Read Masana YONAS 1 Bible Online

YONAS 1 - Masana bible

YONAS 1

¹Ma-Vatɗina ka di Yonas goora vi Amittay ala:

²Yonas, fokaŋ kulo'o, tuɗaŋ hay Ninive[1] hoyok-ziyn ma ŋolla, Siwelaŋ tam sum sa hayamna. Kay jiw-zlata visi coowa kulo katan goŋ'.

³Ki kayn nala Yonas fokay kulo'o kay pir hay Tarsis, goy gine vok ir Ma-Vatɗina. Nam kal hay Yaffa. Ɗawni nam fi lumna kepe ma min kal hay Tarsis; nam wurak kay lumna, ɓe hayamu kay kal hay Tarsis, goy gine'e vok ir Ma-Vatɗina.

⁴May Ma-Vatɗina hin birina ma ŋolla ma biw kay niy-lumna biw ŋolo, bil ŋolla fok kulo'o kay niyna, lumna tun caw sir gaa'a.

⁵Sa sumay lumna muɗ nar ŋolo. Gige gige jarsiya tun caw siɗaw Lawna valamu valamu. Jakŋa ma hay lumna nisi tun caw cukum goloŋo, kay lumna ma muɗ hefteŋe klasige. May Yonas ka buri hay lumna, kali sen to-to'.

⁶Sa ma ɗiger-lumna ma talamu, zliyim kulo'o, ka dum ala: Naŋ kal sene kay mige? Fokaŋ kulo'o, jobaŋ Lawna vaŋ lay tige, nam ma var kaya klasige, kay a nay ma baɗi!

⁷Bugolda nisi di jar tuwsiya: Nigiyaya, laygi ŋaɓta kuɗ ɦayta, kay nay ma wi sa namna ma maray zlat kayna. Nisi li ŋaɓta kuɗ ɦayta, ŋaɓta nig kay Yonas.

⁸Nala nisi jobomu: Sana, duma'ay kay joota vaŋ ta mar lawt kuma'ta. Lopna vaŋ mi mige? Naŋ may arige pa? Naŋ hay naga tarige? Naŋ mi jaf-sum sarige?

⁹Nam hotsi dita: Nanu mi sa ma Hebrena, nan mi sa ma li nar kuɗ Ma-Vatɗina Lawn ma wuralawna, nam ma li niy-lumna hiɗi nagat kafna.

¹⁰Sum nisina tuwsi cuk nar ŋolo, nisi dum ala: Hih! Naŋ li slen nala kay mige? Kay sumun kayni wiy ala nam pir kayn kay Ma-Vatɗina, ki nam kay tuwam di goy tisi nala.

¹¹Hay na'ta niyna ka li bil ŋol suwa. Nala nisi dumu: Numa ma lum hiɗi naŋ mi mige a niyna tun gaa katma'a?

¹²Nam hot dit tisi ala: Slangiya, gangi goy goloŋ hay niy-lumna, nala simeɗna ma tun gaa katgiya, kay nan wi ala bil ma ŋolla co kayn kuɗan nanu.

¹³Nisi gi lumna dono'o kay hot kulo deŋele, may nisi may as noŋɗi, kay billa ka fok kulo'o katsi ŋol suw ma jewna.

¹⁴Wulini nisi siɗaw Lawna hiɗi diksi kaf di'e: «Ma-Vatɗina, naŋ ma bama goyo kuɗ irita vi san zawnɗi, ŋaɓ joot kuma'a ki numa'a ci sa ma ɗigera goyo naɗi, kay naŋ Lawna, naŋ as li va ma naŋ mina».

¹⁵Bugol kayni nisi sli Yonas, gum goy goloŋ hay niy-lum ma ŋolla. Wulini wulini billa tuni gaa katsi helmes'.

¹⁶Sum nisina narta vi Ma-Vatɗina kal hay diksi ŋolo. Nisi li ɗifin tam Ma-Vatɗina, yi va kisi kaw.