Read Masana ŊAƁTA 30 Bible Online

ŊAƁTA 30 - Masana bible

ŊAƁTA 30

¹Slen ma Ma-Vatɗina dum mi Musus kafna nam dum mi gurona vi Israyel.

²Musus di tam sa ŋulona kuɗ jafna vi Israyel ala: Humgi va ma Ma-Vatɗin dumna.

³Hay li ma san yi va kalamu kay vul va tam Ma-Vatɗina, lebo yi va kalamu kay tel tuwam kay va'a, nam as cal vun dita valam goyɗi, may dita ta kali goy hay vunamta nam ma li kuɗa' kafe.

⁴La cata, hay li ma na' ka waya vo hay ziyna vi bu' tuwa, la na' yi vaawa ka' vok Ma-Vatɗina,

⁵la bu' humi kay va ma na' yum ka' vok Ma-Vatɗina, la bu' may da' vaɗi, va ma na' yum ka'na ma li hay liyamu;

⁶may hay buur ma bu' hum kaynawa, la hayam min law na'taɗi, sle ma na' yum ka' kafna as liɗi; nala Ma-Vatɗin ma vula' gida, kay bu'a hayam min law na'taɗi.

⁷Hay li ma goot-cat sla'awa goyo, may la na' yi va ka' jewe, lebo na' hin tuwa' juni tam yoboy ma fut goy vuna'a,

⁸la jufa' hum labarawa, may la nam may da' vaɗi, sle ma na' yum ka'na as li'e;

⁹may hay li ma jufa' hum labar kayni, dikam may firiɗi, sle ma na' yum ka'na nam as kusumu, Ma-Vatɗin ma vula' gida kay dita ta futay goy vuna'ta may.

¹⁰La cata duhulta lebo cata giy goyta yi va ka'a, va namna hobom vunam ti na' kay tuwa'a.

¹¹Hay li ma cat ka hay ziyna vi jufa'a, may na' yi vaawa ka'a,

¹²la jufa' hum kaynawa, la nam may da' vaɗi, dikam may ɓulakɗi lay, sle ma na' yum ka'na na' as li kuɗumu.

¹³May hay li ma jufa' hum kayni, la nam kusumawa, sle ma na' yum ka' kafna gasita valam mayɗi, kay jufa' kusumawa; nala Ma-Vatɗin ma vula' gida.

¹⁴la cat yi va ka' lebo tel tuwa' kay va'a, jufa'a gaŋeraŋa valam ka kay tel lawt na'ta lebo hina' li'e.

¹⁵La hay buurta vok lo vok lo nam may da' vaɗi, kayn di ala nam ka hina' hagata kay hob vun sle ma na' yum ka'na; kay hay buur ma nam hum kayni pa nam min da' vaɗi.

¹⁶May la nam kus kayni goy bugol buur ma nam humna, nam muɗi joo kay tel ma nam kus va ma cat yum ka'na, nala nam ma ziy sulukŋa vi cata valamu.

¹⁷Kayni mi gat ma Ma-Vatɗina vulum mi Musus kay goot-cat ta ka vo vi bu' tuwa hiɗi ta sliy goy kuɗ jufa'ta.