Read Masana ŊAƁTA 24 Bible Online

ŊAƁTA 24 - Masana bible

ŊAƁTA 24

¹Balaam wi ala ŋaa'a kir Ma-Vatɗina a nam gi bol kay sa Israyella, nam min tuɗ ki sem ma jewn nala kay li nooyna loɗi; may nam muɗ iram hay gal ma fulla.

²Nam poŋ iram kulo na kayni, sum sa Israyella ka moli gaa kuɗ jafsiya jafsiya. Ki kayn nala Ŋusta vi Lawna cuk kalamu.

³Balaam sli ditiya nam di'e: Kayni mi yoboyna vi Balaam, goora vi Bewor, yoboyna vi sa ma iram goy maliya,

⁴yoboyna vi sa ma hum dita vi Lawna, sa ma wi slen ma Lawn ma gaŋeraŋ-petna ɗekem kiramna, sa ma dab vokom gaa'a, iram mal goyo kaw.

⁵Guɗukŋa vigi jifiya, nigi sa fi Yakubna, ziyna vigi kaw, nigi sa fi Israyella,

⁶nisi hum vun tuwsi ki liyn ma beɗna nala, ki jardeŋ ma goboy hiɗi niy-lumna nala, ki gun-alowes ma Ma-Vatɗin pumna nala, ki gu-gamna piy kuɗ fiyokom kel niy-lumna nala.

⁷Niy ma humamna riŋ goyo, jafna visi biyay ŋolo kay niy ma ka ŋolla. Mulla visi suw Agag hiɗi ŋolda, mulda visiya muɗi dono'o kaw.

⁸Lawn kalsiyay goyo hay Egipte, nam kisiya ki donota vi funna nala. Jaf sum sa min fok kulo katsina nam ɓulaksi goyo, nam kussi zoksiya, cuksi gaa'a kaw hiɗi ɓarawta valamu.

⁹Nisi kus ŋulofsi gaa'a, bur gaa'a ki zlon nala, ki zlo tan-cata nala: Sa ma as foksi kulon ɗawn mi gige? Bolda ka kay sa ma gigi bolo, be'da ka kay sa ma beɗgiya kaw.

¹⁰Balak dikam muɗ ɦiy ŋolo kat Balaam; nam ci ɓalamu, di tam Balaam: Nan yaŋay kayni kay naŋ ma beɗ sa gaw kanna. Wulin kayni naŋ gisi bolawa sem ɦidi.

¹¹Wulin kayni piraŋ jaŋi, tuɗaŋ hay nagata vaŋu. Nan di jew ala nan ma vulaŋ suburta, may Ma-Vatɗina telaŋ kay fi subur na'ta.

¹²Balaam hot dit mi Balak: Hey! Sum sa naŋ cuksis tanna nan may disiɗi su?

¹³Nan disi ala: La Balak vulan ziyna valam hobay hiɗi doorota hiɗi or kaw, nan as kay li va goy kay tuwanu, suw va ma Ma-Vatɗin dum tanuɗi, nan disi ala nan dum ɗawni mi va ma Ma-Vatɗin di tanu ɗisu?

¹⁴Humaŋu, wulin kayn nan min tuɗ tam sumuna vanu. Naŋaya, nan min ɗekaŋ kay va ma sa Israyella ma lum tam sumuna vaŋu hay liyn ma vokŋa.

¹⁵Balaam ka di yoboyn ala: Kayni ti dita vi Balaam goora vi Bewor, kayni mi yoboyna vi sa ma iram goy maliya,

¹⁶yoboyna vi sa ma hum dita vi Lawna, sa ma wi varta vi ma Kulo-Jamna, sa ma wi slen ma Lawn ma gaŋeraŋ-petna ɗekem kiramna, sa ma dab vokom gaa'a, iram mal goyo kaw.

¹⁷Nan ka wisiya, may wulinɗi, iran ka wisiya, may goy gine'e. Mislekka may goy vi Yakub pa, zugulda-mulda may goy vi Israyel pa, na' ci sumuna vi Mowab kuɗ jaksiya, na' ci gurona vi Set gaa kafe.

¹⁸Nisi muɗi ŋol kay Edom, nisi muɗi ŋol kay Seyir, sa gawt kisina. Sa Israyella ɗek donota visi goyo.

¹⁹Sum sa may goy vi Yakub pana ma ti mul ta-ta, sum sa pir goy hay hoyok-ziyn pana nisi cisi goyo,

²⁰Balaam wi Amalek, nam sli ditiya, di'e: Amalek mi ma jewna vi nagan kafe, may buur kep nam ma ɓulak goyo.

²¹Balaam wi sa Keniyena, nam sli ditiya di'e: Ziyna vigi dono ŋolo, tokosayna vigi tuni kulo kay hiɗiyna.

²²May nigi sa Keniyen ma digiɗis goyo, hay li ma sa Asiriyan ma nargi goy gorvo'o.

²³Balaam sli ditiya nam di'e: Haha! Sa ma col dig Lawn ɗawn mi gige?

²⁴May lumna ma may goy hay Kittim pa, nisi ma kol kay sa Asiriyana, nisi ma kol kay sa Hebrena; nisi kaw ma ɓulak goy lay.

²⁵Balaam fok kulo'o, kal hay nagata valamu, Balak kaw kal hay galla valam lay.