Read Masana JOWEL 2 Bible Online

JOWEL 2 - Masana bible

JOWEL 2

¹Buwgi togolomna hay Siyon, buwgit kulo ŋolo kay hiɗiyta van ta peldetta, a sum sa hay nagatna tuwsi ma visi bat-bat'. Kay buura vi Ma-Vatɗina ka ma'a, kay nam ka goboyo,

²buur ma jufun nil'; buura vi ɗugulla hiɗi liyn ma duk gaana, nam ka co'o, ki liyn ma tun caw cal goy grawtna vul haraŋa valami jew tam hiɗiyn nala. Duwgi jaf-sumun ŋolo, dono'o kaw natige. Nay bay wi sum sa kisi nisi nala tuwa, vok ɗaw kaw nay as a wi sum sara kisi nisi naɗi lay.

³Voksiya kut ka ŋala, bugolsiya sin-kuta ka tileka. Nagat ay jew ki sinen eden nala, may hay buur namna nagat muɗi mi ful ma wiŋŋa, kay va ne' kaw hin kuɗ kut noŋɗi.

⁴Naŋ ɗuwsi kayn nisi ŋray ca ki kulumayn ma sumun ɓe kalamu kay jaŋamu nala.

⁵Naŋ jak humaŋ tisi kayni, suwana visi ki suwana keke-ma-duura, ma ka jaŋ kulo kay yam hiɗiyt nala, ki suwana vi kuta, hay li ma na' ka ŋal hosona hay fulda nala. Ki soje sa donona ka kot tuwsi kay tuɗ vun duura nala.

⁶Sumun tuwsi visi kisi bat-bat'. Ir sumun ka zoɓ gaa'a.

⁷Nisi tuɗ voksiya ki sum sa tuɗ vun duura nala, nisi pir kay gulmunna ki sum sa tuɗ li duura nala; gigekaw iram cuki vokom hay hagata valam ŋiresl, cal hagata valam goyɗi.

⁸Nisi may tupa tam tuwsi noŋɗi, gigekaw wum mi liyn ma nam coli hayamna, nisi tuɗ tam liyn ma voksina, va ma telsi a ɦur voksiɗin mayɗi.

⁹Nisi mer goy hay hoyok-ziyna, jaŋ kulo kay gulmunna, jik kulo kay ziyna, cuk hay ir-ziyna ki sa ma kulla nala.

¹⁰Nagat ka wir voksiya, dukalawn geɗiya, fatta hiɗi tilla muɗi jufunu, mislekŋa vul haraŋa valam loɗi.

¹¹Ma-Vatɗin di delem goy kir vok-ma-duura valamu; kay vokŋa valam ka ŋolo, sa nam cuksina nisi dono ŋolo; kay buura vi Ma-Vatɗin nam ŋolo, ɦuyumda kuɗum ŋolo kaw. Col digam ɗawn gige?

¹²Ma-Vatɗin di'e: Wulin lo hotgiyay tanu hiɗi dikgi kafe, hiɗi laata, hiɗi tiyna, hiɗi yorta.

¹³Wulin kayn jetgi dikgi goyo, may mi sligar ɦawaɗi, hotgiyay tam Ma-Vatɗina Lawna vigiya, kay nam sa ma slugo'o, wi kir-hawta kaw. Nam may muɗ ɦiy gosoyɗi, ŋaata valam may vatɗi kaw. Nam hot muɗ varta valamu kay joota, ta nam ga' kay sumuna.

¹⁴Sa ma as wi'e mi gige la nam min hot bugolomu, la nam min muɗ varta valamu kaw, la nam min hin boldis gaa bugolom klasige? Nam ma vi vulda hiɗi niyna ma yamam goy vok iramna klasige.

¹⁵Buwgi togolomna hay Siyon, ligi laata, yit kayni ka tigi kafe.

¹⁶Tokgi sumuna, ligi dakka ta peldetta. Tokgi sum sa maariyana, tokgi gurosgurayna, guro sa dig sumaysi ci miir kaw. jufay-boyn kaw cukgiyay goy hay ziyna vigi pa, boyn kay tuwgi kaw cukgiyay goyo.

¹⁷Nigi muliyan-sa-ɗifinna, lakgi jar vun-ziyda hiɗi giwin-ma-ɗifinna, tiygiya, digi ala Ma-Vatɗina, suɗaŋ sumuna vaŋ goy suɗge, hin vocota vaŋ goy hay bam zulotɗige, hinsi goy a sumun cen kuɗsiɗige. A sumun ma di ala: Lawna visi namna ka arige kayn ŋaa'a su?

¹⁸Ma-Vatɗin hunayt hobawa hay dikamu, kay nagata valamu, nam min hulot sumuna valam goyo.

¹⁹Ma-Vatɗin hot dita, nam di tam sumuna valamu: Duwgiya nan min gi alkamaren tigiya, gulda-guldana hiɗi mula, nigi ma hoba, nan min hingi goy hay zulota hay ɓam sumun loɗi.

²⁰Sa ma gaw kigina ma hay gal ma gaana, nan min gum iram goy tigi gine'e, nan min gun iram hay nagat ta goy soyta, hiɗi ta goy ful ɦawa. Sojena visi sa tuni voksina, nan min gisi irsi hay niy-lumna ma ŋolla, ma gal kuɗuwna, sa tuni bugolsina hay niy-lumna ma ŋolla, ma gal vulatina may. hista visi ma mer goyo, buwta visi ma kal ta-ta kulo dukalawna, kay nisi li slen ma ŋulon ŋolo.

²¹Nagata tuwag li narɗi, firiyagu, siwelag kulo ŋolo, kay Ma-Vatɗina li sle ma ŋulonawa kagu.

²²Muuriya ma hay fulda, ligi narɗi, kay liyn ma soy goyna hay fulda ma hot goɗa, kay guna ma hot vuɗ lo, gu-gumna hiɗi gulda-guldana ma hot vuɗ lo.

²³Nigiya, gurona vi Siyon, ligi firiya, ciriygi ŋolo hay Ma-Vatɗina Lawna vigiya. Kay nam min vulgi niyna hay liyamu. Nam ma vulgi niy ma cuk jafn hay liyamu, niy ma cawna hay liyam kaw ki ay jew ɓa-ɓa nala.

²⁴Muɗakŋa vigi ma hob hiɗi wana, Dutay-baara vigiya ma hob hiɗi vin ma jibetna hiɗi mula.

²⁵Busa ma ɓok-ɓokona hiɗi baar-jerena, hiɗi baar-girim-girimna hiɗi baar-bobona ma ti wan goyna nan min wurakgita. Kay nam can mi sojena vanu sa nan cuksis kay durgina.

²⁶Nigi ma ti'e hob kaw, nigi ma yi sem Ma-Vatɗina Lawna vigiya, kay nam li slen ma ɦuyumna ŋolo kigiya. Sumuna vanu ma lak hay zulot loɗi.

²⁷Nala nigi ma wi ala nan ka jar sa Israyella, nanu mi Ma-Vatɗina Lawna vigiya, Lawn mara ma ŋiray hiɗi nan mayɗi, Sumuna vanu ma lak hay zulot loɗi. Ŋusta Peldetta ma ɓuraw goy kay sumuna