Read Masana AMOS 8 Bible Online

AMOS 8 - Masana bible

AMOS 8

¹Bum-Sumuna Ma-Vatɗina ɗekan slen kayni kiranu. Tikisita ay hobay hob' hiɗi vuɗ-gu ma niyina.

²Nam di'e: Amos, iraŋ wum mi mige? Nan hot dita ala: Iran wa' ti tikisita ta hobay hiɗi vuɗ-guna ma niyina. Bugolda Ma-Vatɗina di tanu: Sumuna van sa Israyella dabta visi niyawa goboyo; nan ma vulsi gid loɗi.

³Hay buur namna ɗawni, nul ma nisi gum hay ziy ma mulda visina ma muɗ goy tiyna, di kayn mi nan Bum-Sumuna Ma-Vatɗina; sumun ma mit kuɗgi ŋolo. Ma cuksis goy ŋolo bay sa tiy kisiya.

⁴Humgi dit kayni, nigi sa lasgi sum sa maŋayna, sa vurumgi slen kay sum sa hawna hay nagata.

⁵Nigi di'e: Til ma wulina ma kal ɗawn citige? Kay numa' tuɗ gus wana vuma goyo, buur ma sabatna kal ɗawn citige? Kay numa tuɗ mal vun veera vuma goyo. Tasa ta kusta numa ma daba' dira' kulo'o, numa ma ɦura' gusa' kulo'o, va ma ŋa nekŋa numa min muɗum hefteŋe kay dut sumuna.

⁶Ɓugolda numa ma gus sum sa maŋayna hiɗi gurjuta, sa hawna numa gussi hiɗi tuguruna, burana vi wan kaw numa ma gusum goyo.

⁷Kuɗ kayni Ma-Vatɗina yi va kalamu, hiɗi sem Ma-Gaŋeraŋa vi Yakub ala: Lopna visi kayni yan ma jok mara kep jaram noŋɗi.

⁸Kuɗ joota visiya nagat ma wira, sum sa haya'na kaf ma lak hay yorta, Nagat noŋ kaf ma fok kulo ŋolo ki niy-lum ma den nala,[4] na' ma fok kulo'o, hot cuk gaa'a kaw ki niy-lumna Egipte nala,

⁹Bum-Sumuna Ma-Vatɗina di'e: Hay buur namna ɗawni, fatta ma ɗik gaa hay falay calakka. Nan ma muɗ yam nagat jufunu hay falay calakka;

¹⁰buur ma yuldeta vigiya nan ma muɗum goy buur ma yorta, nulla vigiya ma muɗ mi nul ma tiyna, gigekaw ma muɗ cukum talam mi sligar-bolla. Nan ma kulotgi yigi goy vanay kafe; nan ma hin nagat hay yorta, ki goor ma kay bulum kepn mit nala, va ma co bugol kayni ti ɓulakka ta vatɗita.

¹¹Humgiya, buur ma co'o, din mi Bum-Sumuna Ma-Vatɗina, buur namna nan min gi mayta gaa kay nagata, may ti mayta vi niy ma cina hiɗi fu ma tinɗi, may mayta hiɗi laata kay hum yoboyna vi Ma-Vatɗina

¹²Nisi ma mer goyo hay gal liyn mara'a mara'a vi niy-lum ma ŋolla, hay gal ma gaana ta-ta hay gal ma kuɗuwna, nisi ma poy hay liy hena hena kay gar yoboyna vi Ma-Vatɗina, may nisi ma fumɗi.

¹³Hay buur namna ɗawni, guro-boy sa ŋaana hiɗi joriyo sa ŋaana laat ma cisi goy mati.

¹⁴Kay nisi yi va kisiya hiɗi sulukŋa vi Samariya, nisi di'e: Hay semda vi lawayna vaŋu Dan, hay semda vi girifta vi Beer-Sebata, may nisi ma cuk gaa'a, as fok kulo loɗi.