Read Masana ŊAƁTA 18 Bible Online

ŊAƁTA 18 - Masana bible

ŊAƁTA 18

¹Ma-Vatɗina di tam Aaron ala: Naŋu hiɗi gurona vaŋu hiɗi sum sa vo hay ziyna vi buŋ noŋ kafna, nigi ma ziy jiw-zlata ta sumun la' kat liyn ma peldetna. Naŋ hiɗi gurona vaŋ kaf nigi ma ziy wurakŋa vi jiw-zlata ta nigi kay tuwgi la'a hay li ma nigi ka li ɗifinna.

²Guro-biyoŋŋa sa hay jafna vi Levi kaw naŋ ma yisi ay taŋu, kay nisi ma tap kulo taŋu kay sunaŋu, kayn hay li ma naŋ hiɗi gurona vaŋu ka vun guɗukŋa vi di-goyta.

³Nisi ma ŋom sle ma naŋ min vulsi hagat kalamna hiɗi sle ma law kay guɗukŋ kafna, may jakŋa ma ka hay liyn ma peldetna nisi ma co talamɗi, nisi ma co tam giwin-ma-ɗifinnaɗi kaw, kay a naŋ hiɗi nisi kaf ma mit kuɗ tuwgiɗi.

⁴Nisi ma tap kulo taŋu, nisi ma ŋom slen ma tam guɗuk ma fi-tuwna, hiɗi lopna vi guɗukŋa kafe. Sa ma pul as kal jargiɗi.

⁵Nigi ma ŋom sle ma tam giwin-ma-ɗifinna hiɗi liyn ma peldetna, kay ɦiyda vi Ma-Vatɗina ma li kay gurona vi Israyelɗi.

⁶Humaŋu, nan yaw guro-biyogina sa Levitna goy jar gurona vi Israyel, nan vulsi mi Ma-Vatɗina, nan vulsi goy migiya kay li lop hay guɗuk ma fi-tuwna.

⁷Naŋu hiɗi gurona vaŋ kaf, nigi ma ŋom liyn ma ɗifinna, hiɗi sle ma tam giwin-ma-ɗifinna kafe, hiɗi sle ma ka kalaf dik sligar ma gaɓayna kafe, kayn mi lop ma nigi ma lumna. Lopna vi ɗifinna kayni nan vulgit migi nigi ɦawa'a. La sa ma pul coowa goboyo, kitata valam ti mitta.

⁸Ma-Vatɗina di tam Aaron: Humaŋu, jar sle ma gurona vi Israyel vulum goy ir manna kaf kayni, ma vuli goy tanu hiɗi ɓam meɗi kulona nan vulum maŋ naŋu, nan vulum maŋ naŋu hiɗi gurona vaŋu, nam ir vaŋu kuɗ mul ma ɦoki kaŋŋa, gat na'ta hini kayn dok-doko.

⁹Slen ma ir vaŋu jar sle ma peldetna ma bay ŋal hay kut tuwan kayni, ɗifinna kafe, vulda kafe, ɗifin ma poora kafe, ɗifin ma nisi lum tanu kay sulukŋa kafe; slen namna ma peldet ŋolla lakŋi nam vaŋu hiɗi gurona vaŋu.

¹⁰Nigi ma tum hay liyn ma peldetna; sum sa jufayn kaf as tumu, nigi ma ɗuwum ki nam peldete nala.

¹¹Sle hena ma ir vaŋŋa lo kayni: Vulda ta gurona vi Israyel mara' hiɗi ɓisi meɗay kulota kaf, hay li ma nisi muɗa' gala' kulo kafe, vulda na'ta nan vula' maŋ naŋu, mi gurona vaŋ sa jufayna hiɗi sa boyna kafe, kayni ti gatta ta hini jargi dok-doko, sa ma vo hay ziyna vaŋu, ma tuwam may liy liwisɗina, nam as ti'e.

¹²Nan vulaŋ vun-jaf ma jewna ma nisi vulum tanu, mula, vin ma jibetna hiɗi alkamarena kaw.

¹³Vun jafna visi ma niy jewna ma nisi maram mi Ma-Vatɗina nam vaŋu, sa ma hay ziyna vaŋu ma muɗ tuwam liwisɗina nam as ti'e.

¹⁴Hay Israyel, sle ma teli kay tun ɓam talamɗin kaf kayn nam vaŋu.

¹⁵Jar sle ma irina ma vuɗ jewn kaf, ma nisi vulum goy tam Lawn kaf kayni, la si sumuna lebo muura kaw, nam vaŋu. May gurona vi sumuna sa vuɗi jewna naŋ ma hot muɗsiya, muur ma liwisna kaw naŋ ma hot muɗ gurona valam ma vuɗi jewna.

¹⁶Naŋ hot muɗum hay li ma nam coowa til kepe, kuɗ ŋaɓta vaŋu, muɗum ir gurjuta sikel* vasl, ŋray hiɗi sikel ma ka li lop hay liyn ma peldetna, sikel kep ir gera* dok-ma'.

¹⁷May naŋ as hot muɗ gurona vi luwayn ma vuɗi jewnɗi lay, gurona vi fok-diminɗi lay, vi fok-meenɗi lay, kay nam lakŋi may liwisɗi. Naŋ ma yamam busuwam kulo kay giwin-ma-ɗifinna, naŋ ma ŋalam mulam goyo, kayni mi ɗifin ma ŋalay hay kuta, hista valam ŋaa'a ŋolo kir Ma-Vatɗina.

¹⁸Sliwna valam vaŋu, hiɗi war-digŋa ma muɗum galam kulona, hiɗi bigiyta ta jufta kaw.

¹⁹Nan vulum maŋu, mi gurona vaŋu sa jufayna hiɗi sa boyna, ɗifin ma peldetna ma gurona vi Israyel maram tam Ma-Vatɗina hiɗi ɓisi meɗi kulon kafe. Kayni ti bonot ta sa kusa'ɗita, ta hini jargi dok-dok vok Ma-Vatɗina, vaŋ naŋu hiɗi jafna vaŋ lay.

²⁰Ma-Vatɗin di tam Aaron: Naŋ ma ŋom va ma ir vaŋu hay nagata visi tan noŋɗi, galla vaŋ ma li jarsi noŋɗi, jar gurona vi Israyel kaf kayni, galla vaŋu hiɗi sle ma ir vaŋŋa mi nanu.

²¹Gal-ma-doogona ma gurona vi Israyel lum kaf nan vulum mi gurona vi Levi, kuɗ lop ma nisi ka lum hay guɗuk ma fi-tuwna.

²²Gurona vi Israyel as co kulo goboy tam guɗuk ma fi-tuwn noŋɗi, kay a nisi tun suluk kisiya, a nisi ma mitɗi.

²³Sum sa Levitna ma li lop hay guɗuk ma fi-tuwna, nisi ma ziy sulukŋa visi kay tuwsiya, nisi as fi gal liy mara jar gurona vi Israyel noŋɗi, kayni ti gatta ta hini dok-dok jar gurona vigi sa bugolgina.

²⁴Galla ma nan vulum mi sa Levitn kayni, mi gal-ma-doogona ma gurona vi Israyel maram tanu hiɗi ɓisi kulo meɗiya; kuɗ na'ta nan ka di kisi ala: Galla visi may jar ɓurawta vi sa Israyel segenɗi.

²⁵Ma-Vatɗina di tam Musus:

²⁶Naŋ ma di tam sum sa Levitn ala, hay li ma sum sa Israyella margi gal-ma-doogonawa migiya, nigi ma yaw kuɗumu vulum mi Ma-Vatɗina, ki gal-ma-doogon ma kalaf hay gal-ma-doogon nala.

²⁷Gal ma nigi vulum goyn kayni, ma li ŋaɓay ki alkamarena ma yawam hay muɗakŋa nala, ki vin ma calam hay doway ma keslna nala.

²⁸Ki kayn nala nigi ma li vulda tam Ma-Vatɗina, kuɗ gal-ma-doogona ma gurona vi Israyel ma vulgitna, gal-ma-doogo namna ma nigi yawam goy mi Ma-Vatɗina nigi ma vulum mi mul-ma-ɗifinna Aaron.

²⁹Kuɗ vulda ta sumun la' tigi kafta, nigi ma yaw mara goy mi Ma-Vatɗina; yaw kuɗ ma ŋaa'a jaram kafna, yaw kuɗ gal ma vuli goy ɗifinna.

³⁰Naŋ ma disi ala: Hay li ma nisi yaw ma ŋaanawa goy kuɗumu, gal-ma-doogona nigi ma ŋaɓam goy mi sa Levitna, ki slen ma fum hay muɗakŋa hiɗi vin ma fum hay doway-firin nala.

³¹Nigi ma tum goy hay liy marige kaw, nigi hiɗi sum sa vo hay ziyna vigiya; kay kayni mi wurakŋa vigiya kuɗ lop ma nigi lum hay guɗuk ma fi-tuwna.

³²Suluk as tun kigi kuɗ kaynɗi, la nigi yaw ma ŋaan jaram kaw, vulda peldetta vi gurona vi Israyel nay muɗi kigi liwisɗi, nigi as a mitɗi lay.