Read Masana ŊAƁTA 1 Bible Online

ŊAƁTA 1 - Masana bible

ŊAƁTA 1

¹Ma-Vatɗina di tam Musus hay fulda vi Sinay, hay guɗuk ma fi-tuwna, hay buurta jewta vi til ma ma'na, hay busata ma'ta bugol kalta visi ay goy hay Egipte.

²Nam di'e: Nigi ma li ŋaɓta vi vokŋa vi gurona vi Israyel kafe, kuɗ vuɗna visiya visiya, kuɗ ziyna vi sumaysiya, ŋaɓ semda vi sa jufayn goy kisi kafe.

³Tun caw tam busat dok-ma' ta-ta kulo kalam ɗaw, sum sa Israyel kaf sa asay kay ziy sle ma duura; naŋu hiɗi Aaron nigi ma li ŋaɓta visi kuɗ vokŋa visiya visiya.

⁴Vuɗn kaf nigi ma tap sa ma ŋolla valam kuɗgi kep kep. Sa ma ŋol kuɗ jafna vi bulumna.

⁵Kayni mi semda vi sum sa tap hiɗi nigin ɗawni: Hay jafna vi Ruben: Elisur, goora vi Sedewur,

⁶hay jafna vi Simeyon: Selumiyel, goora vi Suriskaday;

⁷hay jafna vi Yuda: Nahson, goora vi Aminadab;

⁸hay jafna vi Isakar: Netaneel goora vi Suwar:

⁹Hay jafna vi Zabulon: Eliyab, goora vi Helon;

¹⁰hay jafna vi gurona vi Yosef, hiɗi gurona vi Efrayim: Elisama, goora vi Amihud; hay jafna vi Manase: Gamliyel, goora vi Pedatsur;

¹¹hay jafna vi Benyamin: Abidan, goora vi Gidewni,

¹²hay jafna vi Dan: Ahiyezer, goora vi Amiskaday;

¹³hay jafna vi Aser: Pagiyel, goora vi Okran;

¹⁴hay jafna vi Gad: Eliyasaf, goora vi Rewel;

¹⁵hay jafna vi Neftali: Ahira, goora vi Enan.

¹⁶Kayni si sum sa fi yit hay tokŋa, nisi si sa ŋulona hay jafna vi sumaysiya, si sa ŋulona vi vok-ma-duura vi Israyel kaw.

¹⁷Sum nisina sa sesi yiy goyn kayni, Musus hiɗi Aaron yawsiya,

¹⁸hay buurta jewta vi til ma ma'n kayni, nisi yi sumun kaf, nisi ɗosi sesi gaa'a kuɗ jafna visiya visiya, kuɗ ziyna vi sumaysi kaf, nisi yisi sesi goy kisi kaf, tun caw tam sa busat dok-ma'na ta-ta kulo kalam ɗaw.

¹⁹Musus li ŋaɓta visiya hay fulda vi Sinay, ki Ma-Vatɗina vulum hagat nala.

²⁰Ruben goora vi Israyel ma vuɗi jewna nisi ɗo sem gurona valam gaa'a, kuɗ ziyna visiya visiya, kuɗ jafna vi sumaysiya, sum sa jufayna nisi ŋaɓsi goy kafe, tun caw tam busat dok-ma' ta-ta kulo kalam ɗaw, kayn di ala nisi kaf sa nagay kay ziy sle ma duura.

²¹Sum sa hay jafna vi Ruben sa nisi li ŋaɓta visi goyna co noŋ pet birim dok-fiɗi yam karkiya hiɗi diram kis-vasl.

²²Nisi ɗo sem gurona vi Simeyon gaa'a, kuɗ ziyna visiya visiya, kuɗ jafna vi sumaysiya, nisi ŋaɓsi goyo, sum sa jufayna tun caw tam busat dok-ma' ta-ta kulo kalam ɗaw, sa asay kay ziy sle ma duur kaf nisi ŋaɓsi goyo:

²³Sumuna vi jafna vi Simeyon sa nisi ŋaɓsi goyna nisi noŋ pet birim dok-vasl yam zleeŋe hiɗi diram kis-ɦidi.

²⁴Nisi ɗo sem gurona vi Gad gaa'a, kuɗ ziyna visiya visiya, kuɗ jafna vi sumaysiya, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala sa asay kay ziy sle ma duura kafe.

²⁵Sum sa hay jafna vi Gad sa nisi ŋaɓsi goyna nisi co noŋ pet birim dok-fiɗi yam vasl hiɗi diram kis-karkiya kalam dok-vasl.

²⁶Nisi ɗo sem gurona vi Yuda gaa'a, kuɗ ziyna visiya visiya, kuɗ jafna vi sumaysiya, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala sa nagay kay ziy sle ma duura kafe:

²⁷Sumuna vi jafna vi Yuda sa nisi ŋaɓsi goyna nisi noŋ pet birim dok-siɗiya yam fiɗi hiɗi diram kis-karkiya.

²⁸Nisi ɗo sem gurona vi Isakar gaa'a, kuɗ ziyna visiya visiya, kuɗ jafna vi sumaysiya, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala sum sa asay kay ziy sle ma duura.

²⁹Sum sa hay jafna vi Isakar sa nisi li ŋaɓta visi goyna co noŋ pet birim dok-vasl yam fiɗi hiɗi kis-fiɗi.

³⁰Nisi ɗo sem gurona vi Zabulon gaa'a kuɗ ziyna visiya visiya, kuɗ jafna vi sumaysi kafe, nisi ŋaɓ semda visi goyo, tun caw tam busat dok-ma' ta-ta kulo vok ɗaw, kayn di ala sum sa asay kay ziy sle ma duura:

³¹sum sa hay jafna vi Zabulon sa nisi ŋaɓsi goyn co pet birim dok-vasl yam siɗiya hiɗi diram kis-fiɗi.

³²Gurona vi Yosef hiɗi gurona vi Efrayim nam ɗosi sesi gaa'a, kuɗ ziyna visiya visiya, kuɗ farana visi kaf, kuɗ jafna vi sumaysi kaf, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala nisi sa nagay kay ziy sle ma duur kafe.

³³Sum sa hay jafna vi Efrayim sa nisi li ŋaɓta visi goyna co noŋ pet birim dok-fiɗi hiɗi diram kis-vasl.

³⁴Nisi ɗo sem gurona vi Manase gaa'a, kuɗ ziyna visiya visiya, kuɗ farana visiya visiya, kuɗ jafna vi sumaysi kaf, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala sum sa nagay kay ziy sle ma duura kafe:

³⁵Sum sa hay jafna vi Manase sa nisi li ŋaɓta visi goyna nisi co noŋ pet birim dok-ɦidi yam ma' hiɗi kis-ma'.

³⁶Nisi li ŋaɓta vi gurona vi Benyamin goyo, kuɗ farana visiya visiya, kuɗ jafna vi sumaysi kaf, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala nisi kaf sa nagay kay ziy sle ma duura:

³⁷Sum sa hay jafna vi Benyamin sa nisi li ŋaɓta visi goyna co noŋ pet birim dok-ɦidi yam vasl hiɗi diram kis-fiɗi.

³⁸Nisi ɗo sem gurona vi Dan gaa'a, kuɗ farana visiya visiya, kuɗ jafna vi sumaysi kaf, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala nisi sa asay kay ziy sle ma duur kaf.

³⁹Sum sa hay jafna vi Dan sa nisi li ŋaɓta visi goyna co noŋ pet birim dok-karkiya yam ma' hiɗi diram kis-siɗiya.

⁴⁰Nisi ɗo sem gurona vi Aser gaa'a, kuɗ ziyna visiya visiya, farana visiya visiya, kuɗ jafna vi sumaysi kaf, nisi ŋaɓ semda visi goyo, tun caw tam busat dok-ma' ta-ta kulo kalam ɗaw, kayn di ala sum sa asay kay ziy sle ma duur kafe:

⁴¹Sum sa hay jafna vi Aser sa nisi li ŋaɓta visi goyna co noŋ pet birim dok-fiɗi yam kep hiɗi diram kis-vasl.

⁴²Nisi ɗo sem gurona vi Neftali gaa'a, kuɗ ziyna visi kaf, kuɗ farana visi kaf, kuɗ jafna vi sumaysi kaf, nisi li ŋaɓta visi goyo, tun caw tam busat dok-ma' ta-ta kulo kalam ɗaw, kayn di ala sum sa nagay kay ziy sle ma duur kafe:

⁴³Sum sa hay jafna vi Neftali sa nisi li ŋaɓta visi goyna co noŋ pet ir birim dok-vasl yam ɦidi hiɗi diram kis-fiɗi.

⁴⁴Nisi kayni si sum sa Musus hiɗi Aaron li ŋaɓta visi goyna: Tapay hiɗi sa ŋulona vi Israyel sa doogo yam ma'na, sa ay sliy vun ziyna vi sumaysi kep kepna.

⁴⁵Gurona vi Israyel sa nisi li ŋaɓta visi goyo kuɗ ziyna vi sumaysi kaf, tun caw tam busat dok-ma' ta-ta kulo kalam ɗaw, nisi sa jar Israyella sa nagay kay ziy sle ma duura,

⁴⁶sa nisi ŋaɓsi goyn kaf nisi co noŋ pet birim kis-karkiya hiɗi diram ɦidi, hiɗi diram kis-vasl kalam dok-vasl.

⁴⁷Sum sa Levitna, kuɗ jafna vi sumaysiya, nisi may kalsi kulo hay ŋaɓtaɗi.

⁴⁸Ma-Vatɗin ka di tam Musus ala:

⁴⁹Naŋ ma li ŋaɓta kay jafna vi Levi noŋɗi, naŋ ma ŋaɓsi sesi kulo jar gurona vi Israyel noŋɗi.

⁵⁰Tabernaklena vi di-goyta naŋ ma hinim ŋomda valam hay ɓam sa Levitna, jak ma hayamna hiɗi sle ma kuɗumna kaf. Nisi ma ziy tabernaklena hiɗi jak ma hayamna kaf, nisi ma li lop ma hayamna, nisi ma vi guɗukŋa visi kulo kat tabernaklen goboyo.

⁵¹Hay li ma nigi min joka, sum sa Levitna ma but tabernaklen gaa'a; hay li ma nigi lakawa hay liya, sum sa Levitna ma vi tabernaklen kulo'o; la sa ma pul[1] coowa kulo talam goboyo, nam ma fi mitta.

⁵²Gurona vi Israyel ma lak ɗawni, gigekaw goy hay faatana valamu valamu, gigekaw kuɗ drapona valamu valamu, kuɗ vokŋa valamu valamu kaw.

⁵³May sum sa Levitna ma vi guɗukŋa visi kulo goboy tam tabernaklena vi di-goyta, kay a ɦiyda vanu ma co kay gurona vi Israyelɗi; sum sa Levitna ma ŋom tabernaklena vi di-goyt ɗawn si nisiya.

⁵⁴Gurona vi Israyel hum kuɗ slen kaf ma Ma-Vatɗin dum mi Mususna.