Read Masana AMOS 5 Bible Online

AMOS 5 - Masana bible

AMOS 5

¹Nigi jafna vi sa Israyella, humgi dit kayni, humgi yorta ta nan ka yorgiya.

²Wulini na' nigawa gaa'a, na' ma fok kulo loɗi, na' goot-cata vi Israyel, haya' koɗawa gaa kay nagata, sa ma poŋa' kulo may loɗi.

³Kay Bum-Sumuna Ma-Vatɗina ka ɗi ala: hoyok-ziy ma cuk sumun goy vun duur birim ɗawna, ma cuk sumun vun duur ɗawn kis, sa tuɗ vun duur kisna sumun ma hin kuɗsi doogo, kayn jar gurona vi sa Israyella.

⁴Kay Ma-Vatɗina di dit kayni tam sum sa hay ziyna vi Israyel ala, nigi ma garanu, nala nigi ma lak iriya,

⁵nigi gargi Betelɗi, tuɗgi hay Gilgalɗi, jikgi hay Beer-Sebaɗi, kay gasita, sum sa Gilgal ma tuɗ goy gorvo'o, Betel kaw ma vat goy ɦawa'a.

⁶Gargi Ma-Vatɗina, nala nigi ma lak iriya, ligi ŋali, kay la nam do kutawa kuɗ ziyna vi Yosef, la kut tun caw ŋal ziyna, sa ma tewa' hay Betel may noŋɗi kayni may ŋaaɗi.

⁷Nigi sa muɗ gasita galak ki goyo-goyn nala, nigi tan ɗigerta gaa kuɗ segiya may.

⁸Namu mi ma kot dahaŋalla hiɗi bajaara, mi ma muɗ jufunda goy haraŋa, nam muɗum jufunu kay liyn li henje'e, nam yi niy-lum ma ŋolla aya, hinim ti kay yam nagata. Semda valamu ala Ma-Vatɗina.

⁹Nam hin ɓulakka co'o kay sum sa donona, ɓulakka co'o hay liyn ma donona.

¹⁰Sum sa mus hiɗi nisi kep disi kay gasita kaw, nisi gaw hiɗi nisiya, sum sa disi kirsina nisi may minsi noŋɗi.

¹¹Sum sa hawna nisi taysiyawa gaa'a, wa-alkamare ma sum sa hawn zumumna nisi yawamawa kisi ɦawa'a. Kuɗ kayni ziy ŋa ma nigi kotomna hiɗi hiɗiy ma nigi ceɗemna, nigi fi lak hayam loɗi. Nigi pi gulda-gulda ma ŋaanawa, may nigi fi ci vinna valam loɗi.

¹²Kay nan wi'e, jiw-zlata vigi ɓa' suwiya, sulukŋa vigi biyay goy ŋolo, nigi las sum sa ɗigera, yaw slen hay ɓisiya, nigi cuk vo kuɗ sum sa hawn dono'o.

¹³Kuɗ na'ta, hay li ma liyn laawa ki kayn nala, sa ma yalla ŋom sinamu kay liyn kayni joo'o.

¹⁴Ligit ti ŋaata, may ti jootɗi, nala nigi ma lak iriya, nala Ma-Vatɗina Lawna vi vok-ma-duura ma mus hiɗi nigiya. Ki nigi ka di nala.

¹⁵Kaagi gaw hiɗi joota, mingi ŋaata, hingi ɗigerta ti mul hay ziyna vigi kafe, la nala, Bum-Sumuna, Ma-Vatɗina vi vok-ma-duura ma li slugot kay dir sumuna vi Yosef ma hinina klasige.

¹⁶Kuɗ kayni, Ma-Vatɗina, Lawna vi vok-ma-duura, Bum-Sumuna ka di ala: Hay liyn kaf nigi ma tiya, hay hagan kaf sumun ma di ala ɦih! ɦih! Sum sa zum sinena yit ma co tisiya kay nisi ma ti do'olla, Sum sa wi tiyna ma gi nul ma hawna,

¹⁷Goy hay sine gulda-guldana kaf sumun ma yor tuwsiya, kayni ma li ɗawni hay buur ma nan ma jik jargina, Din mi Ma-Vatɗina.

¹⁸Joot kay nisi sa cub buur ma Ma-Vatɗina min co hayamna. Nigi min cubum hay buur ma nam min co hayamna mi mige? Kay buur namna li ɗawn ti jufunda, may mi haraŋaɗi.

¹⁹Nigi ma li ɗawn ki sa ma pir jaŋi vok zlona nala, ki sa ma ursena ŋafam hay hagata nala.[3] ki san hot vo'o, cuk balam kat gulmunna, guyn calamu nala.

²⁰Buura vi Ma-Vatɗina ɗawni, mi jufunda may mi haraŋaɗi naɗi su? Namu mi liyn ma zim gaana, haraŋ may hayɗi naɗi su?

²¹Nan min yuldeta vigiɗi, Yuldeta vigi kiran bisi, tokŋa vigiya iran min wum noŋɗi.

²²Hay li ma nigi li ɗifin ma ŋal-goyna hiɗi vulda tanu, nam may kiran ŋaa noŋɗi, luway ma jufayna ma nigi ŋatam goyo kay lop ma slugona, iran may wum noŋɗi.

²³Winekŋa vi nulla vigiya ɦurgitis goy tan gine'e, nan min hum del dilla vigi noŋɗi.

²⁴May hingi ɗigerta jaŋ goyo, Hingi gasita jaŋ goyo, ki niyn jaŋ goyo may so goyɗi nala.

²⁵Hay li ma nigi ka hay fulda ir busat dok-fiɗi, nigi li ɗifini hiɗi vulda tanu su? Nigi gurona vi Israyella?

²⁶Tuɗgi hiɗi tantana vi mulda vigiya, tuɗgi hiɗi lawayna vigi ma ceɗayna, tuɗgi hiɗi mislekŋa vi lawayna vigi ma nigi kotom kafna.

²⁷May nan min nargi gorvo'o goy bugol Damas, Din mi nam ma semda valam ala Ma-Vatɗina vi vok-ma-duura.