Read Masana ŊAƁTA 16 Bible Online

ŊAƁTA 16 - Masana bible

ŊAƁTA 16

¹San kep yum Kore, namu mi goora vi Yitsehar, goor-ŋolona vi Kehat ma Levitna, nam fok kulo kat Musus; sum segena Datan hiɗi Abiram, gurona vi Eliyab, hiɗi On goora vi Pelet, nisi ɦidi kaf si gurona vi Ruben. Nisi tap kuɗumu.

²Nisi fok kulo'o kat Musus, hiɗi sum sege sa ŋulon jar sa Israyella kis-ma' hiɗi diram dok-vasl, kayn si sa ŋulona sa ka fi yit hay tokŋa, sum sa sesi ka yi jar segena.

³Nisi tok tuwsi kat Musus hiɗi Aaron disi ala: Numa makawa kigiya, kay sumun kaf tan peldete, Ma-Vatɗin ka jarsi lay. Nigi subur tuwgi kat sumuna vi Lawn kayn kay mige?

⁴Hay li ma Musus hum kayni, nam dab vokom gaa'a.

⁵Nam di tam Kore hiɗi sum sa kuɗum kafna ala: Jifin ɗawni, Ma-Vatɗina ma ɗek kay sa ma ir valamna ma peldetna, sa ma nam min vilekemna nam ma naram kulo goboy talamu.

⁶Wulin kayni naŋ Kore hiɗi sum sa kuɗaŋ kaf yawgi ganun hay ɓigiya.

⁷Jifin ɗawni, nigi ma cuk kut haya, nigi ma ɦok urdi ma hisn kalamu, tunum vok ir Ma-Vatɗina. Sa ma Ma-Vatɗin vilekem ɗawni ma li mi sa ma peldetna. Nala nan makawa kigiya, nigi gurona vi Levi.

⁸Musus di tam Kore: Wulin kayn nigi gurona vi Levi humgi yo:

⁹Lawna vi Israyel vilekgi goy jar tokŋa vi Israyel, nam margi goboy talamu, kay nigi ma li lop hay tabernaklena valamu, kay nigi ma lak vok sumun kay sunsiya. Kayni may asgi noŋɗi su?

¹⁰Naŋ hiɗi guro-biyoŋŋa sa gurona vi Levina nam margiyawa kulo talam goboyo, may nigi min lop ma ɗifin mara lo kay mige?

¹¹Naŋ hiɗi nuriyoŋ sa kuɗaŋŋa nigi tok tuwgi kat Ma-Vatɗin kayn kay na'ta. Nigi ŋurnay kat Aaron kayn nam gige?

¹²Musus gi sun kay Datan hiɗi Abiram gurona vi Eliyab kay nisi ma co'o, may nisi ala numa naysɗi.

¹³Nisi ala: Nagata Egipte ta miira hiɗi yumda ka riŋ goy haya'ta, naŋ kalma'ay goy haya' pa kay vatma goy hay fulda kayni may asaŋɗi su? May naŋ ti mul kuma lo kayn kay mige?

¹⁴Naŋ min narma kayn hay nagata ta miira hiɗi yumda may riŋ hayɗi, naŋ may ɓurawma sineɗi, vulma gulda-guldaɗi lay, naŋ min duk ir sumun kayn su? Numa may tuɗisɗi.

¹⁵Musus ka hiy ŋolo, nam di tam Ma-Vatɗina: Naŋ ma vi ɗifinna visi loɗi, la mi kuro kaw nan may vum hay ɓisi noŋɗi, nan bay li va ma joo mi sa kuɗsi kep tuwa.

¹⁶Musus di tam Kore: Naŋ hiɗi sum sa kuɗaŋ kaf tokgi jifini vok Ma-Vatɗina, naŋ hiɗi nisiya, Aaron ka lay.

¹⁷Gigekaw ma sli ganuna valamu hay ɓalamu, ɦokgi urdin kalamu, gigekaw ma co vok Ma-Vatɗin hiɗi ganuna valamu. Ganun ma li noŋ pet kis-ma' hiɗi diram dok-vasl, naŋ hiɗi Aaron ma sli ganuna vigi kigi kep kep kaw.

¹⁸Nisi yaw ganuna visi hay ɓisiya, cuk kut kalamu, ɦok urdi kalamu kaw, nisi lak goy vun guɗuk ma fi-tuwna, Musus hiɗi Aaron ka jarsi lay.

¹⁹Kore yi sumun ay kaf kat Musus hiɗi Aaron, bugol kayni gajijita vi Ma-Vatɗina ɗek tuwa'a goy kir sumun kaf.

²⁰Ma-Vatɗina law tam Musus hiɗi Aaron ala:

²¹Nigi ma vi tuwgi goy tam sum nisin tani, kay nan min ŋalsi goyo wulini wulini.

²²Nisi dab voksi gaa'a di'e: Hih! Lawna, Lawn ma sukka vaŋ ka hay sumun kafna, li suluk kayn mi sa kepe, may naŋ muɗ hiy kat sumun kaf ɗawn nanige?

²³Ma-Vatɗina di tam Musus:

²⁴Naŋ ma di tam tokŋa ala: Nisi ma vi tuwsi goy gine hiɗi ziyna vi Kore hiɗi Datan hiɗi Abiram.

²⁵Musus fokay kulo'o, nam tuɗ kat Datan hiɗi Abiram; sa ŋulona vi Israyel kaf tap kuɗsiya.

²⁶Nam di tam tokŋa ala: Vigi tuwgi goy tam ziyna vi sum sa joon lakŋ gine'e, tungi ɓigi tam slena visi noŋɗi, kay a nigi ma mit kuɗsiya kay sulukŋa visiɗi.

²⁷Nisi vi tuwsi goy gine'e hiɗi ziyna vi Kore, Datan hiɗi Abiram. Datan hiɗi Abiram kali goyo, nisi hiɗi boyna visiya, gurona visiya hiɗi guro-ŋolona visiya mol goy vun guɗukŋa visiya.

²⁸Musus di'e: Hiɗi kayni nigi ma wi ala, nan li slen kayni kay tuwan vanɗi, may ganay kayn mi Ma-Vatɗina.

²⁹La sumun lakŋi mit ɗawn ki sum segen ɦawa nala, la law ma lisin ɗawni mi ma ka li sumun kafna ni, ganay kayn mi Ma-Vatɗinɗi;

³⁰may la Ma-Vatɗin li va ma ɦuyumawa, la nagat mal vuna'awa goyo kay kuluɓ kisiya hiɗi sumuna visi kafe, la nisi jikawa gaa iriya hay liyna vi sa mitina, hay na'ta nigi ma wi ala sumun kayn ɗuw Lawn birek-cek gasi.

³¹Hay li ma vunam vat dit kayni vatna, nagat ta gaa kuɗsita mun goy wilik'.

³²Nagat mal vuna' goyo, na' kuluɓ kisiya, nisi hiɗi ziyna visi kaf, hiɗi sumuna vi Kore, hiɗi slena visi noŋ kaf.

³³Nisiya hiɗi slena visi kaf jiki gaa iriya hay liyna vi sa mitina; nagat kuluɓ kisiya, nisi sahis goy jar sum segena.

³⁴Hay li ma sum sege sa Israyella, sa ŋuyi tisina hum ciriyna visiya, nisi mun jaŋi; kay nisi di'e: Munay jaŋi, kay la naɗi nagat ma kuluɓ kay lay.

³⁵Kut may kulo hay wuralawn pa, na' ŋal sum sa kis-ma' hiɗi diram dok-vasl sa ka li ɗifinna hiɗi urdina goyo.