Read Masana AMOS 4 Bible Online

AMOS 4 - Masana bible

AMOS 4

¹Humgi lawt kayni, nigi luway-gunayna vi Basan, sa ka kulo kay hiɗiyta Samariya, nigi sa curoɗ sum sa hawna, sa tay sum sa maŋayn gaa kuɗ segiya, nigi sa di tam jufaygi ala: Naray va ma cin aya, cayta.

²Bum-Sumuna Ma-Vatɗina yi va kalamu hay peldetta valam ala: Humgiya, buur ma co kigiya, hay li ma sumun ma sabgi hiɗi kaway ma hormosina, gurona vigiya nisi ma tansi hiɗi siwitna;

³bugolda nigi ma cuk goy ir gulmun ma munina kep kep kafe, gigekaw ma tun iram hay hoyok-ziy ma donona. Din mi Ma-Vatɗina.

⁴Tuɗgi hay Betel ligi suluku, tuɗgi hay Gilgal ligi suluk ŋol suwa, ligi ɗifinna vigiya hay graw culumta, ligi gal-ma-doogona vigi jar busat ɦidi kafe.

⁵Ligi ɗifinna vigi ma gi-deɓta hiɗi fun ma hiɗi isna, siwelgiya, digi goyo kay vulda kuɗ minda vigiya: Kay kayni mi va ma nigi minimna yo, nigi gurona vi Israyella, din mi Bum-Sumuna Ma-Vatɗina.

⁶May nanu, nan gi mayta ay hay hoyok-ziyna vigi kafe, sle ma tina kiɗawa goyo hay ziyna vigi kafe, hiɗi kayn kaf, nigi min hotay tan noŋɗi, Din mi Ma-Vatɗina.

⁷Nanu, nan tel niy ma sin goy kigiya, hay li ma til hini ɦidi tuwa jew feɗna, nan hin niyn si kay hoyok-ziy hena, nan hinim si kay hoyok-ziy henɗi may; sine mara'a niyn si kalamu, sine hen ma niyn si kalamɗina, nam so goyo.

⁸Hoyok-ziyn ma' lebo ɦidi, tuɗ tam hoyok-ziy hena kay ci niyna, may laata visi may vatɗi. May hiɗi kayni kaf, nigi min hotay katanɗi, din mi Ma-Vatɗina.

⁹Nan watgiyawa hiɗi fotna, hiɗi fiyumna, jardeŋŋa vigiya, sine gulda-guldana vigiya, gu-gumna hiɗi gu-olivena vigiya jufulla tumawa goyo, may hiɗi kayn kaf nigi min hotay katanɗi, Din mi Ma-Vatɗina.

¹⁰Nan gi bakmaranawa jargiya, ki hay Egipte nala; sumuna vigi sa joriyona nan cisiyawa goyo hiɗi kew-gaferaŋa, nan hin sumuna vurum kulumayna vigiya, nan hin sum sa hay vokŋa vigin mita, ta-ta buwta visi cuk hay cingi noŋo, may hiɗi kayn kaf nigi min hotay katanɗi, Din mi Ma-Vatɗina.

¹¹Nan ɓulakgiya goyo, Ki nan ɓulak Sodoma hiɗi Gomora goy nala, Nigi ay ki vun gu-kuɓulusna, ma yaway ay goy hay kuta nala, May hiɗi kayni kaf nigi min hotay katanɗi. Din mi Ma-Vatɗina.

¹²Kuɗ kayni nan min ligi ki kayn nala. La nan min lasgi ki kayn nala, nigi sum sa Israyella, kotgi tuwgiya kay ŋaf ir Lawna vigiya.

¹³Kay humgiya, nam ma kot hiɗiyna, kot simeɗna kaw, namu ma ɗek varta valam goy kir sana, namu ma muɗ haraŋa goy jufunu, nam ma poy kulo gine'e kay nagata, semda valam ala Ma-Vatɗina, Lawna vi vok-ma-duura.