Read Masana DANIEL 8 Bible Online

DANIEL 8 - Masana bible

DANIEL 8

¹Hay busata ɦidita vi Belsasar hay mulda, nanu Daniel, va vul tuwam kiran lo, kayni bugol va ma vul tuwam kiranu hay sem ma jewna.

²Nan ka ɗuwa hay li ma van vul tuwam kiranu, hay li ma nan ka ɗuwa, nan ɗuw ki nan ka hay Susa naga-ŋolda, kuɗ nagata vi Elam, hay li ma nan ka ɗuw va namna, nan ka colay kel niy-lumna vi Ulay.

³Hay li ma nan poŋ iran kulo'o, iran wi ɦu-gamalan kep ka colay vok niy-lumna, miyokom ka ma'; miyok namna kulo fiyoko, may ta kepta kulo fiyok suw ta heta, may ta fiyok suwta day kulo bugolda.

⁴Nan wi ɦu-gamalana ka dab hiɗi miyokomu hay gal ma vulatina, gal ma gaana hiɗi gal ma kayamna. Muur mara'a ma as kay col vokomu mayɗi, sa ma as kay hulot va goy hay balam mayɗi kaw. Nam li va ma nam mina, nam wul vokom suwa.

⁵Hay li ma nan ka var kalamu, nan wi ɦu-ŋekŋa may hay gal ma vulati pa, nam ka tuɗ kulo kay yam nagat kaf, may nam may jo yam nagatɗi, ɦu-ŋekŋa namna ka hiɗi miyok ma laŋ ɦuyumna jar iramu.

⁶Nam co tam ɦu-gamalana ma miyokom ma'na ma nan wum coli kel niy-lumna, nam jaŋ kuɗumu hiɗi dono'o.

⁷Nan wum kayni, nam co kat ɦu-gamalana, nam muɗi talam ɦiy ŋolo, nam dab ɦu-gamalana, kusum miyokom ma ma'na goyo, ɦu-gamalana may fi donota kay cok digamɗi, nam gum gaa kay nagata, tayam gaa'a, sa ma as but ɦu-gamalana goy hay ɓalam mayɗi.

⁸ɦu-ŋekŋa muɗi ŋol suwa, may hay li ma nam muɗ gaŋeraŋe, miyokom ta ŋolda kus goyo. Miyok hena ma laŋ ɦuyumna fiɗi day kulo'o hay baŋalamu, jar simeɗ ma fiɗina vi dukalawna.

⁹Miyok mara'a dayay kulo jaram pa, goor ŋolo, nam wul kulo ŋolo hay gal ma kayamna, hay gal ma kuɗuwna, hiɗi gal ma ŋaa suwna vi nagata.

¹⁰Nam wuli kulo'o ta-ta co tam vokŋa ma dukalawna, nam cuk galla vi vok ma dukalawna hiɗi mislekŋa gaa'a, nam tayam gaa'a.

¹¹Nam sli yalam kulo'o ta-ta co tam mulla vi vok-ma-duura, nam yaw lopna vi ɗifin ma dok-dokŋa goy kalamu, ɦo liyna valam ma peldetna goy gaa'a kaw.

¹²Vok-ma-duura vulis goyo hiɗi ɗifin ma dok-dokŋa, kuɗ sulukŋa valamu, miyokŋa zut gasita gaa kay nagata, slen pet ma nam min li'e nam lumu.

¹³Nan hum sa ma peldetna kep ka kus yoboyna. Sa mara'a ma peldete di tam nam ma ka kus yoboyna ala: Va ma vul tuwam kiraŋu kay ɗifin ma dok-dokŋa, kay sulukŋa ma ɓulak liyna, kay liyn ma peldetna hiɗi vokŋa sa tayay gaana ma li lancitige?

¹⁴Nam di tanu: Ta-ta vulatita hiɗi grawta tap pet birim ma' hiɗi kis-ɦidi, bugol kayni liyn ma peldetna ma hot tuna.

¹⁵Nanu Daniel, hay li ma nan ka ɗuw va ma vul tuwam kiranu, nan gar a humum cawamu, hay na'ta sa kepe ka coli vokan zaw, nam sli sana nala.

¹⁶Nan hum del sana ka siwel jar niy-lumna Ulay ala: Gabriel, ɗekem caw va ma vul tuwam kiraŋŋa.

¹⁷Nala nam co goboy kat liyn ma nan ka coli hayna; hay li ma nam co'o, nan muɗ nari. Nan dab vokan gaa kay nagata. Nam di tanu: Goora vi sana, humaŋu, kay va ma vul tuwam kiraŋ kayni ɗek kay dabta vi liyna.

¹⁸Hay li ma nam ka kus yoboyn tanu, nan ŋel goy diwiŋ', dab vokan gaa kay nagata, nam jonu, colan kulo'o hay liyn ma nan ka coli hay zawna.

¹⁹Bugolda nam di tanu: Nan min daŋ kay va ma min li'e hay dabta vi ɦiyda-ŋolda, kay vatta vi liyna buura valam ka coli zaw.

²⁰ɦu-gamalana ma naŋ wi'e, ma miyokom ka ma', kayni si muliyana vi sa Medena hiɗi sa Persena.

²¹ɦu-ŋekŋa ma ɗuŋus talamu kayni mi mulla vi Yavan*, miyok ma ŋolla ka jar iramu, kayni mi mul ma jewna.

²²Miyok namna kusi goyo, miyok ma fiɗi ma day kulo hay baŋalamu kayni ti mulda fiɗi ta min day kulo'o jar jaf namna pa, may nisi as fi dono valamɗi.

²³Hay li ma mulda visi vatawa, hay li ma sa sulukŋa ŋalawa goyo, mul mara kep ma min wasta ŋolo, ɦawlat hayamu kaw ma fok kulo'o.

²⁴Gaŋeraŋa valamu ma li ŋolo, may hiɗi donota valam kay tuwamɗi, nam ma ɓulak slen goy ŋolo ŋolo, slen ma nam min lumna ma li kafe, nam ma vat sum sa donona hiɗi sa peldetna kaf goyo.

²⁵Kuɗ asta valamu hiɗi ɗutta valamu ta tuɗ voka'a, nam ma li wasta hay dikamu, nam ma ci sumun ŋolo sa ka lakay kiliŋi, ma fok kulo'o kay mulla vi muliyana, may nam ma ɓasis goyo, bay sa gut kuɗumu.

²⁶Va ma ɗeki goy kiraŋu kay vulatita hiɗi grawta kayni ti gasita. May naŋu, ŋayaŋ wid-ŋayay na'ta maŋ naŋu. Kay na' law kay liyn ma vok gine'e.

²⁷May nanu Daniel, nan muɗi maŋay ŋolo, muɗi moyo kaw ir buur ŋolo; bugolda nan fokay kulo'o li sunda vi mulla. Tuwan muɗi wiranu kuɗ sle ma vul tuwam kiranu. Sa may wum cawam noŋɗi.