Read Masana AMOS 2 Bible Online

AMOS 2 - Masana bible

AMOS 2

¹Ki kayn nala Ma-Vatɗina di'e: Kuɗ jiw-zlata ta ɦidita vi sum sa Mowabna, kuɗ ta fiɗit noŋo, nan min hot bugolan tam ɦiyda vanɗi, kay mul ma Edomna nisi ŋalam zokom goy noŋ heses'.

²Nala nan min gi kuta hay Mowab, na' ma ŋal ziy ma mulda vi Keriyot, Mowab ma ɓulak goyo jar suwana ma ŋolla, jar luluna vi duura hiɗi suwana vi togolomna.

³Sa ka kitana visiya nan ma vatsi goyo, muliyana visi kaw nan ma vatsi goy hiɗi nisi kafe, Din mi Ma-Vatɗina.

⁴Ki kayn nala Ma-Vatɗina di'e: Kuɗ jiw-zlata ta ɦidita vi sum sa hay Yudana, kuɗ ta fiɗit noŋ kaw, ɦiyda van as hot bugola' noŋɗi, Kay nisi noy della vi Ma-Vatɗin goyo, kay nisi may ŋom gatta valamɗi, kay nisi hin tuwsi viy goyo hiɗi sinda, sinda ta sumiyaysi ay tapay haya,

⁵nan ma gi kuta kat Yuda, na' ma ŋal ziy ma mulda vi Yerusalem goyo.

⁶Ki kayn nala Ma-Vatɗina di'e: kuɗ jiw-zlata hidita vi sum sa Israyella, kuɗ ta fiɗit kaw, nan min hot goy bugolan tam ɦiyda vanɗi, kay sum sa ɗigera nisi gussi goy hiɗi gurjuta, sum sa hawna nisi muɗsi goy hiɗi tuguru ma cukum semna.

⁷Nisi ka hiɗi darta ta-ta tam butuw ma gaa kay nagatna, ka ka kulo kay sum sa hawna,[1] nisi curoɗ sa maŋayna. bumna hiɗi goora tap kuɗ tuwsiya kay tuɗ gar cat ka kepta, kay nisi min muɗ semda van ta peldetta goy liwisi.

⁸Nisi bur gaa kat giwin-ma-ɗifin kayni, baram gaa kuɗsi mi sligar ma nisi deŋem kay sa hawna. Sum sa nisi tun kitat kisina nisi yaw dolayn kisiya, cum kalaf hay ziyna vi lawayna visiya.

⁹May hiɗi na'ta kayni, nan vat sum sa Amoriyan goy voksiya, sum sa fiyok ŋolo ki gu-gamna nala, dono ŋolo ki gu-ɦoyna nala kaw. Vuɗna visi ma kulo humsina nan ma ɓulakam goyo, so'olsi ma gaana nan ma patam kulo'o may.

¹⁰May nigiya, yawgi ay goy hay Egipte pa mi nanu, nan tun vokgi hay fulda ir busat dok-fiɗi, kayni kay vulgi nagata vi sa Amoriyana,

¹¹Nan cuk sum sa jobta-Lawna guro-migina, nan cuk sum sa kemeleŋŋa jar gurona vigi sa joriyona. Lebo may naɗi su? Gurona vi Israyella! Din mi Ma-Vatɗina.

¹²Nigi vul dolay ma cina mi sum sa li tuwsi kemeleŋŋa,[2] nigi di tam sa jobta-Lawna ala nisi di law ma voksinɗi.

¹³Wulin kayn nan min kirapgi gaa'a, ki keke ma hobi hiɗi yam-wan hayamna lut yam nagat gaa nala.

¹⁴Sa ma koloyna fi a pir jaŋ loɗi, sa ma donot ka talamna dono na'ta as a gutum loɗi, sa ma kursulina as a suɗ tuwam goy loɗi.

¹⁵Sa ma wi duur ma hiɗi ɓarawta as a fi donot loɗi, sa ma jaŋ koloyo ma suɗ may loɗi, sa ma ɓe kay kulumna ma suɗ tuwam goy kay tuwamɗi,

¹⁶sa ma dono suw sum sa wi duur kafna, ma pir jaŋi hay buur namna ɗawni, Din mi Ma-Vatɗina.