Read Masana HOSEYA 5 Bible Online

HOSEYA 5 - Masana bible

HOSEYA 5

¹Humgi dit kayni, nigi muliyan-sa-ɗifinna. Tungi ŋalgiya, Nigi ziyna vi Israyella, jakgi humgiya, Nigi sum sa hay ziyna vi mulla. Kay kitat kayni na' ka kaay kigiya, kay nigi ay muɗi ki jawta ta gani gaa sem san nala hay Mispa, Nigi ay muɗi ki luwanda ta ɓalay kulo kay hiɗiyt Tabor nala.

²Hiɗi ɗifin ma nisi lumna, sum sa bay-gasina sir gaa voksi hay mat ma cina. May nisi kaf nan ma watsiya.

³Sumuna vi Efrayim nan wisiya, Sumuna vi Efrayim as ŋay tuwsi kan noŋɗi. Wulin kayni, nigi sumuna vi Efrayim, muɗ tuwgiyawa viyuwu, Sumuna vi Israyel goɓ tuwsiyawa.

⁴Lop ma nisi lumna as hinsi a hoti tam Lawna visi loɗi, kay mige ŋusta vi viyuwta ka jarsiya. Kay mige nisi min wi Lawnɗi.

⁵Subur-tuwta vi sum sa Israyel ka li di-goyt kisi kay tuwa'a, sum sa Israyella hiɗi sumuna vi Efrayim ma cuk gaa'a, kuɗ jiw-zlata visiya; Yuda ma nig gaa hiɗi nisi lay.

⁶Hiɗi fok-dimina visiya, hiɗi luwayna visi lay, nisi ma tuɗ gar Lawna, may nisi ma fumɗi: Kay nan ŋay tuwam goy kisiya.

⁷Nisi min vi kuɗ Ma-Vatɗinɗi, kay mige nisi vuɗ guro sa pullawa ŋolo, wulin kayn til kep ɦawa asay a vatsi goy hiɗi faraysi noŋ kirap'.

⁸Buwgi togolomna hay Gibeya, buwgi togolomna hay Rama, ciriygi kulo ŋolo hay Bet-Aven, nisi ka bugolaŋu Benyamin.

⁹Hay buur ma kitat ɗawn Efrayim ma jet goyo, nan dum tam sumuna vi Israyel kayn mi law ma gasina.

¹⁰Sa ŋulona vi Yuda nisi ki sum sa jok jar-liyn goyn nala; nan ma puruf ɦiyda van goy kisiya ki niyn-ma-riŋŋa nala.

¹¹Sa fi Efrayim muɗi sar ŋolo, sutaysi toy kay kitata, kay nisi tap kuɗ gat ma sinna.

¹²Nan ma muɗ tam sa fi Efrayim ɗawn ki fotn nala, nan ma muɗ tam sumuna vi Yuda ki mil ŋayakŋa nala.

¹³Sumuna vi Efrayim irsi ka wi joo ma nisi ka lumna, sa fi Yudana ka wi mil ma tisina; sa fi Efrayimna ka kal hay Asiriya, ka giɗel del mul ma Yarebna, may mul namna ma as kay yergi goyɗi lay, as li gu vun milla vigiɗi lay.

¹⁴Sumuna vi Efrayim nan muɗ tisi ɗawn ki zlon nala, Sumuna vi Yuda kaw nan ma muɗ tisi ki goor-zlon nala lay. Nanu, nan ma jetsi goyo, bugolda nan ma tun iranu, nan ma yawsiya, va ma jenna van sa ma as hulotom goy hay ɓan mayɗi.

¹⁵Nan ma tuɗa, nan ma hoti hay ziyna vanu, ta-ta hay li ma nisi ma di goy hiɗi vunsi ala nisi joo'o, tun caw garanu, hay li ma nisi coowa hay vun-zlata, nisi ma hot yan lo.