Read Masana ŊAƁTA 17 Bible Online

ŊAƁTA 17 - Masana bible

ŊAƁTA 17

¹Ma-Vatɗina di tam Musus:

²Daŋ tam Eliyazar goora vi Mul-ma-ɗifinna Aaron ala: Ganun ma ka jar kuta nam ma yawam goyo, cuk kut goy talam gine'e, kay nam lakŋi muɗi peldete.

³Hiɗi ganuna vi sum nisin sa fi mitta kuɗ sulukŋa visin tani, nigi ma kot kaway ma beɗayna, kay kuluɓum kay giwin-ma-ɗifinna. Kay nam maray vok Ma-Vatɗina, kay nam liy goy peldete kaw, nam lakŋi mi gi-humda tam gurona vi Israyel.

⁴Mul-ma-ɗifinna Eliyazar yaw ganun ma koti hiɗi wayna ma sum sa kut ŋalsi goyn maramna, nam kot kaway ma beɗayna kay kuluɓum kay giwin-ma-ɗifinna.

⁵Kayni mi gi-humda tam gurona vi Israyel, kay sa ma may hay jafna vi Aaronɗina ma co'o vok Ma-Vatɗina kay li ɗifini hiɗi urdinɗi, kay a nam ma li ki Kore hiɗi sum sa kuɗumna naɗi, kuɗ va ma Ma-Vatɗina dum tam Musus.

⁶Hay buurta ka'ta de kayni, gurona vi Israyel tun caw ŋurnay kat Musus hiɗi Aaron, nisi di'e: Ci sumuna vi Lawn goy kayn si nigiya.

⁷Hay li ma sumun ka gar kay li joo mi Musus hiɗi Aaron, nisi ɗuw hay galla vi guɗuk ma fi-tuwn na kayni, ɗugulla ka ŋuyi tam guɗukŋa, gajijita vi Ma-Vatɗina ɗek tuwa'a goyo.

⁸Musus hiɗi Aaron co vok guɗuk ma fi-tuwna.

⁹Ma-Vatɗina di tam Musus ala:

¹⁰Vigi tuwgi goy jar sum nisin lakŋi nan min ŋalsi goy wulini wulini. Nisi dab voksi gaa'a;

¹¹Musus di tam Aaron: Slaŋ ganuna, yawaŋ kut ta kulo kay giwin-ma-ɗifinna cukum kalamu, ɦokaŋ urdi kalamu, tuɗaŋ kat sumun gosoyo, naŋ ma li poor kisiya, kay Ma-Vatɗin muɗawa ɦiy dono ŋolo, bakmaran tun cawawa.

¹²Aaron sli ganuna, ki Musus dum nala, nam kali tam sumun kayn jaŋi, nam ɗuw kayni bakmaran coy jarsi vatiya. Nam li ɗifin hiɗi urdina, li poor kisiya.

¹³Nam col jar sa mitina hiɗi sa irina, nala bakmaran vat goyo.

¹⁴Bakmara namna ci sumun birim doogo yam fiɗi hiɗi kis-siɗiya, sa mit kuɗ Koren say hayɗi.

¹⁵hay li ma bakmaran vatawa, Aaron hot kat Musus, kalaf hay guɗuk ma fi-tuwna.

¹⁶Ma-Vatɗina di tam Musus ala:

¹⁷Naŋ ma law tam gurona vi Israyel, naŋ ma yaw zugulayn hay ɓisiya: Zugul kep kuɗ jafna jafna; kayn di ala zugul doogo yam ma' hay ɓam sa ŋulona kuɗ jafna vi Israyel kafe. Naŋ ma ɗo sem gigekaw kay zugulda valamu valamu,

¹⁸naŋ ma ɗo sem Aaron kay zugulda vi jafna vi Levi kay kuɗ sa ma ŋolla hay jaf kep kayni, zugul kalam kep kep lay.

¹⁹Naŋ ma lakam kalaf hay guɗuk ma fi-tuwna, vok di-goyta, liyn ma nan ka ŋaf hiɗi nigina.

²⁰Sa ma zugulda valam goɗawana kayni mi sa ma nan min vilekemna, nala ŋurnay ma gurona vi Israyel ka ŋurnay katgina nan min vatam goyo.

²¹Musus law tam gurona vi Israyel: Sa ŋulona kuɗ jafna maram zugul kep kep, kuɗ jafna vi sumaysi kaf, tap noŋ pet zugulay doogo yam ma'. Zugulda vi Aaron ay jar fisina.

²²Musus lak zugulayn gaa vok Ma-Vatɗina, hay guɗuk ma di-goyta hayamna.

²³Hay buurta ka'ta, hay li ma Musus kal kalaf hay guɗuk ma di-goyn kayni, nam ɗuw kayni, zugul ta kepta ka goɗiya, na' ti zugulda vi Aaron ma hay jafna vi Levina, guro-guron ka dayay ta'a, huma' ka ɓoya kaw, vuɗ amandena* ka huma'a.

²⁴Zugulay namna Musus yawamay goy vok ir Ma-Vatɗin kafe, nam maram tisiya kay nisi ma wumu, a gigekaw ma sli zugulda valamu valamu.

²⁵Ma-Vatɗina di tam Musus: Hotaŋ zugulda vi Aaron hay liyn ma di-goyta, kay ŋoma'a, kay li ɗekka tam gurona vi ŋel-gatta, kay nisi ma hin ŋurnayna, a nisi ma mitɗi kaw.

²⁶Musus li ki kayn nala, nam tap kuɗ dita ta Ma-Vatɗin dumtita.

²⁷Gurona vi Israyel di tam Musus. Ɗuwaŋ tige, sukma ka kal goyo, numa ka vata, numa ka vat kaf.

²⁸La sa tuɗ kulo goboy tam tabernaklena vi Ma-Vatɗina, nam mit de. Nala numa ma mit goy kaf su?