Read Masana HOSEYA 14 Bible Online

HOSEYA 14 - Masana bible

HOSEYA 14

¹Sum sa hay Samariya kaf ma fi kitata, kay nisi fok kulo kat Lawna. Kew-gaferaŋa ma calsi goyo; gurona visi sa gurayna ma kirapis gaa sem sumuna, boyna visi sa ka wiira sumun ma ɓetsi haysi goyo.

²Nigi sa Israyella, hotgiyay tam Ma-Vatɗina Lawna vigiya. Kay cukgi gaa kayn ti jiw-zlata vigiya.

³Margi yoboy hay vungiya (yoboy ma hamda), Hotgiyay tam Ma-Vatɗina. Nigi ma dum ala: Sulukŋa vuma kaf zawn naŋ cukmat cage, naŋ vuma hiɗi dikaŋ ŋaa vige, wulin kayn numa vulaŋgi hay baŋal luway ma jufayn ɗawn mi yoboy ma hay vunmana.

⁴Sa ma Asiriya ma suɗma goy mayɗi. Numa as ɓe kulo kay kulumay loɗi, sle ma numa kotom hiɗi ɓuma'na, numa as yum ala Lawn vuma'a loɗi. Kay kataŋ naŋ kayni sa ma kuyuna fi teŋ-irta.

⁵Nan ma yersi goyo kay bay-vida visiya, nan ma minsiya hiɗi dikan kafe. Kay dikan ma ɦiy kisin tunawa gaa'a.

⁶Nan ma li ki maɗay ma gina nala kay Israyel, nisi ma ɓo ki tayn nala, sutaysi ma cuk gaa'a ki gu ma hay Libaŋ nala.

⁷Ɓalam ma ɓet goy ŋolo. Jifiyta valam ma ŋra hiɗi gu-diveŋ ca', ma muɗ his faya ki gu ma hay Libaŋ nala.

⁸Nisi ma hotiya, nisi ma lak gaa kuɗ ŋusanu. Nisi ma hot zum alkamaren lo, nisi ma hot ɓo ki vuɗna vi gulda-guldan nala; sesi ma tiya ki vinna ma hay Libaŋ nala.

⁹Sumuna vi Efrayim, nigi as lum hiɗi Lawayn ma waana mi meloge? Nan ma humsiya, nan ma cuk iran kuɗsiya. Nanu, nan ki gu-sipre nala, dok-dok humam goɗiya. Vuɗna vigi may goy hay nan pa.

¹⁰Sa ma yalla valam asayna hinim ŋom sle namna hayamu. Sa ma yalam tuɗ ŋaana humam ma hum sle namna. Kay hagata vi Ma-Vatɗin ka ɗigere. Sum sa ɗigera ma poy haya'a, may sa ŋel-gatta ma cuk gaa'a.