Read Masana AMOS 3 Bible Online

AMOS 3 - Masana bible

AMOS 3

¹Nigi gurona vi sa Israyella, humgi yoboyn ma Ma-Vatɗina ka dum kigin kayni, kay jaf ma nan yawamay goy hay nagata vi Egipten kafe.

²Nan vilekgit si nigi tuta, jar jaf-sum sa gaa kay nagat kaf; kuɗ kayni nan ma ka kitat kigiya kuɗ raw-goyta vigi kafe.

³Sumun as poy kuɗ tuwsi ma' bay vunsi ŋra su?

⁴Zlon as ci gum kuɗ juruta bay fi va ma tina valam su? Goor-zlon ŋurnay gaa hay liyam ma buura bay fi va ma ti su?

⁵Layt vi hay jawta bay san gan jawt gaa voka' su? Den yaw kulo kay nagata bay va vi hayam su?

⁶Togolomna buw hay hoyok-ziyna, bay muɗ sumun kulo jar tuwsi gijum-gijum su? La Ma-Vatɗina bay gi jootay hay hoyok-ziyna, na' as co kay tuwa su?

⁷Nala kaw, Bum-Sumuna, Ma-Vatɗina, as li va'a bay pat dir ŋayayta valam goy kir sa sunda valamu sa jobta-Lawnaɗi.

⁸La zlon ci gumu, sa ma as li narɗi mi gige? Hay li ma Bum-Sumuna Ma-Vatɗina di va'a, sa ma as jokom vunam goyɗin mi gige?

⁹Digi delgi kulo'o hay ziy ma mulda vi Asdod, digi delgiya hay liyn ma mulda vi Egipte tuni hayna. Nigi ma di ala: Tokgi tuwgiya kay hiɗiyna vi Samariya, ɗuwgi nisi guri kulo jar tuwsi ŋolo natige! Curoɗa ka jarsi ŋolo tige!

¹⁰Ma-Vatɗina di'e: Nisi min li law ma hay tagam loɗi, hay ziyna visiya nisi tok vuɗna vi jiw-zlata hiɗi sle ma haramna.

¹¹Kuɗ kayni Bum-Sumuna Ma-Vatɗina di'e: Sa ma gawta coowa, nam sli nagata vigiyawa, nam ma vatgi donogi goyo, ziy ma mulda vigi tuni hayamna sumun ma vurumumu.

¹²Ki kayn nala Ma-Vatɗina di'e: Ki sa ma ŋom farayna hulot bat-ɦuna lebo hum-ɦuna goy vun zlon nala, sum sa Israyella sa lakay hay Samariya suɗ goy ɗawn kaw nala, nisi sa ka buri gaa danani kay va ma buura visiya, ma tapi ma Damasna ka baray hayna.

¹³Humgiya, ligi di-goyta kay kayni kat jafna vi Yakub, kayn ti dita vi Bum-Sumuna, Ma-Vatɗina, Lawna vi vok-ma-duura.

¹⁴Hay buur ma nan ma ka kitata kay sum sa Israyella kuɗ raw-goyta visi ɗawni, nan ma to giwin-ma-ɗifinna vi Betel gaa'a, miyok ma tam giwin-ma-ɗifinna ma kusis gaa'a, nam ma nig gaa kay nagata may.

¹⁵Ziyna visi ma cayda hiɗi ziyna visi ma menda, nan ma ɦom gaa'a, ziy ma mulda ma tuwam kori hiɗi siy-slokŋa ma ɦo gaa'a, ziy ma ŋol dak-dakŋa yalam ma daba. Din mi Ma-Vatɗina.