Read Masana ŊAƁTA 20 Bible Online

ŊAƁTA 20 - Masana bible

ŊAƁTA 20

¹Hay til ma jewna, gurona vi Israyel kaf co hay fulda vi Sin. Nisi lak hay Kades. Miriyam mit hay liy namna, nisi pa'a may.

²Niy ma sumun cumna may hay liy namnaɗi, sumun yaw kulo'o kat Musus hiɗi Aaron.

³Sumun tun caw nef Musus: Nisi di'e: Hay li ma ɓosiyoma'n mitay goy vok Ma-Vatɗin zawn numa mit kuɗsiɗi kay mige?

⁴Sumuna vi Lawna nigi marsi goy hay fulda tani, a nisi vat goy hiɗi farayna visi lay kayn kay mige?

⁵Nigi yawma'ay goy hay Egipte pa kay marma hay liy ma joon tani kay mige? May mi liyn ma sa as zum hayɗi lay, gu-gum may hayɗi lay, gulda-gulda mayɗi lay, gu grenadinna* mayɗi lay, niy ma ci mayɗi lay.

⁶Musus hiɗi Aaron vi tuwsi goy jar tokŋa kay tuɗ kalaf hay guɗuk ma fi-tuwna. Nisi dab voksi gaa'a; nala gajijita vi Ma-Vatɗin vul tuwa' kirsiya.

⁷Ma-Vatɗina di tam Musus ala:

⁸Slaŋ zugulda, tokaŋ sumuna, naŋu hiɗi ɓasuŋŋa Aaron, hay li ma nisi tokawa, nigi ma law tam hiɗiyna, nam ma vul niyna, naŋ ma vulsi niyn ay goy tam hiɗiyn pa, nisi hiɗi farayna visi pet ma ci niya.

⁹Musus sli zugulda ta ka vok Ma-Vatɗina, ki Ma-Vatɗin vulum hagat nala.

¹⁰Musus hiɗi Aaron tok sumun goy tam hiɗiyna. Nam disiya, nigi sa ŋelayna, humgi yo, numa asay kay vulgi niyn ma tam hiɗiyt zawni su?

¹¹Bugol kayni Musus yaw ɓalam kulo'o, nam ci hiɗiyn sem ma' hiɗi zugulla. Niyn jaŋ ay goy ŋolo, sumun kaf ci'e, farayn ci lay.

¹²Bugol kayni Ma-Vatɗina di tam Musus hiɗi Aaron ala: Nigi min vi hayanɗi, nigi min ɗek peldetta van goy kir gurona vi Israyelɗi, kay na'ta sumun kayni, nagat ta nan min vulsit ɗawni, ma kalsi kulo haya' si nigiɗi.

¹³Kayni mi niyna vi Meriba namna, ma gurona vi Israyel nef Ma-Vatɗina hay li ma nam ɗek peldetta valam goy kirsiya.

¹⁴Hay Kades pa, Musus cuk sumun tam mul ma Edomna, kay dum ala: Numa Israyella sa guro-biyoŋŋa ka daŋis ala: Lasta ta numa ca'ta kaf naŋ wa'a.

¹⁵Sumayna kali ɗawni hay Egipte, numa musi ta-ta ɗawni. May sum sa Egipten curoɗma ŋolo, sumayma lay numa lay.

¹⁶Numa siwel tam Ma-Vatɗina, nam humma delma'a. Nam gi sunda-wuralawna valamiya, sunda-wuralawna valamu yawma ayawa goy hay nagat Egipte, wulini numa ka hay Kades, hoyok-ziyn ma ka hay vun nagata vaŋ ma vatay goyna.

¹⁷Naŋ hinma jik hay nagata vaŋu, numa as jik kulo hay sineɗi lay, jo gulda-guldanɗi lay, ci niy ma hay kaarɗi lay; may numa jik ɗawn hay haga ŋolda, numa as cal goy gulɗi lay jufɗi lay ta-ta numa cap goy kay nagata vaŋu.

¹⁸Mul ma Edomna hotom dita: Naŋ as jik hay nagata vanɗi, la naɗi nan ma kalis goy kiraŋ hiɗi kew-gaferaŋa.

¹⁹Gurona vi Israyel di'e: Numa jik ɗawn hay haga ŋolda, la numa hiɗi farayna vuma ci niyna vaŋawa, numa as wurakaŋu. Numa jikis ɗawn kay sema ɦawa nala, va mara ma numa lum mayɗi.

²⁰Mul ma Edomna di'e: Naŋ as jikɗi; nam kali goy kir Musus hiɗi sumun kuɗum ŋolo, tuwsi koti dono'o kaw.

²¹Mul ma Edomna min hin sa Israyel jik hay nagata valamɗi, sa Israyel cal misi goyo.

²²Tokŋa vi sa Israyel kaf yaways hay Kades pa, co hay hiɗiyta vi Hor.

²³Gal hiɗiyta vi Hor, vun nagat Edom kayni, Ma-Vatɗina di tam Musus hiɗi Aaron ala:

²⁴Wulin kayni, Aaron mit ɗawn mitiya; kay nagata ta nan min vula' mi gurona vi Israyel ɗawni, nam as kal haya' noŋɗi, kay nigi ŋelan vunanu kat niyna vi Meriba.

²⁵Vaŋ Aaron hiɗi goora valam Eliyazar kuɗaŋu, naŋ ma jiksi kulo kay hiɗiyta Hor.

²⁶Sligara vi Aaron ma talamna naŋ ma fokom goyo, cukum tam goora valam Eliyazar, Aaron ma mit hay liy namna may.

²⁷Musus li kuɗ va ma Ma-Vatɗin dumtina, nisi jik kulo kay hiɗiyta vi Hor, goy haraŋ kir sumun kaf.

²⁸Sligar ma tam Aaronna Musus fokom goyo, nam cukum tam goora valam Eliyazar. Aaron mit hay liy namna, kulo kay yam hiɗiyta. Musus hiɗi Eliyazar jikay gaa kay hiɗiyta.

²⁹Hay li ma sumun kaf wi ala nam mitawa, nisi tiyim buur dok-ɦidi.