Read Masana ŊAƁTA 10 Bible Online

ŊAƁTA 10 - Masana bible

ŊAƁTA 10

¹Ma-Vatɗina di tam Musus ala:

²kotaŋ togolom ma dooron ma', naŋ ma kotom hiɗi dooro ma yorayna. Lopna vi togolom namna kayn kay buwumu kay yi sumuna hay li ma nigi min joka.

³Hay li ma togolomna buwawa, sumun kaf ma tok tuwsi kataŋu, goy vun guɗuk ma fi-tuwna.

⁴La naŋ buw togolomna vunaŋ kep ɦawa, tok tuwsi taŋ ɗawn si yerimana, sa ŋulona kuɗ jafna vi Israyel.

⁵La togolom buw kayn ciriyn ka kuɗumu, nisi sa guruna visi viy hay gal ma kuɗuwn ma pat kulo'o;

⁶la togolomna buw sem ma ma'na lo hiɗi ciriyn kuɗumu, nisi sa guruna visi viy hay gal ma kayamna ma pat kulo'o; nigi ma buw togolomna hiɗi ciriyn kuɗumu kay nisi ma tuɗa.

⁷Nigi as kay buw togolomna kaw kay yi tokŋa, may buw namna nigi as pat ciriy kuɗumɗi.

⁸Gurona vi Aaron sa muliyan-sa-ɗifinna ma buw togolomna. Gat na'ta kayni hini dok-dok tigi nigiya, tam jafna vigi ma bugolgin kaw.

⁹Hay li ma nigi min yawis hay nagata vigi pa kay tuɗ dur sa gawt kigina, nigi ma buw togolomna hiɗi ciriyn kuɗumu, nala nan Ma-Vatɗina Lawna vigiya, human ma gan kigiya, nan ma butgi goy hay ɓam sa gawt kigina.

¹⁰Hay buura vigi ma firina, hay yuldena vigiya, hay vun til ma wulina vigiya kaf, nigi ma buw togolomna, nigi ma li ɗifin ma ŋal-goyna hiɗi ɗifinna vi lop ma slugona, nala Lawna vigiya humam ma gum kigiya. Nanu mi Ma-Vatɗina, Lawna vigiya.

¹¹Hay buur ma dok-ma'na vi til ma ma'na vi busata ma'ta, ɗugulla poŋ kulo'o kay tabernaklena vi di-goyta.

¹²Gurona vi Israyel kali goy hay fulda vi Sinay pa, tuni kay tuwsi ki hagat vuli tisi nala. Dugulla col kulo'o kay fulda vi Paran.

¹³Hay tuɗ na'ta ta jewt kayni, nisi tuni kay tuwsi ki Ma-Vatɗina vul hagata tam Musus nala.

¹⁴Drapota vi gurona vi Yuda kal vok jewe, hiɗi vok-ma-duura visiya. Vok-ma-duura vi Yuda tuni vokom kayni mi Nahson goora vi Aminadab;

¹⁵vok-ma-duura vi jafna vi Isakar tuni vokom mi Netaneel goora vi Suwar;

¹⁶vok-ma-duura vi jafna vi Zabulon tuni vokom kayni mi Eliyab, goora vi Helon.

¹⁷Nisi but tabernaklen gaa'a, gurona vi Gerson hiɗi gurona vi Merari kaliya, nisi ka ziy tabernaklena.

¹⁸Drapota vi jafna vi Ruben kaliya, hiɗi vok-ma-duura visiya. Vok-ma-duura vi Ruben tuni vokom mi Elisur, goora vi Sedewur.

¹⁹Vok-ma-duura vi jafna vi Simeyon tuni vokom mi Selumiyel goora vi Suriskaday;

²⁰vok-ma-duura vi jafna vi Gad tuni vokom mi Eliyasaf, goora vi Rewel,

²¹sum sa Kehatna kaliya, nisi ka ziy guɗuk ma peldetna, jew cota visi kayni, sumun vi tabernaklen kulo'o.

²²Drapota vi jafna vi Efrayim kaliya, hiɗi vok-ma-duura visiya. Vok-ma-duura visiya tuni vokom kayni mi Elisama, goora vi Amihud;

²³vok-ma-duura vi jafna vi Manase tuni vokom kayni mi Gamliyel, goora vi Pedatsur.

²⁴Vok-ma-duura vi jafna vi Benyamin tuni vokom mi Abidan, goora vi Gidewni.

²⁵Drapota vi jafna vi Dan kaliya, hiɗi vok-ma-duura visiya, nisi kayni mi vok ma ka tuni ŋom liyn ma cawna vi segen noŋ kafe. Vokŋa vi Dan tuni vokom kayn mi Ahiyezer, goora vi Amiskaday;

²⁶vok-ma-duura vi jafna vi Aser tuni vokom kayni mi Pagiyel, goora vi Okran,

²⁷vok-ma-duura vi jafna vi Neftali tuni vokom kayni mi Ahira, goora vi Enan.

²⁸Jafna vi Israyel kal kayni, nisi tuni kay tuwsi ki kayn nala, tuni kay tuwsi kuɗ vok-ma-duura visiya visiya.

²⁹Musus di tam Hobab, goora vi Rewel ma Madiyanna kuno Mususna, nam dum ala: Nay tuɗay hay nagat ta Ma-Vatɗin di ala nan min vulgita. Tuɗaŋ hiɗi numa'a, numa ma laŋ ŋaa'a. Kay Ma-Vatɗina col dita valam ala nam ma li ŋaat mi Israyel.

³⁰Hobab hotom dit ala nan min tuɗisɗi, may nan tuɗ ɗawn hay nagata van ta nan vuɗ haya'ta.

³¹Musus hot dumu: Nan siɗawaŋu, naŋ ma hinmaɗi; liyn ma numa vi guɗukŋa vuma hay fulda kayn naŋ wumu, nala naŋ ma tun vokma kay ɗekma'a.

³²La naŋ na hiɗi numa'a, numa ɗawn ma sleɗaŋ hayaŋ hiɗi ŋaat ta Lawn ma la' tuma'ata.

³³Nisi yaways kay hiɗiyta vi Ma-Vatɗin pa, nisi tuɗ ir buur ɦidi; timgilla vi bonota vi Ma-Vatɗina ka tuni voksiya, nisi tuɗ ir buur ɦidi kay gar liyn ma fi tun-sukŋa.

³⁴Ɗugulla vi Ma-Vatɗin ka kulo kisiya hay falayta, hay li ma nisi yaways goy hay gurun pana.

³⁵Hay li ma timgilla tun caw tuɗa, Musus di'e: Fokaŋ kulo'o Ma-Vatɗina, meraŋ sa gawt kaŋŋa goyo, nisi sa kaŋ gawna mun vokaŋ jaŋ munge!

³⁶Hay li ma nisi tun timgillawa gaa'a, nam di'e: Ma-Vatɗina, sumuna vi Israyel ir gu' gu' diram birim gaage gaage tani hotaŋay jarsiya.