Read Masana DANIEL 7 Bible Online

DANIEL 7 - Masana bible

DANIEL 7

¹Hay busata jewta vi Belsasar mulla vi Babilon, duwayt di Daniel, slen vul tuwam kiramu hay li ma nam ka buri gaa kay va ma buura valamu. Bugolda nam ɗo duway na'ta, vi labara kay sle ma ŋulona ma haya'na kaw.

²Daniel sli ditiya di'e: Nan ka ɗuwa hay li ma van vul tuwam kiranu hay henjeta, ɗuw na kayni, simeɗ ma biwna fiɗi may dukalawn pa, nam biw gaa kay niy-lum ma ŋolla.

³muuriyana ma ŋulona ma fiɗina kali goy hay niy-lumna pa, jafam tak-taki.

⁴Ma jewna sli zlon nala, gilaŋat bakŋa ay talamu; hay li ma nan ɗuwumu, gilaŋatna valamu patay goyo; nam sliys goy hay nagata pa, colay kulo kay selemu ki san nala, dikga vi sana vuli talamu kaw.

⁵Muura ma ma'na ka lo: Namu sli ursena nala;[3] nam colay kulo'o kay galam ta kepta; galam ma ɦidina ay vunamu, jar siyamu, dit diys talam ala: Fokaŋ kulo'o, mutaŋ sliwn ŋolo.

⁶Bugol kayni, nan ɗuw goy nala kayni, muur hena sli zinilla nala, zlimit layn ay piy ŋorom fiɗi, muur namna yalam ka fiɗi, kolda vulis talamu.

⁷Bugol kayni van vul tuwam kiranu hay henjeta lo, iran wi muur ma fiɗina, nam joo'o ŋolo, muɗaŋ nari, donota valamu ira' tayɗi, siyam fiyok ŋolo, mi kawaya kaw; nam mut, slen ma hinina nam gurum goyo, tayam gaa kuɗ selemu kaw; namu jafam valamu, may ki muuriyan hen naɗi, miyokom doogo kaw.

⁸Hay li ma nan ka peɗem miyokomu, miyok tara'a ta gooro dayay goy pa, miyok ɦidi kuɗ ma jewna patay goy kalamu, miyokŋ kayni ir ka kalamu ki ir sana nala, vunam ma di yoboyn ma galakŋa ka'a kaw.

⁹Hay li ma nan ka ɗuwa, nisi zlar zlamayn-mulda goyo, ma jewna vi buura mus gaa'a kalamu. Sligara valamu haɓ tal-tali ki mogoyn nala, ɗuŋus ma kalamna haɓi, ki ɗuŋus mirisna ma haɓna nala kaw; zlamda-mulda valamu ŋray ca hiɗi sin-kuta, se'a ki sem kekena ma ŋal hay kuta nala.

¹⁰Niy-lum ma kuta ka jaŋ goyo, ka riŋ goy vokom pa, sumun miliyoŋ ɗaw ka sunumu, sumun gu' gu' ŋolo ka zlaray vok iramu. Sa ka kitata zlaray gaa'a, ɗerwella mali goyo kaw.

¹¹Nan ɗuwa hay na'ta, kuɗ yoboyna ma galakŋa ma kali goy hay vun miyokŋa pana, hay li ma nan ka ɗuwum tuwa, muura ciys goyo, tuwamu vatay goyo, giy goy hay kuta kay ŋalamis goyo.

¹²Muuriya hegena donota valamu vatay goyo, may buura vi irita visi ɦuri voko ir liyn neeɗa.

¹³Hay li ma van vul tuwam kiranu hay henjeta, nan wi san kepe ŋray hiɗi goora vi sana, nam co'o kay ɗugulla ma wuralawna pa nam co tam ma jewna vi buura, nisi maram vok iramu.

¹⁴Nisi vulum kolda, suburta hiɗi mulda. Sumun kaf, jaf-sumun kaf, sumun kuɗ vunna kaf sunumu. Kolda valamu ti kolda ta vatɗita, ta as kay vat goyɗi, mulda valamu as vat goy noŋɗi.

¹⁵Nanu Daniel, dikan muɗ nar ŋolo, slen ma vul tuwam kiranu muɗan nar ŋolo.

¹⁶Nan tuɗ tam sa kepe jar nisi sa lakayna, nan jobomu kay gasita vi slen kayni kaf. Nam danu, ɗekanti cawam goy kafe kaw ala:

¹⁷muuriyan ŋulona ma fiɗin lakŋi si muliyan sa fiɗi sa min yaw kulo'o kay nagata;

¹⁸may sa peldetna vi ma Kulo-Jamna ma fi mulda, nisi ma ŋom mulda ta-ta hay vatɗita, hay busat voko voko.

¹⁹Bugol kayni nan gar kay wi gasita kay muur ma fiɗina, namu ma jafam ir valamu hiɗi muuriyan hegena, namu ma joo'o ŋolo, ma siyam kawaya, tirekem waya kaw, ma mut, slen ma hinina nam gurum goyo, tayam gaa kuɗ selem kafe kaw;

²⁰ki miyokŋ doogo ma ka kalamna, ki miyokŋ hena ma kali goyo, ma muur hegen ma ɦidina cuk gaa vokomu nala, miyok ma iram ka'a, hiɗi vunam di law ma galakŋa, nam ɗuw ir ŋolo suw muuriya hegena kaw.

²¹Nan wi'e nanige miyok namna dur hiɗi sa peldetna kol kisiya kaw,

²²ta-ta ma jewna vi buura co'o, kay ka kitata ɗigerta kay sa peldetna vi ma Kulo-Jamna, liyn co'o kay sa peldetna fi lak hay mulda.

²³Nam di tan ala: Muur ma sem fiɗina, kayni ti mulda ta sem fiɗita ta min tun gaa kay nagat tani, na' may ŋray hiɗi mul henɗi, na' ma kol kay nagat kafe, na' ma tay nagat gaa'a, gura' goyo kaw.

²⁴Miyok ma doogona kayni ti mulda doogota ta min yaw kulo'o. Mul tara'a ma fok kulo'o bugolsi lo, nam ma li ir valamu hiɗi mulda ta jewta, nam ma hot yam muliyan sa ɦidin gaa'a.

²⁵Nam ma di yoboyn joo'o kat ma kulo-Jamna, nam ma curoɗ sa peldetna vi ma Kulo-Jamna, nam ma var kay muɗ liyna hiɗi gatta kaw, sa peldetna ma vulis hay ɓalamu ir liyn kepe, ir liyn ca, vi gal liyn kepe kaw.

²⁶Bugol kayni kitata ma co'o, nisi ma yaw kolda valam goyo, nam ma ɦoys gaa'a, vatis goyo kaw kay dok-doko.

²⁷Mulda hiɗi kolda, ŋolda hay nagata gaa kuɗ dukalawna kaf ma vulis hay ɓam sum sa peldetna vi ma Kulo-Jamna. Mulda valamu ti mulda vatɗita, sum sa koli kay sumun kaf ma sunumu, hum kuɗumu kaw.

²⁸Kayni mi vatta vi labara. Nanu Daniel, varta vanu geɗay ŋolo, iran zoɓa, nan ŋom yoboyn kayni hay dikanu.