Read Masana ŊAƁTA 23 Bible Online

ŊAƁTA 23 - Masana bible

ŊAƁTA 23

¹Balaam di tam Balak: Tani naŋ ma inan giwin-ma-ɗifinna siɗiya, naŋ ma ŋatan luway ma jufayn siɗiya hiɗi fok-gamalan siɗiya lay.

²Balak li kuɗ va ma Balaam di'e: Giwin-ma-ɗifinna siɗiya kayni, ma kepna nisi bur put kulo kalam kep kepe, ɦu-gamala kep kepe kaw, ta-ta goy kalam kafe.

³Balaam di tam Balak: Colaŋ tani tam liyna vaŋ ma ŋal ɗifinna, nan min tuɗ goy gine'e; la li ŋalɗi, Ma-Vatɗin ma co ŋafan iranu, nan ma daŋ kay va ma nam ma ɗekem kiranna. Nam kal hay liyn ma kulo jiŋiliŋi.

⁴Lawn co goy vok Balaam, Balaam dumu: Nan kot giwin-ma-ɗifinnawa siɗiya, kulo kay giwin-ma-ɗifin ma kepna nan ŋat put kep kepe, ɦu-gamala kep kep kaw, ta-ta goy kalam siɗiya kafe.

⁵Ma-Vatɗin tun yoboyn hay vun Balaam, ka dum ala: Hotaŋ tam Balak, naŋ ma dum ki kayn nala:

⁶Nam hotay talamu; nam fi Balak colay tam liyna valam ma ŋal ɗifinna zaw, namu hiɗi sa ŋulona vi Mowab kafe.

⁷Balaam sli ditiya di'e: Balak garanay goy hay Aram pa, mulla vi Mowab marani goy hay hiɗiy ma gal kuɗuwn pa, ala: Naŋaya, beɗaŋ Yakub, ala naŋaya, muɗaŋ ɦiy kat sa Israyella.

⁸Sa ma Lawn may beɗemɗina nan beɗem ɗawn be'tige? Nan as muɗ ɦiya hay li ma Lawn may muɗ ɦiyɗi ɗawn ir nanige?

⁹Nan ka sarsi kulo kay yam hiɗiyna, nan ka peɗsi kulo kay liyn ma jiŋiliŋŋa: Nisi si sum sa liyn ma musta visi goy valamu, si sum sa tap kulo jar sum segenɗi.

¹⁰Sa ma as ŋaɓ ŋeslna vi Yakub mi gige? Sa ma asay kay li ŋaɓta vi gal ma fiɗina visi mi gige? A nan ma mit ki sum sa ɗigera nala mitge, dabta vanu ma li ŋray ki nisi nala lige.

¹¹Balak di tam Balaam: Naŋ lum tan na kayn mi mige? Nan garaŋay kayni kay naŋ ma beɗ sa gawt kanna, may naŋ ka gisi bolo kay mige?

¹²Nam di'e: Lopna van kayni kay di va ma Ma-Vatɗina hin hay vunanu ɗisu?

¹³Balak dumu: Naŋay hiɗi nanu hay liyn mara lo, iraŋ ma wisiya; naŋ ma wum ɗawn mi gal ɦawa'a, naŋ ma wisi kafɗi. Hay liy namna naŋ ma beɗan sum nisina.

¹⁴Nam tuɗum hay sinena vi Sofim, kulo kay hiɗiyt Pisga; nam in giwin-ma-ɗifinna siɗiya, ŋat put kulo kalam kep kep, ŋat ɦu kulo kalam kep kep lay.

¹⁵Balaam di tam Balak: Colaŋ tani goboy tam liyn ma ŋal ɗifinna vaŋu, nan min tuɗ ŋaf hiɗi Lawna.

¹⁶Ma-Vatɗina co vok Balaam, nam tun yoboyn hay vunamu, nam dumu: Hotaŋ kat Balak, naŋ ma dum ki kayn nala:

¹⁷Nam hot talamu; Balak ka coli tam liyn ma ŋal ɗifinna valam zaw, hiɗi sa ŋulona vi Mowab kuɗumu. Balak dumu: Ma-Vatɗin daŋay anige?

¹⁸Balaam sli dita valamiya nam di'e: Fokaŋ kulo'o Balak humaŋu, jakaŋ humaŋ tanu goora vi Sippor.

¹⁹Lawna nam may mi sa'a kay ka sinɗi, nam mi goora vi sa'a kay hamɗi kaw. Va ma nam dum dina, nam asay kay lumɗi su? Va ma nam dum goy dina, nam as hobom vunamɗi su?

²⁰Humaŋu, nam vulan hagat kay nan gisi bolo, kay nisi giy bol kalamu, nan as kus bolda valam noŋɗi.

²¹Iram min wi jiw-zlat hay ziyna vi Yakub noŋɗi, nam min wi bay-ɗigerta hay Israyel noŋɗi. Nam Ma-Vatɗina mi Lawna visiya, nam ka jarsiya, nam mi mulla visiya, nam mi ma lisi diksi firi ŋolo.

²²Lawna kalsi ay goy hay Egipte pa, nam kisiya ki donota vi funda nala.

²³Nooyna may as li va tam Yakub noŋɗi, gireyta may li va tam Israyel noŋɗi kaw, hay buur ma ŋaɓay ŋaɓna dit ma di tam Yakub hiɗi Israyel ala: Lopna vi Lawna mi marige?

²⁴Sum nisina yaw kulo'o ki zlo tan-cata nala, lak kulo ki zlo manjufna nala, la nam bay mut sliwn tuwa, nam may bur gaaɗi. La nam bay ci busuw va ma nam vumna tuwa, nam may bur gaaɗi.

²⁵Balak di tam Balaam, la naŋ may beɗsi naŋɗi kaw, marya naŋ gisi bolɗi.

²⁶Balaam hot dit tam Balak: Nan may daŋ ala nan ma dum mi va ma Lawn dantina ɗisu?

²⁷Balak di tam Balaam: Naŋay yo, nan min naraŋ hay liyn mara'a; kla Lawn ma vulaŋ hagat kay naŋ ma beɗsi hay liy namna klasige.

²⁸Balak tuɗ Balaam kulo kay yam hiɗiyta vi Pewor, goy vun fulda.

²⁹Balaam di tam Balak: Naŋ ma inan giwin-ma-ɗifinna siɗiya tani, naŋ ma ŋatan luway-jufayn siɗiya, ŋatan fok-gamalan siɗiya kaw.

³⁰Balak li kuɗ va ma Balaam di'e: Nam ŋat luway-jufayn siɗiya hiɗi fok-gamalan siɗiya kaw kulo kay giwin-ma-ɗifinna namna.