Read Masana ŊAƁTA 31 Bible Online

ŊAƁTA 31 - Masana bible

ŊAƁTA 31

²Naŋ ma job yam gurona vi Israyel tam sum sa Madiyanna; bugol kayni naŋ ma mita may.

³Musus ka di tam sumun ala: Gangi sum sara jargiya kay duura, nisi ma tuɗ dur sum sa Madiyanna, kay Ma-Vatɗina ma job yalam tam sum sa Madiyanna hiɗi nigiya.

⁴Nigi ma cuk sumun birim kep kep kuɗ jafna jafna kay nisi tuɗ vun duura.

⁵Kuɗ vokŋa vi sa Israyella, nisi yaw sumun birim kep kep kuɗ jafna, tapay pet sumun birim doogo yam ma' sa tuwsi koti kay duura.

⁶Sum nisina Musus cuksi vun duur kaf, tapay hiɗi mul-ma-ɗifinna Fineyas, goora vi Eliyazar, nam ka ziy slen ma peldetna hiɗi togolom ma buwumna.

⁷Nisi kali dur sa Madiyanna, ki Ma-Vatɗina vul hagat mi Musus nala, nisi ci sa jufayn goy kafe.

⁸Muliyana vi Madiyan sa vaslna, Evi, Rekem, Sur, Hur hiɗi Reba nisi cisi goy kafe; hiɗi segen kaw. Balaam goora vi Bewor kaw nisi cum goy hiɗi kew-gaferaŋa.

⁹Sum sa Israyella yaw boyna vi sa Madiyanna hiɗi gurona visi kaf daŋgaya, nisi vurum farayna visi kafe, yaw luwayna visi kaf, hiɗi slena visi kaf kaw.

¹⁰Nisi ŋal hoyok-ziyna ma nisi hayamna hiɗi guru ma nisi hayamna kaf.

¹¹Sle ma nisi tum ɓuraŋŋa kaf, sumuna hiɗi farayna kaw, nisi kali hiɗi namu;

¹²Nisi kali hiɗi sum sa nisi yawsi gorvona, sle ma ɓuraŋŋa hiɗi ma vurumin kaf, nisi tuɗum tam Musus hiɗi mul-ma-ɗifinna Eliyazar, hiɗi tokŋa vi gurona vi Israyel kafe, sa ka tokay hay fulda vi Mowab, goboy hiɗi Yordan, ɗiger vok Yeriko.

¹³Musus hiɗi mul-ma-ɗifinna Eliyazar hiɗi sa ŋulona vi Israyel kaf kali goy kirsiya, goy bugol guruna.

¹⁴Musus muɗ ɦiy kat sa ŋulona vi sojena, sa ŋulona vi sum sa birimi, vi sum sa kisna kaw sa may vun duur pana.

¹⁵Nam disiya: Nigi hin boyn ay iri kaf kay mige?

¹⁶Nisi kayni si sa kuɗ dita vi Balaam, zut sum sa Israyella kay li suluk kat Ma-Vatɗina, kuɗ lawta vi Pewor; bakmaran li jar sa Israyella kay kuɗ law na'ta ɗisu?

¹⁷Wulin kayni sum sa jufayna jar gurosgurayn kaf nigi ma cisi goyo, boyna sa buri tam sum sa jufayn kaf nigi ma cisi goy kafe;

¹⁸may guro-boy sa bay bur tam sa tuwana nigi ma hinsi iri kafe.

¹⁹May nigiya, lakgi goy bugol guruna vigi ir buur siɗiya; sum sa jargiya sa ci sumun matna, sa tun ɓisi tam sum sa mitina kaf, ma muz tuwsi goyo hay buurta ɦidita hiɗi buurta siɗiyata, nigiya hiɗi sa daŋgayna vigi kafe.

²⁰Nigi ma por sligara vigi goy kafe, sligar ma bakŋa kafe, sle ma koti hiɗi bak fok-meena, hiɗi gu ma li lop hiɗi namna kafe.

²¹Mul-ma-ɗifinna Eliyazar di tam sojen sa tuɗi vun duura kaf ala: Humgi va ma Ma-Vatɗin dum mi Musus hay gatta valamna:

²²Ora, doorota, wayta kaway ɗeŋŋa, kaway ma yum eteŋŋa, hiɗi tuwtana,

²³slen ma as yor hay kuta kafe, nigi ma yorom hay kuta kay muɗum bay-gese, slen ma yor hay kutɗina nigi ma porom hay niyna, nigi ma jikim hay niyna.

²⁴Hay buurta siɗiyata nigi ma muz sligara vigi goyo, bugol kayni nigi muɗi bay-gese, nigi as kal kulo hay guruna may.

²⁵Ma-Vatɗina di tam Musus:

²⁶Sle ma ɓuraŋŋa ma nigi yawamay vun duura, naŋu hiɗi Eliyazar, hiɗi sa ŋulona kuɗ jafn kaf, sumuna hiɗi farayn kaw nigi ma ŋaɓam goyo.

²⁷Naŋ ma ɓuraw sle ma ɓuraŋŋa jar sa tuɗ vun duura kaf hiɗi vokŋa vi sumun noŋ kaf.

²⁸Gal ma vulum mi soje sa tuɗ vun duura naŋ ma yaw kuɗumu ir vi Ma-Vatɗina: Kayn di ala kis-vasl sli goy kuɗum kepe; la mi sumuna lebo farayna, la mi kurona lebo fok-dimina kaw.

²⁹Nigi ma yaw kuɗ galla valamu, naŋ ma vulum mi mul-ma-ɗifinna Eliyazar ki vulda tam Ma-Vatɗin nala.

³⁰Galam hena ma hin mi gurona vi Israyel ɗawni, dok-vasl naŋ sli goy kuɗum kepe, la sumuna lebo farayna, la kurona lebo fok-dimina, farayn kaf; naŋ ma vulum mi sa Levitna, sa ka ŋom tabernaklena vi Ma-Vatɗina.

³¹Musus hiɗi mul-ma-ɗifinna Eliyazar li kuɗ va ma Ma-Vatɗin dum tam Mususna.

³²Sle ma nisi sa tuɗ vun duura tum ɓuraŋŋa tapay noŋ pet: Fok-dimina birim kis-karkiya hiɗi diram dok-siɗiya yam vasl,

³³luwayna birim dok-siɗiya yam ma',

³⁴kurona birim dok-karkiya yam kep

³⁵guro-boyna sa bay bur tam sa tuwa noŋo tapay birim dok-ɦidi yam ma'.

³⁶Galla valamu, ma ir vi sa tuɗ vun duura tap noŋ pet ir fok-dimi birim kis-ɦidi hiɗi diram dok-ɦidi yam siɗiya kalam kis-vasl, nisi yaw goy kuɗum ir birim kis-ɦidi kalam kis-vasl,

³⁷vul galla vi Ma-Vatɗina ir kis-karkiya kalam dok-siɗiya yam vasl;

³⁸luwayn birim dok-ɦidi yam karkiya, vul galla vi Ma-Vatɗina ir luway dok-siɗiya yam ma';

³⁹kuron birim dok-ɦidi kalam kis-vasl, vul kuɗum mi Ma-Vatɗin ir dok-karkiya yam kep;

⁴⁰sumun birim doogo yam karkiya, vul sumun kuɗsi dok-ɦidi yam ma' mi Ma-Vatɗina ki galla valam nala.

⁴¹Gal ma ir vi Ma-Vatɗina Musus vulum mi mul-ma-ɗifinna Eliyazar, ki Ma-Vatɗina vulum hagat nala.

⁴²Galla vi sle ma ɓuraŋŋa ma vuli mi gurona vi Israyel, ma Musus poŋom iram goy hiɗi ma ɓurawam mi sa tuɗ vun duura,

⁴³ma ir vi tokŋa tap noŋ pet ir fok-dimin birim kis-ɦidi hiɗi diram dok-ɦidi yam siɗiya kalam kis-vasl,

⁴⁴luwayn birim dok-ɦidi yam karkiya,

⁴⁵kurona birim dok-ɦidi kalam kis-vasl

⁴⁶sumun birim doogo yam karkiya.

⁴⁷Kuɗ galla namna ma vi kep tokŋa vi Israyel kayni, dok-vasl Musus sli goy kuɗum kep kepe, kuɗ sumuna hiɗi farayn lay, nam vulum mi sa levitna, sa ka ŋom tabernaklena vi Ma-Vatɗina, ki Ma-Vatɗina vulum hagat nala.

⁴⁸Sa ŋulona vi vok ma birimi ɦidi vok ma kisna co tam Musus,

⁴⁹nisi dumu: Soje sa gaa kuɗ gaŋeraŋa vumana numa li ŋaɓta visiyawa goy kafe, sa mara kep kaw may hini goyɗi.

⁵⁰Gige gige jarma'a min mar ora ma nam fumna tam Ma-Vatɗina: Jaɓna, way-digilina va ma gum cita-ɓamna, sle ma cuk humna hiɗi kermena kay li poor kuma'a vok Ma-Vatɗina.

⁵¹Slen namna ma koti hiɗi ora Musus hiɗi mul-ma-ɗifinna Eliyazar yawam hay ɓisiya.

⁵²Ora kaf, ma sa ŋulona vi vok ma birimna hiɗi vok ma kisna vulum tam Ma-Vatɗina hiɗi ɓisi kulo meɗayna, nekka valam co noŋ pet ir sikel* birim doogo yam karkiya hiɗi diram kis-siɗiya kalam dok-vasl.

⁵³Soje segena gigekaw ŋom sle ma nam yawamina.

⁵⁴Musus hiɗi mul-ma-ɗifinna Eliyazar yaw ora hay ɓam sa ŋulona vi vok ma birimi hiɗi vok ma kisna, nisi maram hay guɗuk ma fi-tuwna, kay Ma-Vatɗina humam ma gum kay gurona vi sa Israyella.