon kaf, tunum mi ma ŋolla kay sa yalla vi Babilon kaf kaw.

⁴⁹Daniel siɗaw mulla kay mulla ma vul ŋomda vi nagata vi Babilon hay ɓam Sadrak, Mesak hiɗi Abed-Nego. Daniel kay tuwamu ka musi goboy kat mulla may.