Read Masana ŊAƁTA 22 Bible Online

ŊAƁTA 22 - Masana bible

ŊAƁTA 22

¹Gurona vi Israyel kaliya, nisi vi guruna visi hay liyn ma beɗna vi Mowab, goy bugol Yordan, ɗiger vok Yeriko.

²Balak goora vi Sippor, nam wi slen ma Ma-Vatɗin lum tam sa Amoriyan kafe.

³Sum sa Mowabna kaw tuwsi muɗ nar ŋolo kisiya, kay nisi ŋol ku'u, tuwsi muɗ lisi nari kay gurona vi Israyel.

⁴Sa Mowabna di tam sa ŋulona vi Madiyan: Sum nisin kayni, slena vay kaf nisi ma vurumumu, ki farayn ti hat ma hay sinen nala. Hay na'ta kayni, Balak goora vi Sippor ay mi mul ma hay Mowabna.

⁵Nam cuk sumun tam Balaam goora vi Bewor, hay Petor kel niy-lumna, hay nagata vi sumuna valamu, kay yumiya, a dum ala: Humaŋu, sum sara may goy hay Egipte pa, yam nagat hobi kisi hob, nisi ka lakay goy vokan ɗiger.

⁶Nan siɗawaŋu kay naŋ ma co tani kay beɗ sum nisina, kay nisi dono suwan nanu, hiɗi kayni nan as kol kisiya, digiɗsi goy hay nagata klasige. Kay nan wi ala sa ma naŋ gi bol kalamna nam fi bolda, sa ma naŋ beɗemna kaw nam fi be'da.

⁷Sa maariyana vi Mowab hiɗi sa maariyana vi Madiyan kaliya, slen ka hay ɓisiya ki san tuɗ vulum mi sa ma gireyta nala. Nisi co tam Balaam, nisi dum sunda vi Balak.

⁸Balaam di tisiya, burgi tani, nan ma hotgi dita ta Lawn min di tanu. Nala sa ŋulona vi Mowab lak hay ziyna vi Balaam.

⁹Lawn co tam Balaam ka dumu, sum sa vo hay ziyna vaŋ kayn si sum sarige?

¹⁰Balaam hot dit mi Lawna: Cuksi ay tan kayni mi Balak goora vi Sippor, mul ma Mowabna, kay nisi ma dan ala:

¹¹Humaŋu, sum sara may goy hay Egipte pa, yam nagat kisi hobi hob, naŋaya, naŋ ma beɗsiya; ki kayn nala nan ma as dursiya, digiɗsi goy klasige.

¹²Lawn di tam Balaam: Naŋ ma tuɗ hiɗi nisi noŋɗi, naŋ ma beɗ sumun kayni noŋɗi, kay bolda ka kisiya.

¹³Balaam fok kulo graw culumta, nam di tam sa ŋulona vi Balak ala: Hotgi hay nagata vigiya, kay Ma-Vatɗina may vulan hagat kay tuɗis hiɗi nigiɗi.

¹⁴Nala sa ŋulona vi Mowab yaw kulo'o, nisi hotay tam Balak, ka dum ala: Balaam min co hiɗi numaɗi.

¹⁵Lo Balak hot cuk sa ŋulona, nisi kuɗ tuwsi ŋolo, suburta visi suw sa jewna kaw.

¹⁶Nisi co tam Balaam, nisi dumu: Balak goora vi Sippor ka di ala: Naŋ ma co tanu, hin sa telaŋ noŋɗi.

¹⁷Kay nan min vulaŋ suburta ŋolo, nan min vulaŋ sle ma naŋ joban kalam kafna; nan siɗawaŋu kay naŋ ma co'o kay beɗan sum nisina.

¹⁸Balaam hot dit mi sa sunda vi Balak ala: La Balak vulan ziyna valam hobay hiɗi doorota hiɗi ora kaw, nan as li va mara suw goy kay va ma Ma-Vatɗin Lawn dantinɗi.

¹⁹Wulin kayn nan siɗawgiya kay henjeni, nigi ma lak tani, nan ma wi va ma Ma-Vatɗin ma hot dantina.

²⁰Lawn co tam Balaam hay henjeta, ka dum ala: Kay sumun lakŋi co kayni kay yaŋu, nala fokaŋ kulo'o, tuɗaŋ hiɗi nisiya; may naŋ ma lum mi va ma nan min daŋgina.

²¹Balaam fok kulo graw culumta, nam gan kurota valamu, kali kuɗ sa ŋulona vi Mowab.

²²Ma-Vatɗina muɗ ɦiy ŋolo kay kalta vi Balaam; nala sunda-wuralawna vi Ma-Vatɗina col hay hagata kay telemu. Balaam ka ɓey kulo kay kurota valamu, sa sunda valam sa ma'na ka kuɗumu kaw.

²³Kurota wi sunda-wuralawna vi Ma-Vatɗina ka coli hay hagata, kew-gaferaŋa ka patay goy hay ɓalamu, kurota cal goy hay hagata, tun ira' goy hay sinena. Balaam to kurota kay hota'ay hay hagata.

²⁴Sunda-wuralawn vi Ma-Vatɗina col hay hagat ta goota jar gulda-guldana; gulmunna ka kulo hay galam ma' pete.

²⁵Kurota wi sunda-wuralawna vi Ma-Vatɗin lo, na' heb tuwa' kulo kat gulmunna, heb sem Balaam kulo kat gulmunna, nala Balaam to' mara lo.

²⁶Sunda-wuralawna kal goy vok gine'e lo, nam col hay liyn ma kurot as cal goy gal gulɗi lay, gal jufɗi layna.

²⁷Kurot wi sunda-wuralawna, na' ɦuruk gaa kuɗ Balaam. Balaam dikam muɗ ɦiy ŋolo, nam to kurot hiɗi zugulla.

²⁸Ma-Vatɗin mal vun kurot goyo, na' ka di tam Balaam ala: Nan laŋgi mi mige? A naŋ ton sem hiɗi noŋ kayni?[6]

²⁹Balaam hot dit tam kurot ala: Kay nak pananu, lali kew-gaferaŋ ka hay ɓanu, nak ciy goy kan wulini.

³⁰Kurot ka dumu: Nanu ti kurota vaŋu ta naŋ ka ɓe kanu hay buurta kafta, ta-ta vaydi ɗisu? Nan ka laŋ jew ki kayn nala kaw su? Nam hot dit ala: A'a.

³¹Ma-Vatɗin mal ir Balaam goyo, iram cuk kay sunda-wuralawna, nam ka coli hay hagata, kew-gaferaŋa valam ka patay goy hay ɓalamu, nala Balaam girif gaa'a, dab vokom gaa'a.

³²Sunda-wuralawna vi Ma-Vatɗina di talamu, wulini naŋ to kurota vaŋawa sem ɦidi noŋo kayn kay mige? Wulini nan kali goy kiraŋ kayni kay telaŋu, kay hagat ta vokaŋga waŋŋi ti hagata vi ba-goyta.

³³Kurot wan jewe, kay na'ta na' cal goy kanu sem ɦidi; lali na' cal cali goy kanɗi ni, naŋ ciy kan vatiya, na' hini kan iri may.

³⁴Balaam di tam sunda-wuralawna: Nan li sulukawa, kay nan may wi jew ala naŋ ka coli vokan hay hagataɗi; wulin kayni, la naŋ min ala nan tu'ɗi, nan as hota.

³⁵Sunda-wuralawna vi Ma-Vatɗina di tam Balaam: Tuɗaŋ hiɗi sum nisina; may naŋ ma dum mi law ma nan ma daŋgina, nala Balaam tap kuɗ sa ŋulona vi Balak.

³⁶Balak hum ala Balaam ka co'o, nam kali goy kay ŋafam iramu, ta-ta hay hoyok-ziyna vi Mowab ma ka hay jaara vi Arnon, hay jaara ma goy gaŋŋa.

³⁷Balak di tam Balaam: Nan may cuk sumunis kataŋ kay yaŋaya ɗisu? Naŋ may co katanɗi kay mige? Nan asay kay li sle ma vulaŋ suburta ɗisu?

³⁸Balaam di tam Balak: Wulini nan coowa taŋu ɗisu? Wulin kayni hagat ka kanu kay nan di va'a ki nan min nala su? Nan dum ɗawni mi yoboyn ma ma-Vatɗin min tunum hay vunanu.

³⁹Balaam kali kuɗ Balak, nisi co hay Kiryat-Hutsot.

⁴⁰Balak ŋat luwayna hiɗi fok-dimina, nam jokom mi Balaam hiɗi sa ŋulona sa ay hiɗi namna.

⁴¹Graw culumta, Balak vi Balaam kuɗumu, nam jikim kulo kay Bamot-Baal, Balaam wi gal sum segena.