Read Masana HOSEYA 8 Bible Online

HOSEYA 8 - Masana bible

HOSEYA 8

¹Buwgi togolomna hay hum sumuna! Kay sa ma gawta ka sir gaa kay ziyna vi Ma-Vatɗina, ki bakŋ nala, kay bonot ta juni jarmata nisi kusa'awa, vun-ma-gatna van kaw nisi rawamawa goyo.

²Nisi ma hoti siwel tan ala: Lawna vuma'a, numa hot waŋu, numa lakŋ si Israyella.

³Israyella noy ŋaat goyo, sa ma gawt ma digiɗsiya.

⁴Nisi tun muliyana visi kisi bay minda vanu, tun sa ŋulo kisina bay nan hum noŋo, gurjuta visiya hiɗi ora nisi gusum goy laway ma ceɗaya, kuɗ kayni nisi ma vat goyo.

⁵Nigi sum sa Samariyana, goor-putna vigi Lawn noyomawa goyo, nan muɗawa tisi ɦiy ŋolo. Sum nisina ma lak hay liwista bay por tuwsiya ta-ta lancitige?

⁶Nam may goy hay Israyel pa, ceɗem mi sa'a. Nam may mi Lawn ma gasinɗi. Kuɗ kayni putna vi sum sa Samariyana ma yakis goy kep kep.

⁷Nisi cukum jaf mi simeɗna, may nisi ma feɗem ɗawn mi hiwliŋŋa. Alkamarena visi as cuk yalam loɗi, ma yalam cukawa goyona as a li futuwɗi kaw, ma li futuwna tum ɗawn si sum sa pulu.

⁸Sa Israyella vatawa goyo. Wulin nisi jar sum segen kayn ki doway ini ma niyam mayɗin nala.

⁹Nisi kalay gar sum sa Asiriyana, ki kuro ma fulla col goy valam kep nala, sumuna vi Efrayim vul slen ɦawa'a kay gar bonota.

¹⁰Lali nisi ɓuraw slen goy jar sum segen nala kaw, nan min toksi wulini, hini neeɗa ɦawa nisi ma las ŋolo, kay ziy jak ma nekŋa vi muliyana hiɗi sa yerimana.

¹¹Sa fi Efrayimna kot liyn ma ɗifinnawa ŋolo kay li suluku, liyn ma ɗifin namna cuksiyawa gaa hay sulukŋa.

¹²La li vun-ma-gatna vanu nan ɗom tisi kaf kaw, nisi saram ɗawn ki sle ma pul nala.

¹³Slen ma nisi as lum ɗifin tanu, nisi ŋat slena, nisi mutumu, may nam may kir Ma-Vatɗin ŋaa noŋɗi. Wulin kayn Ma-Vatɗin humam gumawa kay jiw-zlata visiya. Nam ma ka kitat kay sulukŋa visiya. Nisi ma hot hay Egipte.

¹⁴Sum sa Israyel yisi jok sa ma kotsinawa, tun mulda visiyawa kay tuwsiya. Sumuna vi Yuda kot ziy ma gulmun talamnawa, may nan min gi kut kuɗ hoyok-ziyna visiya. Kut ma ŋal ziyna visi ma mulda tuni hayna.