Read Masana HOSEYA 13 Bible Online

HOSEYA 13 - Masana bible

HOSEYA 13

¹Ma-Vatɗin di'e: Hay li ma sumuna vi Efrayim ka di va'a, Sum segen li nar kisiya. Sesi tiy ŋolo jar sa Israyella. May nisi kal tuwsi hay joota kuɗ Baal. Nala nisi mitawa.

²Wulin kaw, sumuna vi Efrayim ka tuɗ vok dok-dok hay sulukŋa. Wulin lo nisi ka kot va ma girifna, ka yorom hiɗi gurjuta visiya. Lawayn ma waana nisi kotom kuɗ minda visiya. Kaf kayni mi lopna vi sa ma in slen hiɗi ɓalamna. Sumun di kisi ala: Nisi sa ɓi sumun ɗifinna, nisi ka bow guro-luwayn gaa'a.

³Kuɗ kayni nisi ma liys ki ɗugul ma graw culumta nala, ki maɗay ma graw culumta ma gaz goy bay lopna nala. Ki burana ma simeɗna dolom goy gine hiɗi muɗakŋa nala. ki no'osna ma kal goy hay ir-ziyn nala.

⁴May nanu, nan mi Ma-Vatɗina Lawna vigiya, ay hay nagat Egipte pa. Nigi ma gar law maraɗi, garanti nan kepe. Sa mara ma suɗgi mayɗi, mi nan kepe.

⁵Nan ŋomgi ay hay fulda hay liyn ma goy soyna

⁶Haysi hob hiɗi ŋom ma nan ŋomsina, nala suburta kal hay diksiya, kuɗ kayni yisi jokan goyo.

⁷Nala nan ma muɗ katsi ki zlon nala; ki zinilla nala, nan ma jetsi goy hay hagat neŋ neŋ'.

⁸Nan ma bowsiya, ki ursena,[3] ma goora valam sliy goyn nala, nan ma jetsi war-digsi goyo. Nan ma mutsi ki zlon mut san nala, muuriyan ma fulla ma jetsi goy neŋ neŋ.

⁹Sum sa Israyella, nigi ma ɓulak goy ɗawni kay nigi min hum kuɗanɗi, sa ma gut kuɗgina nigi noyom gatta valam goyo.

¹⁰Wulini mulla vigi ka arige? Nigi yumi wulini kay nam butgi hoyok-ziyna vigi goy yo! Sum sa ka kitana vigina sa nigi job tisi ala nisi vulgi muliyana hiɗi yerimana, nisi wulin ka arige?

¹¹Hay ɦiyda vanu nan vulgi mul kep, hay li ma ɦiyda van jor ŋolo, nan hot slum goy kigiya.

¹²Jiw-zlata vi sumuna vi Efrayim ka ŋomi ta', sulukŋa visi ka ŋomi kan tuwa ta'.

¹³Tuwtita ta co kisit ɗawni, ki tuw-tita vi cat ta min puka nala; goor ma nisi vuɗum ɗawn yal ŋolɗi, hay li ma liyna valam asawana, nam ma kali goy hay dig sulumɗi.

¹⁴Nan ma butsi goy ɓam mitta, nan ma gussi hay ɓam mitta. Mitta, bakmarana vag ka arige? Liyn ma kiwena, donota vaŋ ta ɓulak sumun ka arige? May hamda ka viy goy kiranu.

¹⁵Sumuna vi Efrayim vuɗ jafn ŋolo jar ɓosiyosina, may simeɗ ma gal kuɗuwna ma co'o, simeɗna vi Ma-Vatɗina ma patay kulo'o hay fulda, ma tosi sutaysi goyo, kaata visi ta law niyn kaf ma so goyo. Slena visi ma tek ŋolla, hiɗi farayna visi kaf ma ŋalis goyo.