Read Masana YONAS 3 Bible Online

YONAS 3 - Masana bible

YONAS 3

¹Ma-Vatɗina di yoboyna valamu tam Yonas sem ma ma'na lo ala:

²Yonas, fokaŋ kulo'o, tuɗaŋ hay hoyok-ziyn ma ŋolla yum Ninive, naŋ ma di yoboyn ma nan daŋgina.

³Yonas fokay kulo'o, kali hay Ninive, ki Ma-Vatɗina di talam nala. Ninive namna mi hoyok-ziyn ma ŋolo, a ŋuyum goy kafe, naŋ tuɗ buur ɦidi.

⁴Hay buurta jewta, Yonas poy hay hoyok-ziyna, nam ka siwela di'e: Hey! Hini buur dok-fiɗi ɦawa Ninive ma ɓulak goyo.

⁵Sum sa hay Ninivena vi hay Lawna. Nisi kaf vul gatta kay li laata, cuk sligar-bolla tisiya,[2] tam sa ŋulon pa ta-ta tam sa gurayn dab

⁶Lawta kayni co hay hum mul ma Ninivena. Nam fok goy kay zlamda-mulda valamu, fok sligar-tuwna ma mulda goyo, cuk sligar-bolla talamu, mus gaa hay butuw-kuna.

⁷Mulla hiɗi sa ŋulo sa vunamna cuk sumun goy hay hoyok-ziyn Ninive kaf hiɗi gatta ala: «Sa ti vaɗi, tuɗ farayn goy tiɗi, layayn noŋ kaf ti vaɗi lay, muuriyan tiɗi lay, ci niyɗi lay kafe».

⁸Cuk sligar-bolla tam sumuna hiɗi farayn noŋ kafe, gigekaw tiy tam Lawna hiɗi donom noŋ kafe, law ma joona nisi hinim goy noŋ kafe, jiw-zlata ta nisi la' tam tuwsita nisi hina' goy noŋ kafe.

⁹Sa wiɗi, kla, la Lawn hot bugolom tam ɦiyda valam klasige, kay a nay ma ba goyɗi?

¹⁰Wulini hay li ma Lawn wi ala nisi tun caw var kisiya, ka hot bugolsi tam hagata visi ta joota kaw, nam muɗ varta valamu kay joot ta nam var kay li tisiya, nam min li joot tisi loɗi.