Read Masana ŊAƁTA 29 Bible Online

ŊAƁTA 29 - Masana bible

ŊAƁTA 29

¹Hay til ma siɗiyana hay buurta jewta vi tilla, nigi ma li dakka ta peldetta: Nigi as li lop ma nekɗi. Nigi ma buw togolomna hay tun cawta vi buur namna.

²Kayni mi ɗifin ma ŋal-goyna ma nigi ma lumu, ma hista valam ŋaa'a ŋolo kir Ma-Vatɗina: Put ma joriyo kepe, ɦu-gamala kepe, guro fok-dimi siɗiya ma busata valam kep kep ma moy may talamɗina.

³Nigi ma tap talamu ɗifinna vi futuw ma digeɗna ma hiliɓi hiɗi mula, goto zleeŋe kay putna, goto karkiya kay ɦu-gamalana,

⁴goto ɦidi kay guro fok-dimin kalam siɗiya kafe.

⁵Nigi ma ŋat ɦu-ŋek kep kay li ɗifin ma poora, kay por tuwgi hiɗi namu.

⁶Ɗifin hena ma nigi ma tapam hiɗi namna: Nigi ma li ɗifin ma ŋal-goyna hiɗi ɗifin ma hay tilla kafna, hiɗi ɗifin ma yamam goyna ma nigi ma tapam talamna, ki lawt coli kalam nala. Kayni mi ɗifin ma ŋalay hay kuta, ma hista valam ŋaa'a ŋolo kir Ma-Vatɗina.

⁷Hay buurta doogota vi til namna ma siɗiyan zawni, nigi ma li dakka ta peldetta, nigi ma hot yigi gaa'a, nigi as li lopɗi.

⁸Kayni mi ɗifinna ma hista valam ŋaa'a kir Ma-Vatɗina, ma nigi ma ŋalamna: Put-guju kepe, ɦu-gamala kepe, guro fok-dimi siɗiya ma busata valam kep kepna, ma moy may talamɗina.

⁹Nigi ma tap talamu futuw ma digeɗna ma hiliɓi hay mula, goto zleeŋe kay put-gujuna,

¹⁰goto karkiya kay ɦu-gamalana, goto ɦidi kay goor ɦu-dimi kep kep kalam siɗiya kafe.

¹¹Nigi ma ŋat ɦu-ŋek kepe kay li ɗifin ma poora, tam ɗifin ma poora nigi as tap ɗifin ma ŋal dok-dokŋa, hiɗi niy ma yamam goyna kaw.

¹²Hay buurta doogo yam vaslta vi til ma siɗiyana, nigi ma li dakka ta peldetta: Nigi ma li lop ma nek noŋɗi, nigi ma li yuldeta kay subur sem Ma-Vatɗina ir buur siɗiya.

¹³Kayni mi ɗifin ma hista valam ŋaa'a ŋolo kir Ma-Vatɗina, ma nigi ma lumna: Luway ma joriyo doogo yam ɦidi, fok-gamala ma', guro fok-dimin doogo yam fiɗi, ma busata valam kep kepna, ma moy may talamɗina.

¹⁴Nigi ma tap talamu futuw ma digeɗna ma hiliɓi hay mula, goto zleeŋe kay put-guju kep kep kalam kafe, goto karkiya kay ɦu-gamala kep kep kafe,

¹⁵goto ɦidi kay goor ɦu-dimi kep kep kafe.

¹⁶Nigi ma ŋat hu-ŋek kep kay li ɗifin ma poora, nigi ma tap ɗifin ma ŋal dok-dokŋa talamu, hiɗi niy ma yamam goyna.

¹⁷Hay buurta ma'ta, nigi ma ŋat luway ma joriyo doogo yam ma', fok-gamala ma', guro fok-dimi doogo yam fiɗi ma busata valam kep kep, ma moy may talamɗina.

¹⁸tapay hiɗi ɗifinna hiɗi slen ma yamam goyna kay luway-jufayna, fok-gamalana hiɗi guro fok-dimina, kuɗ ŋaɓta valamu, ki gatta coli nala.

¹⁹Nigi ma ŋat ɦu-ŋek kepe kay li ɗifin ma poora, tapay hiɗi ɗifin ma ŋal dok-dokŋa, tapay hiɗi vulda hiɗi slen ma yamam goyna.

²⁰Hay buurta ɦidita, nigi ma ŋat luway-jufay doogo yam kep, fok-gamala ma', guro fok-dimi doogo yam fiɗi ma busata valam kep kep, ma moy may talamɗi,

²¹ɦidi ɗifinna hiɗi sle ma yamam goyna kay luway-jufayna, kuɗ ŋaɓta valamu ki gatta coli nala.

²²Nigi ma ŋat ɦu-ŋek kep kay li ɗifin ma poora, tapay hiɗi ɗifin ma dok-dokŋa, tapay hiɗi slen na yamam goyna.

²³Hay buurta fiɗita, nigi ma ŋat luway-jufayn doogo, fok-gamala ma', guro fok-dimi doogo yam fiɗi ma busata valam kep kep ma moy may talamɗina,

²⁴tapay hiɗi ɗifinna hiɗi sle ma yamam goyna kay luway-jufayna, fok-gamalana hiɗi guro fok-dimina, kuɗ ŋaɓta valamu, ki gatta coli nala.

²⁵Nigi ma ŋat ɦu-ŋek kepe kay li ɗifin ma poora, tapay hiɗi ɗifin ma ŋal dok-dokŋa hiɗi slen ma yamam goyna.

²⁶Hay buurta vaslta, nigi ma ŋat luway-jufayn vasl, fok-gamala ma', guro fok-dimi doogo yam fiɗi, ma busata valam kep kepe, ma moy may talamɗina,

²⁷tapay hiɗi ɗifinna hiɗi slen ma yamam goyna kay luway-jufayna, kay fok-gamalana hiɗi guro fok-dimina kuɗ ŋaɓta valamu, ki gatta coli nala.

²⁸Nigi ma ŋat ɦu-ŋek kep kay ɗifin ma poora, tapay hiɗi ɗifin ma ŋal dok-dokŋa, hiɗi sle ma yamam goyna.

²⁹Hay buurta karkiyata, nigi ma ŋat luway-jufay glafandi, fok-gamala ma' hiɗi guro fok-dimi doogo yam fiɗi ma busata valam kep kep, ma moy may talamɗina.

³⁰Tapay hiɗi ɗifinna hiɗi sle ma yamam goyo kay luway-jufayna, fok-gamalana hiɗi guro fok-dimina, kuɗ ŋaɓta valamu, ki gatta coli nala.

³¹Nigi ma ŋat ɦu-ŋek kepe kay li ɗifin ma poora, tapam hiɗi ɗifin ma ŋal dok-dokŋa, vulda hiɗi sle ma yamam goyna kaw.

³²Hay buurta siɗiyata, nigi ma ŋat luway-jufay siɗiya, fok-gamala ma', guro fok-dimi doogo yam fiɗi ma moy may talamɗina ma busata valam kep kepna,

³³tapay hiɗi ɗifinna hiɗi sle ma yamam goyo kay luway-jufayna, kay fok-gamalana hiɗi guro fok-dimina, kuɗ ŋaɓta valamu, ki gatta coli nala.

³⁴Nigi ma ŋat ɦu-ŋek kep kay li ɗifin ma poora, tapam hiɗi ɗifin ma ŋal dok-dokŋa, vulda hiɗi sle ma yamam goyna.

³⁵Hay buurta glafandita, nigi ma li dakka ta ŋolda, nigi ma li lop ma nekɗi,

³⁶kayni mi ɗifin ma ŋalay hay kuta ma nigi ma lum tam Ma-Vatɗina, ma hista valamu kiram ŋaa'a ŋolo, nigi ma ŋat put-guju kepe, ɦu-gamala kepe, guro fok-dimi siɗiya ma busata valam kep kepna, ma moy may talamɗina,

³⁷tapay hiɗi ɗifinna hiɗi sle ma yamam goyo kay put-gujuna, kay ɦu-gamalana hiɗi guro fok-dimina, kuɗ ŋaɓta valamu, ki gatta coli nala.

³⁸Nigi ma ŋat ɦu-ŋek kepe kay li ɗifin ma poora, hiɗi ɗifin ma ŋal dok-dokŋa, vulda hiɗi sle ma yamam goyna.

³⁹Kayni mi ɗifinna ma nigi ma ŋalam tam Ma-Vatɗina hay yuldeta vigiya, tapay hiɗi ɗifin ma ŋal-goyna hiɗi sle ma yamam goyna hiɗi vulda vigiya, hiɗi ɗifinna vigi ma toyta, kay hob vun va ma nigi yi kigiya lebo kay ɗifin ma kuɗ minda vigina.