Read Masana ŊAƁTA 28 Bible Online

ŊAƁTA 28 - Masana bible

ŊAƁTA 28

¹Ma-Vatɗina di tam Musus:

²Naŋ ma vul dita tam gurona vi Israyel ala: Hay buur ma colay colla nigi ma maran ɗifinna, ɗifin namna kayni mi tina vanu ma ŋalay hay kuta, hista vamu kiran ŋaa'a ŋolo.

³Naŋ ma di tisi ala: Kayni mi ɗifinna ma ŋalay hay kuta ma nisi ma vulum tam Ma-Vatɗina: Hay buurta kaf kayni, nisi ma yaw guro fok-dimi ma' ma moy may talamɗina ma busata valam kep kep kaw, namu mi ɗifin ma ŋal-goyna ma dok-dokŋa.

⁴Goor ɦu-dimi ma kepna naŋ ma ŋatam graw culumta, ma kep hena naŋ ŋatam vulatita.

⁵Tap ɗifin namna hiɗi futuw ma hiliɓina ir goto hiɗi, hiɗi mul ma kilira vi olive ir litir kep hiɗi gali.

⁶Kayni mi ɗifin ma ŋal-goyna ma dok-dokŋa, ŋray hiɗi ma lum kulo'o kay hiɗiyta Sinay; mi ɗifin ma ŋalay hay kuta, ma hista valam ŋaa'a kir Ma-Vatɗina.

⁷Vin ma yamam goy kuɗ goor ɦu-dimi ma ŋatam graw culumtana ma li ir litir kep hiɗi gali, ma maram vok Ma-Vatɗina hay liyn ma peldetna.

⁸Goor ɦu-dimi ma ma'na naŋ ma ŋatam hay vulatita, vin ma yamam kuɗumna ma li ŋray ca ki ma graw culumtana nala kaw; kayni mi ɗifin ma ŋalay hay kuta, hista valam ŋaa'a ŋolo kir Ma-Vatɗina.

⁹Hay buurta vi sabatna, nigi ma ŋat guro fok-dimi ma' ma moy may talamɗina, ma busata valam kep kepna, kay ɗifin ma tapam kuɗumna, nigi ma yaw futuwna ma digeɗna ir goto karkiya, tapay hiɗi ɗifinna vi vinna kaw.

¹⁰Kayni mi ɗifin ma ŋal-goyna vi sabatna, kay sabatn kafe, tapay hiɗi ɗifin ma ŋalam dok-dokŋa hiɗi niy ma yamam goyna kaw.

¹¹Kayni mi ɗifin ma nigi ma ŋalam vok Ma-Vatɗina hay tun cawta vi tilla vigiya: Luway ma joriyo ma', ɦu-gamala kep, guro fok-dimi siɗiya ma moy may talamɗin siɗiya, ma busata valam kep kepna;

¹²kayni mi ɗifin ma nigi ma tapam kuɗ put ma kepna: Futuw ma digeɗna ma rigasay hay mula ma li ir goto zleeŋe, goto karkiya kay ɦu-gamalana may.

¹³Goto ɦidi kay goor ɦu-dimi kep kep may. Kayni mi ɗifin ma ŋalay hay kuta ma hista valam ŋaa'a ŋolo kir Ma-Vatɗina.

¹⁴Vin ma tapam kuɗumna ma li ir litir ɦidi kay put-guju ma kepna, litir ma' kay ɦu-gamalana, litir kep hiɗi gali kay goor ɦu-dimina. Kayni mi ɗifin ma nigi ma lum jar tilla kafe hay busata.

¹⁵Nigi ma vi ɦu-ŋek kep kay li ɗifin ma poora tam Ma-Vatɗin hiɗi namu, tapay hiɗi ɗifin ma ŋal dok-dokŋa hiɗi niy ma yamam goyna.

¹⁶Hay til ma jewna, hay buurta doogo yam fiɗita vi tilla, nigi ma li paskata vi Ma-Vatɗina.

¹⁷Buurta doogo yam vaslta vi til namna ma li ti buurta vi yuldeta, nigi ma ti fun-bay-kufna ir buur siɗiya.

¹⁸Hay buurta jewta, nigi ma li dakka ta peldetta, nigi as li lop hay buur na'taɗi.

¹⁹Kayni mi ɗifin ma nigi ma ŋalam tam Ma-Vatɗina: Luway ma joriyo ma', ɦu-gamala kepe, guro fok-dimi siɗiya ma busata valam kep kepe, ma moy may talamɗi kaw.

²⁰Kayni mi futuw ma hiliɓi hay mula ma nigi ma tapam kuɗumna. Futuw ir goto zleeŋe kay put kepe, futuw ir goto karkiya kay ɦu-gamalana;

²¹futuw ir goto ɦidi kay goor ɦu-dimi kep kepe kalam siɗiya kafe.

²²Nigi ma ŋat ɦu-ŋek kep kay li ɗifin ma poora, kay poor tuwgiya.

²³Nigi ma li ɗifin namna, tapay hiɗi ɗifin ma graw culumtana, ma ka ŋal dok-dokŋa.

²⁴Nigi ma ŋalam hay buurta kaf, ta-ta ir buur siɗiya, ki tin ma ŋalay hay kuta, ma hista valam ŋaa'a kir Ma-Vatɗina, ɗifin ma ŋal dok-dokŋa hiɗi ma yamam goyna nigi ma tapam kuɗumu may.

²⁵Hay buurta siɗiyata, nigi ma li dakka ta peldetta; nigi ma li lop ma nek noŋɗi.

²⁶Hay buur ma nigi mar vun jafna vigi ma jewn tam Ma-Vatɗina kay yuldeta vi buur lumun ɗawni, nigi ma li dakka ta peldetta, nigi as li lop ma nekɗi.

²⁷Kayni mi ɗifin ma nigi ma ŋalamu kay hista valam ma tuɗ tam Ma-Vatɗina: Luway-jufay ma joriyon ma', ɦu-gamala kepe, guro fok-dimi ma busata valam kep kepn siɗiya.

²⁸Nigi ma tap talamu futuw ma digeɗna hiliɓi hiɗi mula, goto zleeŋe kay put-guju kep kepe, goto karkiya kay ɦu-gamala kep kepe,

²⁹goto ɦidi kay goor ɦu-dimi kep kep kalam siɗiya kafe.

³⁰Nigi ma ŋat hu-ŋek kep kaw kay poor tuwgi hiɗi namu.

³¹Nigi ma li ɗifin namna, tapam hiɗi ɗifin ma ŋal dok-dokŋa, nigi ma garam mi guro fok-dimi ma moy may talamɗina, tapam hiɗi niy ma yamam goyna.