Read Masana HOSEYA 10 Bible Online

HOSEYA 10 - Masana bible

HOSEYA 10

¹Sa Israyella ay jew kayn ki gulda-guldan ma liy ŋol nala. Vuɗna visi ay ŋolo. Hay li ma vuɗna visi jor vokom kayni, liyn ma li ɗifinna visi ŋol suwa; hay li ma nagata visi ka muɗ faraya, slen ma girif Lawayna nisi inim ŋol suwa.

²Diksi ɓuraway ma', nala nisi ma ziy makka. Liyn ma ɗifinna visiya Ma-Vatɗin ma ɦom gaa'a, slena visi ma inina nam ma zutum gaa'a kaw.

³Mus neeɗa nisi ma di'e: Naya, la mulla vay may loɗi, kayn kay nay min li nar kuɗ Lawnɗi. Wulin lakŋ nay gar mul lo kay nam lum tayn mi mige?

⁴Nisi di yoboyn ma waana hay vunsiya, yi slen kisi bay li kuɗumu, hay li ma nisi jun bonotawa, kitat ya' day kulo'o, ki gu ma galakŋa day jar gu ŋaan hay sinen nala.

⁵Sum sa hay Samariyana sutaysi ma to'o, kay put ma nisi inim hay Bet-Avenna, nisi ma tiya kay lawna visi namna, muliyan-sa-ɗifinna vi Lawayn tuwsi ma visi buk-buk kalam namu, kay gajijita valam ta jarsita ma vat goyo.

⁶Lawna visi namna ma slumis goy hay Asiriya, ki vulda-ɦawat nala tam mulla Yareb. Sumuna vi Efrayim liyn ma viy kirsiya. Sum sa Israyella ma muɗ zulo'o kay var ma haysina.

⁷Sum sa Samariyan hiɗi mulla visi lay yisi dabawa goboyo, ki kufa ma buri kulo kay niyn nala.

⁸Liyn ma jiŋiliŋŋa ma hay Bet-Aven, ma sum sa Israyel li suluk kulo kalamna, ma to goy gaa'a; gu-ma-zigiyna ma day baŋal liyn ma ɗifinna visiya. Nisi ma di tam hiɗiyna: Ŋayma ŋayge, ma di tam liyn ma jiŋiliŋŋa: ɦoŋ gaa kuma'a ɦoge.

⁹Hay buura vi Gibeya pa nigi li suluku, Israyella. Nisi ay lakay kulo kay sesiya. Sum sa jiw-zlata duur fisi kuɗsi vo hay Gibeya ɗisu?

¹⁰Nan ma watsi ki nan min nala, jaf-sumun ma tok tuwsi katsiya, ma junsiya kay sulukŋa visi ma jabi kay tuwam ma'n lakŋi.

¹¹Sumuna vi Efrayim nisi ki putta ta ɗelit nala, ta min to wana. May nan min co goboyo tam pelsiya, nan ma tun jukŋ hay del sumuna vi Efrayim, Sumuna vi Yuda ma zuma, Sumuna vi Yakub ma kot hay sinenis bugolsiya.

¹²Cukgi jafn hiɗi ɗigerta, feɗgi sinen hiɗi slugota, Kotgi sine ma wuliya, liyn ma gar Lawn asawa, ta-ta hay buur ma nam ma hoti was ɗigerta valam goy kigiya.

¹³Nigi zumgi jootawa, may nigi feɗgi jiw-zlatawa, nigi ti vuɗna vi sindawa; kay nigi tun vida vigi kay hagata vigiya, nigi tun vida vigi kay sumuna vigi sa wi duura.

¹⁴Gijum-gijumta ŋolda ma fok kulo jar sumuna vigiya, Gulmun ma donona vigi kaf ma ɦo gaa'a, ki Salman ɦo Bet-Arbel goyo hay buura vi duur nala, hay li ma nisi kirap sumda hiɗi guron gaa kuɗ sesiya.

¹⁵Kayni mi va ma min nemgi hay Betel ɗawni, kuɗ jiw-zlata vigi ta suwi ŋolda. Liyn fo goy foge. Mulla vi Israyel yalam dabawa.