Read Masana YONAS 4 Bible Online

YONAS 4 - Masana bible

YONAS 4

¹Lawta kayni ɓulak dik Yonas ŋolo, nam muɗ ɦiya.

²Nam tiy tam Ma-Vatɗina di'e: Hih! Ma-Vatɗina, kayni mi law ma nan dumu hay li ma nan ay hay nagata van tuwanɗi su? Kuɗ na'ta kayni nan gar kay pir hay Tarsis. Kay nan wi ala naŋu mi Lawn ma slugo'o ma wi haw sumuna, naŋu mi sa ma muɗ ɦiy gosoyɗi, ŋaata vaŋu na' ka ŋol lay, la naŋ var kay li va ma joo'o tam sa'a kaw, hot bugolaŋ bay lopo.

³Wulin kayni, Ma-Vatɗina, marya naŋ sli ciwta vanu, mitta kiran ŋaa'a suw mus ma irina.

⁴Ma-Vatɗina hotom dita: Wulini naŋ muɗi ɦiy kayn hay liyam su?

⁵Wulini Yonas hin hoyok-ziyna, nam kali musi goy hay galam ma kuɗuwna, ɗawni nan kot balak ma ŋolla kepe kulo kalam ŋusu. Nam ka cub va ma min li hay hoyok-ziyna.

⁶Wulini Ma-Vatɗina hin gu-terena day kulo'o kay li ŋus kay Yonas, kay a ɦiyda valam ma vat goyo kaw. Gu-tere namna li dik Yonas firi ŋolo.

⁷May hay buurta ka'ta hay graw culumta, Ma-Vatɗina gi jufulla aya, nam ka so'ol gu-teren goyo, nam miti goyo may.

⁸Hay li ma fatta dayay kulo'o, Ma-Vatɗina hin simeɗ ma kuna may hay gal kuɗuw pa vidik ŋolo. Fatta war Yonas ŋolo kalamu. Nam nig gaa'a ki ŋelay nala. Nam tun caw gar mitta; nam di'e: Mitta kiran jifiy ŋolo suw mus ma irina.

⁹Lawn di tam Yonas: A muɗ ɦiya kay terena kayni kiraŋ ŋaa'a su? Nam hot dita: Kiran ŋaa'a suwa kay muɗ ɦiya, mitta kaw kiran ŋaa'a lay.

¹⁰May Ma-Vatɗina dumu: Naŋ ka mak tuwaŋ kay terena ma naŋ mak tuwaŋ kay pum noŋɗina, wulum mi naŋɗi lay. Nam dayay kulo'o hay buur kepe, miti goyo hay buur kepe kaw.

¹¹May nanu, hoyok-ziyn ma ŋolla Ninive, sumun hayam suw birim kis-ɦidi diram dok-ma', nisi wi yal kay poŋ ir ŋaata hiɗi jootɗi, naŋ min ala nisi ma muɗ kiran hawɗi may su? Farayn kaw ka hayam ŋol lay naɗi su?